ሌሚሶ ማጻፋ 16 - ጋሞ ማጻፋ

¹ ኣሲ ባ ዎዚናን ሃልቼስ፤ ጊዶ ኣቲን ዛሮይ ጎዳፔ ቤቴስ።

² ኣሲ ቢዛ ኦጌ ኡባይ ኢዛስ ሎኦ ሚሳቴስ፤ ጎዳይ ኮይሮ ዴን ቆፋ ጫዲ ጼሌስ።

³ ኔ ኦዛ ኡባ ሃዳራ ጎዳስ ኢማ፤ ሂስቲኮ ኔ ሃልቾይ ፖሌታና።

⁴ ጎዳይ ኡባ ሚሽ ሜዳ ጋሶይካ ዴስ፤ ማካላንቻታ ጊዲኮካ ባሻ ጋላሳስ ጊግሲ ዎዴስ።

⁵ ጎዳይ ኦቶሬቲዛ ኡባ ሻቴቴስ፤ ኢስቲ ቃጻዬቶንታ ኣቴቴና።

⁶ ሲቆኒኔ ኣማኔቴን ናጋራይ ኣቶ ጌቴቴስ፤ ጎዳስ ያሻቴን ኣሲ ኢታፔ ሃኬስ።

⁷ ኣሳ ሄሜታይ ጎዳ ኡፋይሲዛዝ ጊዲኮ ኢዛ ሞርኬቲ ኢዛራ ሳሮ ዳና ማላ ኦስ።

⁸ ጺሎቴን ቤቲዛ ጉ ሚሺ ዎርዶራ ዴሚዛ ዳሮ ዎፔ ኣስ።

⁹ ኣሲ ባ ዎዚናን ባ ኦና ሚሽ ሃልቼስ፤ ሃልቾዚ ጎዳይ ጊኮ ፖሌቴስ።

¹⁰ ካዎ ሜቴርሻቲ ጾሳፌ ኤኪዳ ማታን ሃሳዬቴስ፤ ኢዛ ኢንጻርሲ ፒርዳ ጌላሳናስ ቤሴና።

¹¹ ሱሬ ጌዳራቲኔ ማካ ሚሻቲ ጎዳፔ፤ ካራጺቴ ጊዶን ዲዛ ጌዳራቲ ኡባይ ኢዛ ኦሶታ።

¹² ካዎቲ ኢታ ኦሶ ሃራሴቴቴስ፤ ኣይስ ጊኮ ካዎቴ ኣራታይ ጺሎቴን ኤቄስ።

¹³ ጺሎ ሃሳያን ካዎቲ ኡፋዬቴቴስ፤ ቱማ ሃሳይዛይታካ ዶሴቴስ።

¹⁴ ካዎ ሃንቆይ ሃይቆ ኪታንቻ ማላ፤ ኣ ኤራንቻይ ጊዲኮ ሃንቆ ኢርጺሴስ።

¹⁵ ካዎይ ፓሽኪ ጊሺን ዴኦይ ዴስ፤ ኢዛስ ኪያቴ ኢራ ቶኪዳ ባሳ ሻራ ማላ።

¹⁶ ኣ ኤራቴ ዴሞይ ዎርቃ ዴሚዛይሳፌ ኣስ፤ ኣኬካ ዴሞይ ቢራ ዴሞፔካ ኣስ።

¹⁷ ሱሬታ ኦጌይ ኢታታፔ ሃኮን ዴስ፤ ባ ሄሜታ ናጊዛ ኣሲ ባ ሼምፖ ናጌስ።

¹⁸ ኦቶሮ ጌዶ ባሺ ካሌስ፤ ሃላጫ ጌዶካ ኩንዴ ካሌስ።

¹⁹ ኦቶራንቻታራ ዙፔቲዲ ዲኢ ኤሂዳ ሚሽ ሻኬቲ ኤካናፔ ማንቆታራ ማንቄቴን ዱሲ ኪያ።

²⁰ ዞሬ ኤኪዛ ኣሲ ዱሬቴስ፤ ጎዳን ኣማኔቲዛ ኣሲ ኣንጄቲዳዴ።

²¹ ዎዚናን ኣ ኤራንቻ ጊዲዳ ኣሳቲ ኣኬካንቻ ጌቴቴቴስ፤ ሎኦ ቃላይ ኤራቴ ጉጄስ።

²² ባስ ሚሽ ኦዳዴስ ኣኬካይ ዴኦ ፑልቶ፤ ዶጋታስ ጊዲኮ ኤያቴ ሃንቆ ኤሄስ።

²³ ኣ ኤራንቻ ዎዚናይ ኢዛ ዶና ካሌስ፤ ኢዛ ሜቴርሻቲካ ኤራቴ ጉጂ ጉጂ ቤቴስ።

²⁴ ሎኦ ቃላይ ኤሳ ኢሊሎ ማላ ማልኤስ፤ ቦላካ ማዴሲኔ ፓስ።

²⁵ ኣሳስ ሱሬ ሚሳቲዛ ኦጌይ ዴስ፤ ጊዶ ኣቲን ዉርሴን ሃይቆስ ጋስ።

²⁶ ካ ኮሺ ኣሲ ሚኒ ኦና ማላ ዴንስ፤ ጋፋይካ ኦሶስ ሚንስ።

²⁷ ኢታ ኣሲ ኢታቴ ቆፔስ፤ ኢዛ ሃሳያይካ ጹጊዛ ታማ ማላ።

²⁸ ጌላ ኣሲ ኦሽ ዴንስ፤ ዚጊርሲ ኣማኔቲዛ ላጌታ ሻኬስ።

²⁹ ጌኔ ኣሲ ባ ሾሮዛ ጪሜስ፤ ሎኦ ጊዶንታ ኦጌ ኢዛ ካሌስ።

³⁰ ኣይፌራ ቂምኦቲ ቤሲዛ ኣሲ ጌላቴ ቆፔስ፤ ባ ሜቴርሻ ሳጺዛ ኣሲ ኢታሶ ቤስ።

³¹ ፑሉን ቦንቾ ካላቻ፤ ሄሲ ጺሎቴ ዱሳን ቤቴስ።

³² ዎልቃማ ኣስ ጊዳናፔ ዳንዳያ ኣስ ጊዴ ሎኦ፤ ባና ሃሪዛዴይ ካታማ ዎልቃን ሃሪዛዴፌ ኣስ።

³³ ኣሲ ሳማ ዬጌስ፤ ጊዶ ኣቲን ዉርሴ ፖሎ ኢሚዛይ ጎዳ።