ሌሚሶ ማጻፋ 17 - ጋሞ ማጻፋ

¹ ኦሺ ዴኢዛሶን ዴኢዛ ጊታ ጊቢራ ማናፔ ሳሮይኔ ዎፓይ ዴኢዛሶን ኡኬ ሜላ ሜ ኪያ።

² ኣኬካንቻ ኣይሌስ ሹፉሮ ጊዲዳ ባ ጎዳ ና ቦላ ማታይ ዴስ፤ ሂስቲዲ ኢሻንታ ማላ ኢስታራ ኢሲፌ ላቴስ።

³ ዎርቃይኔ ቢራይ ታማን ፓጬቲዛይሳ ማላ ጎዳይ ኣሳ ዎዚና ፒልጊ ጼሌስ።

⁴ ኢታ ኣሲ ኢታ ሃሳያ ሲዬስ፤ ዎርዳንቻይካ ጌናንቻ ሃሳያ ኤዝጌስ።

⁵ ሂዬሳታ ቦላ ቂልጪዛ ኣሲ ኢስታ ሜዳይሳ ጫዬስ፤ ሃራ ኣስ ጋኪዛ ሜቶን ኡፋዬቲዛ ኣሲ ቃጻዬቶንታ ኣቴና።

⁶ ናይታ ናይቲ ጪሚዳ ኣሳታስ ካላቻ፤ ዬሊዳይቲ ባንታ ናይታስ ቦንቾ።

⁷ ሎኦ ሃሳያይ ኤያስ ጊጌና፤ ዎርዶ ሃሳያይ ዴሬ ኣይሲዛዴስ ኣይ ማላ ዴጾ!

⁸ ማታኤይ ኢሚዛዴስ ቢታ ማላ፤ ኢዚ ቢዳ ሶሆ ኡባን ኢዛስ ኢንጄታና ሚሳቴስ።

⁹ ቆሄቲዲ ባ ቆሆዛ ጌንዛ ኣሲ ሲቆ ኮዬስ፤ ጊዶ ኣቲን ዮኦ ዛሪ ዛሪዲ ፒቂዛ ኣሲ ኣማኔቲዛ ላጌታ ሻኬስ።

¹⁰ ኤያይ ጼቱቶ ሊሶን ሾጪን ኤሪዛይሳፌ ኣኬካይ ዴኢዛ ኣሲ ጮ ሴሪን ኤሪዛይሲ ኣስ።

¹¹ ኢታ ኣሲ ማካላ ሚሽ ጻላ ኮዬስ፤ ሄሳ ጊሻስ ኢዛ ቦላ ሜንጼ ኢታ ኣሲ ኪቴታና።

¹² ኤያ ኣሳራ ኢዛ ኤያቴ ማላ ጋይታናፔ ማራታ ቦንቂ ኤኪቺዳ ማሄይራ ጋይቴ ኪያ።

¹³ ሎኦ ኦዳዴስ ኢታ ዛሪዛዴሶፔ ኢታይ ሙሌካ ዬና።

¹⁴ ኦሽ ዶሜ ኤሌ ሃ ፖጊ ዬዶ ማላ፤ ሄሳ ጊሻስ ኦሺ ሜታናፔ ካሴታዳ ኪቻይቻ።

¹⁵ ዎርዳንቻ ጺሎ ጺሎዛ ዎርዶ ጉሲ ናምኣይካ ጎዳ ሲንን ኢጼቲዳ ኦሶ።

¹⁶ ኣ ኤራቴ ዴማናስ ኢዚ ኮዮንታ ጊሻስ ኤያ ኩሼን ጌሊዳ ሚሽ ኢዛ ኣይ ጎኣኔ?

¹⁷ ላጌይ ኣይ ዎዴካ ላጌ፤ ኢሻይካ ሜቶ ዎዴስ ዬሌቴስ።

¹⁸ ኣኬካይ ፓጪዳ ኣሲ ባቂ ጫቂዲ ሃራ ኣሳስ ዋሴ ጌሌስ።

¹⁹ ኦሽ ዶሲዛ ኣሲ ናጋራ ዶሴስ፤ ኡባቶ ባና ቁ ሂስቲዛዴይ ባ ቦላ ባሽ ጼይጌስ።

²⁰ ጌላ ቆፋይ ዴኢዛዴስ ኢንጄቴና፤ ዎርዶ ሃሳይዛ ኣሲካ ሜቶን ጌሌስ።

²¹ ኤያ ና ዬሎይ ጬጪሴስ፤ ኤያ ና ኣዋስ ኡፋይሲ ዴና።

²² ኡፋዬቲዛ ዎዚናይ ሎኦ ሌ፤ ጊዶ ኣቲን ሜቂዳ ዎዚናይ ኣሳስ ዎልቃ ይሴስ።

²³ ኢታ ኣሲ ፒርዳ ጌላሳናስ ጌማን ማታኤ ኤኬስ።

²⁴ ኣኬካይ ዴኢዛ ኣሲ ኣ ኤራቴ ባ ሲንፌ ይሴና፤ ጊዶ ኣቲን ኤያ ኣይፌይ ሳኣ ጋጻ ጋካናስ ዩዬስ።

²⁵ ኤያ ናይ ባ ኣዋ ጬጪሴስ፤ ባና ዬሊዳ ኣዮካ ጹጌስ።

²⁶ ጺሎ ኣስ ቃጻዮ ቤሴና፤ ሱሬ ኣስ ሾጮይ ሎኦ ጊዴና።

²⁷ ኣማርዳ ቃላ ሃሳይዛ ኣሲ ኣ ኤራንቻ፤ ዎፓ ኣያናይ ዴኢዛ ኣሲካ ኣኬካንቻ።

²⁸ ኤያ ኣሲ ጮኡ ጊኮ ኣ ኤራንቻ ሚሳቴስ፤ ባ ዶናካ ሺሺ ኦይኪኮ ኣኬካንቻ ሚሳቴስ።