ሌሚሶ ማጻፋ 13 - ጋሞ ማጻፋ

¹ ኤራ ናይ ባ ኣዋ ዞሬ ዎዚናፔ ሲዬስ፤ ቂልጪዛይ ጊዲኮ ሴራ ሲዬና።

² ኣሲ ባ ዶናፔ ኬኢዛ ቃላን ሎኦ ሚሽ ዴሜስ፤ ኣማኔቶንታይቲ ጊዲኮ ማካላቴ ኣሞቴቴስ።

³ ባ ዶና ናጊዛ ኣሲ ባ ሼምፖ ናጌስ፤ ዶናን ዪዳ ማላ ሃሳይዛ ኣሲ ባና ይሴስ።

⁴ ኣዛላይ ኬሂ ኣሞቴስ ሺን ኣይኮካ ዴሜና፤ ሚኒ ኦዛይታ ኣሞይ ጊዲኮ ኩማና።

⁵ ጺሎ ኣሳቲ ዎርዶ ሃሳያ ኢጼቴስ፤ ኢታ ኣሳታ ሃሳያይ ጊዲኮ ዬላሴሲኔ ካዉሼስ።

⁶ ጺሎቴ ሱሬ ኣስ ናጌስ፤ ኢታቴ ጊዲኮ ናጋራንቻ ይሴስ።

⁷ ኣይኮይ ባይንዳ ባና ዱሬ ሚሳቲሲዛ ኣሲ ዴስ፤ ሃራ ባጋራ ባስ ዳሮ ኣቆታይ ዲሺን ማንቆ ሚሳቲ ቤቲዛ ኣሲ ዴስ።

⁸ ኣሲ ባ ዱሬቴን ባ ሼምፖ ዎዛና ጊዳና፤ ማንቆይ ጊዲኮ ሂርጋይ ባይንዳ ኡቴስ።

⁹ ጺሎታ ፖኦይ ኬሂ ፖኤስ፤ ኢታታ ጾምፔይ ጊዲኮ ቶኣና።

¹⁰ ኦቶሮይ ኦሽ ዬሌስ፤ ኣ ኤራቴ ጊዲኮ ዞሬ ኤኪዛይታ ማታን ዴስ።

¹¹ ቤሶንታ ኦጌራ ዴሚዳ ሚሺ ዪ ዪ ቤስ፤ ባ ጫዋ ጉሲዲ ዴሚዳ ኣቆታይ ዳሪ ዳሪ ቤስ።

¹² ሂዶታይ ፖሌቶንታ ጋምኢኮ ዎዚናይ ሜቄስ፤ ጊዶ ኣቲን ኣሞቲዳይሲ ፖሌቲሺን ኡፋይሴስ።

¹³ ዞሬ ካዛ ኣሲ ሜቶን ጌሌስ፤ ኣዛዞ ቦንቺዛ ኣሲ ጊዲኮ ባ ዋጋ ኤካና።

¹⁴ ኣ ኤራንቻይ ኢሚዛ ቲሚርቴይ ዴኦ ፑልቶ፤ ሄሲ ኣሲ ሃይቆ ዎጺማዴን ጌሎንታ ማላ ናጌስ።

¹⁵ ኣኬካይ ዴኢዛ ኣሲ ቦንቼቴስ፤ ኣማኔቶንታ ኣጎይ ባሻ ኦጌ ኤፌስ።

¹⁶ ኣኬኪዛ ኣሲ ኤራን ኦስ፤ ኤያይ ጊዲኮ ባ ኤያቴ ቆንጪሴስ።

¹⁷ ኢታ ኣሲ ኪቴቲኮ ሜቶን ጌሌስ፤ ኣማኔቲዳ ኣሲ ኪቴቲኮ ሳሮቴ ኤሄስ።

¹⁸ ሴራ ኢጺዛ ኣሲ ማንቄሲኔ ካዉዬስ፤ ሃንቆ ሲዪዛ ኣሲ ጊዲኮ ቦንቼቴስ።

¹⁹ ኣሞይ ፖሌቲኮ ኬሂ ኡፋይሴስ፤ ኤያቲ ጊዲኮ ኢታፔ ሃካናስ ኮዬቴና።

²⁰ ኣ ኤራንቻታራ ሄሜቲዛ ኣሲ ኣ ኤራንቻ ጊዴስ፤ ጊዶ ኣቲን ኤያታራ ሄሜቲዛ ኣሲ ሜቶን ጌሌስ።

²¹ ናጋራንቻታ ኢታ ቃዳይ ካሌስ፤ ዱሬቴ ጊዲኮ ጺሎታስ ኢሜቲዛ ዎይቶ።

²² ሎኦ ኣሲ ባስ ና ናይታ ጋካናስ ላቲሴስ፤ ናጋራንቻ ኣቆታይ ጊዲኮ ጺሎታስ ዳጋቴስ።

²³ ማንቆ ጋዴይ ዳሮ ካ ኢማና ዳንዳዬስ፤ ጊዶ ኣቲን ሱሬ ፒርዳይ ይኮ ፒቴቲ ዬስ።

²⁴ ሴሮንታ ዲቺዛይ ባ ና ኢጼስ፤ ጊዶ ኣቲን ሴሪ ዲቺዛይ ባ ና ዶሴስ።

²⁵ ጺሎይ ካላናሼ ጋካናስ ሜስ፤ ኢታቲ ጊዲኮ ጋፊዳ ማላ ዳና።