ሌሚሶ ማጻፋ 15 - ጋሞ ማጻፋ

¹ ሊቆ ዛሮይ ሃንቆ ኢርጺሴስ፤ ፖርዶሎ ቃላይ ጊዲኮ ሃንቆ ዴንስ።

² ኣ ኤራንቻ ኢንጻርሳፌ ኤራቴ ፑልቴስ፤ ጊዶ ኣቲን ዶጋታ ዶናፔ ኤያቴ ፑልቴስ።

³ ጎዳ ኣይፌቲ ኡባሶ ጼሌቴስ፤ ኢታታኔ ሎኦታ ኡባ ሎኤ ቤኤቴስ።

⁴ ሾንጋይ ዴኢዛ ሎኦ ሃሳያይ ዴኦ ሚ ማላ፤ ጊዶ ኣቲን ባሌ ሃሳያይ ኣያና ቆሄስ።

⁵ ኤያይ ባ ኣዋ ሴራ ካስ፤ ጊዶ ኣቲን ዞሬ ኤኪዛይ ባ ኣኬካቴ ቆንጪሴስ።

⁶ ጺሎ ኣሳ ኬን ዳሮ ኣቆታይ ዴስ፤ ጊዶ ኣቲን ኢታታስ ጌሊዛ ሚሺ ሜቶ ኤሄስ።

⁷ ኣ ኤራንቻታ ዶናይ ኤራቴ ዜሬስ፤ ኤያታ ዎዚናይ ጊዲኮ ሄሳ ማላ ዴና።

⁸ ጎዳይ ኢታታ ያርሾ ሻቴቴስ፤ ሱሬታ ዎሳይ ጊዲኮ ኢዛ ኡፋይሴስ።

⁹ ጎዳይ ኢታ ኣሳታ ኦጌ ሻቴቴስ፤ ጊዶ ኣቲን ጺሎቴ ካሊዛይታ ዶሴስ።

¹⁰ ሱሬ ኦጌ ኣጊዲ ካሬ ኬኢዳዴ ሃንቆይ ናጌስ፤ ሴራ ኢጺዛ ኣሲ ሃይቄስ።

¹¹ ዱፎኒኔ ዮ ጊዶን ዲዛይሲ ጎዳ ሲንን ቆንጬ፤ ሂስቲን ኣሳ ዎዚና ቆፋይ ዋኒ ኢዛፔ ጌማኔ?

¹² ቂልጪዛ ኣሲ ሴራ ዶሴና፤ ኣ ኤራንቻታፔካ ዞሬ ኦይቼና።

¹³ ዎዚና ኡፋይሲ ሲን ፖኢሴስ፤ ዎዚና ጬጬይ ጊዲኮ ኣያና ቆሄስ።

¹⁴ ኣኬኪዛ ዎዚናይ ኤራቴ ኮዬስ፤ ጊዶ ኣቲን ዶጋታ ዶናይ ኤያቴ ባንቺኬስ።

¹⁵ ማንቆታ ዴኦይ ኡባ ጋላሲካ ባጼ። ኡፋዬቲዛ ኣሳቲ ኡባቶካ ባንታ ዴኦን ኡፋዬቴቴስ

¹⁶ ኦሺ ዲዛሶን ዲዛ ጊታ ኣቆታፔ ጎዳ ያሻቴራ ዲዛ ጉ ኣቆታይ ኣስ።

¹⁷ ኦሺ ዲዛሶን ሞ ኣሾ ማናፔ ሲቆይ ዲዛሶን ሳን ሙሲ ኣስ።

¹⁸ ኤሶን ሃንቄቲዛ ኣሲ ኦሽ ኬሴስ፤ ዳንዳይዛ ኣሲ ጊዲኮ ኦሽ ኢርጺሴስ።

¹⁹ ኣዛላ ኣሳ ኦጌይ ኣጉንን ዲሬቲ ኡቲዴስ፤ ሱሬ ኣሳ ኦጌይ ጊዲኮ ባሳ ጊዴስ።

²⁰ ኣ ኤራራ ዲዛ ናይ ባ ኣዋ ኡፋይሴስ፤ ጊዶ ኣቲን ኤያ ናይ ባ ኣዮ ካስ።

²¹ ዎዚና ፓጬ ኣሲ ባ ኤያቴን ኡፋዬቴስ፤ ጊዶ ኣቲን ኣኬኪ ሱሬ ኦጌ ካሌስ።

²² ዞሬይ ይኮ ሃልቾይ ኦጌን ኣቴስ፤ ዳሮ ዞራንቻቲ ዲዛሶን ሃልቾይ ፖሌቴስ።

²³ ኣሲ ቤሲዛ ዛሮ ኢሚዲ ኡፋይስ ዴሜስ፤ ኮሺዛ ዎዴን ኢሜቲዳ ቃላይ ኣይ ማላ ሎኦ!

²⁴ ዱጌ ዱፎን ዎዛ ኦጌ ቦንታ ማላ ዴኦ ኦጌይ ኣ ኤራንቻ ፑዴ ካሌዉስ።

²⁵ ጎዳይ ኦቶራንቻታ ኬ ላሌስ፤ ጊዶ ኣቲን ኣምኤይ ዛዋ ናጌስ።

²⁶ ጎዳይ ኢታታ ቆፋ ሻቴቴስ፤ ጌሻታ ቆፋይ ጊዲኮ ኢዛ ኡፋይሴስ።

²⁷ ኡዜ ኣሲ ባሶ ኣሳ ቦላ ሜቶ ኤሄስ፤ ጊዶ ኣቲን ማታኤ ኢጺዛ ኣሲ ፓጻ ዳና።

²⁸ ጺሎ ኣሲ ሃሳያናፔ ካሴቲዲ ቆፔስ፤ ጊዶ ኣቲን ኢታ ኣሳ ዶናፔ ኢታ ቃላይ ጎጌስ።

²⁹ ጎዳይ ኢታታፔ ሃኮን ዴስ፤ ጊዶ ኣቲን ጺሎታ ዎሳ ሲዬስ።

³⁰ ፓሽካ ሃኖይ ዎዚና ኡፋይሴስ፤ ሚሺራቾ ቃላይ ሜቄ ጪሊሊሴስ።

³¹ ዴኦ ኢሚዛ ሴራ ኤኪዛ ኣሲ ኣ ኤራንቻታራ ኢሲፌ ዳና።

³² ሴራ ኢጺዛ ኣሲ ባና ካስ፤ ሴራ ኤኪዛ ኣሲ ጊዲኮ ኣኬካ ዴሜስ።

³³ ጎዳስ ያሺ ኣ ኤራቴ ታማርሴስ፤ ቦንቼታና ኮዪዳ ኣሲ ኮይሮ ባና ካዉሻናስ ኮሼስ።