ሌሚሶ ማጻፋ 20 - ጋሞ ማጻፋ

¹ ማሲዛ ኡሺ ኡዪዛይ ቂልጪዛዴኔ ኤያ ጊዴስ፤ ሃይታንታን ባሌቲዳ ኡባይ ኣ ኤራንቻ ጊዴና።

² ካዎ ሃንቆይ ጋሞ ጻጎ ማላ፤ ኢዛ ዪሎቺዛይ ባ ሼምፖ ቦላ ፒርዴስ።

³ ፓላማፔ ሃኮይ ኢዛዴስ ቦንቾ፤ ጊዶ ኣቲን ኤያ ኣሲ ኡባይ ኦሻስ ኤሶቴስ።

⁴ ኣዛላ ጎሻንቻይ ዎዴራ ጎዬና፤ ካ ሺሺዛ ዎዴ ሺሻናስ ኮዬስ፤ ጊዶ ኣቲን ኣይኮካ ዴሜና።

⁵ ኣሳ ዎዚና ሃልቾይ ጪማ ኦላን ዴኢዛ ሃ ማላ፤ ጊዶ ኣቲን ዎዚናማ ኣሲ ሄፔ ዱቂ ኬሴስ።

⁶ ዳሮ ኣሳቲ ባንታ ኪያቴ ዮቴቴስ፤ ጊዶ ኣቲን ኣማኔቲዛ ኣስ ኦኒ ዴማናስ ዳንዳይዜ?

⁷ ጺሎ ኣሲ ቦሬይ ባይንዳ ዴኦ ዴስ፤ ኢዛፔ ካሊዲ ኢዛ ናይቲካ ኣንጄቲዳይታ።

⁸ ካዎይ ፒርዳናስ ባ ካዎቴ ኣልጋን ኡቲዛ ዎዴ ኢታ ኡባ ባ ኣይፌታን ሃርቂዲ ኬሴስ።

⁹ «ታ ዎዚና ጌሻዲስ፤ ታ ጌሻ፤ ታናን ናጋራይ ባዋ» ጋናይ ኦኔ?

¹⁰ ጎዳይ ዎርዶ ሜዛኔኔ ናምኡ ቆሞ ጌዳራ ሚሽ ኢጼስ።

¹¹ ናይ ጌሺኔ ሱሬ ጊዲዛይሲ ኢዚ ኦዛ ኦሶን ኤሬቴስ።

¹² ሲዪዛ ሃይኔ ጼሊዛ ኣይፌ፥ ኢስታካ ጎዳይ ሜዴስ።

¹³ ስኮ ሲቆፓ! ኔ ሂስቶንታ ኣጊኮ ማንቃና። ሚናዳ ኦ፤ ሂስቲኮ ኔኒ ካ ካላና።

¹⁴ ሻሚዛ ኣሲ፥ «ሃይሲ ኣልኦ! ቆሄስ!» ጌስ፤ ጊዶ ኣቲን ሻሚ ሲሚዳፔ ጉዬን፥ «ሂራይሶን ሻማዲስ» ጊዲ ጬቄቴስ።

¹⁵ ኤራይ ኩሚዳ ቃላ ሃሳይዛ ሜቴርሻቲ ዎርቃፌኔ ዞኦ ኢንቁፌካ ኣ ጌጼ።

¹⁶ ኤሮንታ ኣሳስ ዋሴ ጌሊዛ ኣሳ ማይኦ ቃሪ ኤኪቴ፤ ሃዉሻ ማጫሳስ ዋሴ ጌሊዛ ኣስ ኦይኪቴ።

¹⁷ ዎርዶን ዴሚዳ ካ ማልኤስ፤ ጊዶ ኣቲን ኣቂ ፔኢዲ ዶናን ኣጬ ጊዴስ።

¹⁸ ዞሬ ኤካዳ ሃልቾ ሃልቻ፤ ዞሬ ኤኮንታ ዴኣሼ ኦላስ ቦፓ።

¹⁹ ዚጊራንቻይ ጹራ ላሌስ፤ ሄሳ ጊሻስ ሎምኡሎምኣ ኣሳፔ ሃካ።

²⁰ ባ ኣዋ ዎይኮ ባ ኣዮ ጫዪዛዴስ፥ ጾምፔይ ሳካና ማን ቶኣና።

²¹ ኮይሮራ ኤሶን ቤቲዳ ኣቆታስ ዉርሴን ኣንጆይ ዴና።

²² ኔሲ ኢታ ኦዳ ኣሳስ፥ «ታኒ ኢዛስ ሃሎ ኬሳና» ጎፓ፤ ጎዳን ኣማኔታዳ ናጋ፤ ኢዚ ኔና ኣሻና።

²³ ጎዳይ ዎርዶ ሜዛኔን ኡፋዬቴና ናምኡ ቆሞ ጌዳራ ሚሽ ኢጼስ።

²⁴ ኣሳይ ባናስ ቤሲዛ ኦጌ ጎዳይ ካሌስ፤ ሂስቲን ኣሲ ባርካ ባ ባና ኦጌ ዎስቲ ኣኬካናስ ዳንዳይዜ?

²⁵ ኢሲ ሚሽ ኤሶቲዲ፥ «ሃይሳ ታኒ ጾሳስ ኢማና» ጊዲ ኣዲኔቲዳፔ ጉዬ ዚልኤቴ ኣስ ኦይኪዛ ያርዴ።

²⁶ ኣ ኤራቴ ዲዛ ካዎይ ማካላንቻታ ሻኪ ኤሬስ፤ ኢዚ ኢስታ ቃቶንታ ቃጻዬስ።

²⁷ ኣሳ ኣያናይ ጎዳ ጾምፔ፤ ሄሳ ጊሻስ ጊዶ ኣሳቴ ኡባ ኢዚ ፒልጊ ጼሌስ።

²⁸ ኪያቴኔ ቱማቴ ካዎ ናጌቴስ፤ ኢዛ ካዎቴ ኣራታይካ ሲቆን ሚኔስ።

²⁹ ዬላጋታ ዎልቃይ ኢስታስ ቦንቾ፤ ጪማታ ፑሉን ኢስታስ ቦንቾ።

³⁰ ሚኖ ቂጻቴይ ኢታቴ ዲጌስ፤ ዋይ ኢታ ዎዚና ላሜስ።