ሌሚሶ ማጻፋ 19 - ጋሞ ማጻፋ

¹ ጌላ ዮኦ ሃሳይዛ ኢታ ኣሳፔ ባ ዴኦን ቦሬይ ባይንዳ ሂዬሳ ኣሲ ሎኦ።

² ኤራቴ ባይንዳ ዚልኤቴ ሎኦ ጊዴና፤ ኤሶ ሄሜታይ ኦጌ ባሌስ።

³ ኢሲ ኢሲ ኣሳይ ባ ኤያቴን ባ ዴኦ ሞሬስ፤ ሂስቲዲ ጎዳ ቦላ ዪሎቴስ።

⁴ ዱሬቴ ዳሮ ላጌ ሜስ፤ ጊዶ ኣቲን ማንቆቴ ካሴ ዲዛ ላጌ ሃሴስ።

⁵ ዎርዶ ማርካይ ቃጻዬቶንታ ኣቴና፤ ዎርዶ ፑኪዛይካ ቃጻዬቶንታ ኣቴና።

⁶ ዳሮ ኣሳይ ሎኦ ሚሳታናስ ዳና ሲንን ኣላንስ፤ ጮ ኢሚዛ ኣሳራ ኣሲ ኡባይ ዳቦቴስ።

⁷ ማንቆ ኢዛ ዳቦ ኡባይ ኢጼስ፤ ሂስቲን ኢዛ ላጌቲ ኣይ ኬና ኢዛፔ ባቃታኔ! ካሊ ኣዳሺዲካ ኢዚ ኢስታ ዴሜና።

⁸ ኣ ኤራቴ ባስ ሚሽ ኦዛይ ባና ሲቄስ፤ ኣኬካ ሲቂዛዴስ ኢንጄቴስ።

⁹ ዎርዶ ማርካይ ቃጻዬቶንታ ኣቴና፤ ዎርዶ ፑኪዛይካ ያና።

¹⁰ ኤያቲ ኢሻሎ ዱስ ዳናስ ቤሴና፤ ኣይሌይ ጎዳ ቦላ ጎዳቲኮ ሄሲ ኣይ ኬና ኢታ!

¹¹ ኣ ኤራቴ ኣስ ዳንዳያንቻ ኬሴስ፤ ቆሆ ዬ ኣ ቦንቾን ጋስ።

¹² ካዎ ሃንቆይ ጋሞ ጻጎ ማላ፤ ጊዶ ኣቲን ኢዛ ሲንን ሳባ ዴሞይ ማታ ጪሊሊሲዛ ኢራ ማላ።

¹³ ኤያ ናይ ባ ኣዋ ባሻስ ኣ ኢሜስ፤ ኦሽ ኤሂዛ ማቻ ኢራ ኣዛ ኬ ማላ።

¹⁴ ኬኔ ኣቆታይ ዬሊዳይታፔ ላቴቴስ፤ ኣኬካራ ዲዛ ማቻ ጎዳፔ ቤታዉስ።

¹⁵ ኣዛላቴ ዴጾ ስኮ ኤሄስ፤ ኦሶ ኦንታ ኣሲ ጋፌስ።

¹⁶ ኣዛዞ ናጊዛይ ባ ሼምፖ ናጌስ፤ ጊዶ ኣቲን ኢዞ ኢጺዛዴይ ሃይቄስ።

¹⁷ ማንቆስ ኪዪዛ ኣሲ ጎዳስ ታልኤስ፤ ጎዳይ ሄ ሎኦ ኦሶ ዋጋ ቃንጻና።

¹⁸ ዎዴራ ኔ ና ሴራ፤ ኢዚ ሃይቆስ ቢሺን ጮኡ ጋ ጼሎፋ።

¹⁹ ኤሶን ዪሎቲዛ ኣሲ ቃጻዬታናስ ቤሴስ፤ ኔኒ ኣጋ ኣኮ ሃራ ዎዴካ ኔስ ሄሳ ኦሶይ ኣቴና።

²⁰ ዞሬ ሲያ፤ ሴራካ ኤካ። ሂስቲኮ ኔኒ ዉርሴን ኣ ኤራንቻ ጊዳና።

²¹ ኣሳ ዎዚናን ዳሮ ሃልቾይ ዴስ፤ ጊዶ ኣቲን ጎዳ ቆፋይ ፖሌቴስ።

²² ኣሳፔ ኮዬቲዛይ ሚኖ ሲቆ፤ ዎርዳንቻ ጊዳናፔ ማንቆቴ ሎኦ።

²³ ጎዳስ ያሺ ዴኦስ ካሌስ፤ ሄሳ ማላ ኣሲ ዎፓን ዴስ፤ ኢታይካ ኢዛ ቦቼና።

²⁴ ኣዛላይ ባ ኩሼ ማዳን ዬዴስ፤ ጊዶ ኣቲን ፑዴ ባ ዶናን ዛራናዉ ዋዬቴስ።

²⁵ ቂልጪዛዴ ሾጪኮ ዎዚና ፓጬይ ኣኬካ ታማራና፤ ኣኬካንቻ ኣሳ ሴሪኮ ኢዚ ኤራቴ ዴማና።

²⁶ ባ ኣዋ ቦንቂዛ ናይ፥ ባ ኣዮካ ኬሲ ዬዴዛ ናይ ኢዚ ዬላቴኔ ካዉሻቴ ኤሂዛ ና።

²⁷ ታ ናዞ! ታ ዞሬ ኔ ሲዮንታ ኣጊኮ፥ ኔ ኤሪዛ ቃላካ ባላና።

²⁸ ዎርዶ ማርካይ ሱሬ ፒርዳ ቦላ ቂልጬስ፤ ኢታ ኣሳ ዶናይ ኢታቴ ባንቺኬስ።

²⁹ ቂልጪዛይታስ ፒርዳይ፥ ኤያታ ዞኮስ ሊሶይ ጊጊ ኡቲዴስ።