ሌሚሶ ማጻፋ 12 - ጋሞ ማጻፋ

¹ ሴራ ዶሲዛ ኣሲ ኤራቴ ዶሴስ፤ ጊዶ ኣቲን ሴራ ኢጺዛ ኣሲ ዳማ።

² ሎኦ ኣሲ ጎዳፔ ሳባ ዴሜስ፤ ጊዶ ኣቲን ጎዳይ ጌናንቻታ ፒርዴስ።

³ ኣሲ ኢታቴን ኤቂዲ ሚኒ ካንናዉ ዳንዳዬና፤ ጺሎቲ ጊዲኮ ባ ዲዛሶፔ ቃጼቴና።

⁴ ዎዚናማ ማጫሳያ ባ ኬዋስ ካላቻ ማላ፤ ዬላቺዛ ማቻ ባ ኣዚናስ ሜቄ ጋርሳን ዲዛ ዎይዛዚሬ ሃርጌ ማላ።

⁵ ጺሎታ ቆፋይ ሱሬ፤ ኢታታ ዞሬይ ጊዲኮ ጪሞ።

⁶ ኢታታ ሃሳያይ ኣስ ዎስ፤ ጺሎታ ሃሳያይ ጊዲኮ ኣስ ኣሼስ።

⁷ ኢታ ኣሳቲ ኩንዳና፤ ኢስታስ ዜሬካ ኣቴና፤ ጺሎታ ዜሬ ጊዲኮ ሚኒ ዳና።

⁸ ኣሲ ባ ኣ ኤራቴ ማላ ጋላቴቴስ፤ ጊዶ ኣቲን ጌላ ቆፋይ ዴኢዛ ኣሲ ካቴስ።

⁹ ኣይኮይ ባይንዳ ዲሺን ዱሬ ኣሳ ማላ ጬቄቲዛ ኣሳፔ ባና ዚቂ ሂስቲ ባስ ኦ ኣቂዛ ኣሲ ኪያ።

¹⁰ ጺሎ ኣሲ ባ ሜሄስ ቃቴስ፤ ኢታ ኣሲ ኪያቴስ ጊኮካ ሜንጼ ኢታ።

¹¹ ባ ቢታ ሚን ኦዛ ኣሲ ካ ካሌስ፤ ኣኬካይ ፓጪዳ ኣሲ ጎኣይ ባይንዳ ሂዶታ ጎዴስ።

¹² ናጋራንቻቲ ኢታቲ ዲኢ ኤሂዳይሳ ኣሞቴቴስ፤ ጺሎታ ዜሬ ጊዲኮ ዳያና።

¹³ ኢታ ኣሲ ባ ሃሳይዳ ኢታ ሃሳያን ኦይኬቴስ፤ ጺሎይ ጊዲኮ ሜቶፔ ኬሲ ኤኪ ኣቴስ።

¹⁴ ኣሲ ባ ዶናፔ ኬኢዛ ቃላን ሎኦ ሚሽ ካሌስ፤ ባ ኦዳ ኦሶ ዋጋካ ዴሜስ።

¹⁵ ኤያ ኣሳስ ኢዚ ቢዛ ኦጌይ ኢዛስ ሎኦ ሚሳቴስ፤ ኣ ኤራንቻይ ዞሬ ሲዬስ።

¹⁶ ኤያ ኣሳ ሃንቆይ ሄራካ ኤሬቴስ፤ ጪንጫ ኣሲ ጊዲኮ ጫሼ ዉዱ ጌና።

¹⁷ ሱሬ ማርካይ ቱማ ማርካቴስ፤ ዎርዶይ ጊዲኮ ዎርዶ ማርካቴስ።

¹⁸ ኣኬኮንታ ሃሳይዛ ሃሳያይ ቶራ ማላ ጫዴስ፤ ኣ ኤራንቻ ኢንጻርሲ ጊዲኮ ፓስ።

¹⁹ ዎርዶ ሃሳያይ ጉ ዎዴሳ፤ ቱማ ሃሳያይ ጊዲኮ ሜርናሳ።

²⁰ ኢታ ቆፒዛይታ ዎዚናን ባሌይ ዴስ፤ ጊዶ ኣቲን ሳሮ ሚሽ ቆፒዛይታ ዎዚናን ኡፋይሲ ዴስ።

²¹ ጺሎታ ቆሆይ ጋኬና፤ ኢታቲ ጊዲኮ ሜቶ ካላና።

²² ጎዳይ ዎርዶ ሃሳያ ሃራሴቴስ፤ ቱማንቻታን ጊዲኮ ኡፋዬቴስ።

²³ ኣኬካራ ዲዛ ኣሲ ባ ኤራቴ ቆቴስ፤ ዎዚናይ ባይንዳ ኣሲ ባ ኤያቴ ናሼስ።

²⁴ ሚኒ ኦዛ ኣሲ ዴሬ ሃሬስ፤ ኣዛላይ ኣይሌ ጊዴስ።

²⁵ ሂርጋን ኩሚዳ ዎዚናይ ኣስ ጬጬን ዬጌስ፤ ሾንጋራ ዲዛ ሃሳያይ ጊዲኮ ኡፋይሴስ።

²⁶ ጺሎ ኣሲ ባ ላጌ ሎኦ ዞሬ ዞሬስ፤ ኢታታ ዞሬይ ጊዲኮ ቱማ ኦጌፔ ሃሴስ።

²⁷ ኣዛላ ኣሲ ሻንካቲዲ ኤሂዳ ኣሾዛ ጺጼና፤ ሚኒ ኦዛ ኣሲ ጊዲኮ ባ ኣቆታስ ሚሼቴስ።

²⁸ ጺሎቴ ኦጌን ዴኦይ ዴስ፤ ሄ ኦጌን ሃይቆይ ዴና።