ሌሚሶ ማጻፋ 11 - ጋሞ ማጻፋ

¹ ጎዳይ ዎርዶ ጌዳራ ኢጼስ፤ ጊዶ ኣቲን ሱሬ ጌዳራን ኡፋዬቴስ።

² ኦቶሮቴ ካዉሻቴ ካሌስ፤ ኣሽኬቴ ጊዲኮ ኣ ኤራቴ ኤሄስ።

³ ጺሎታ ኢስታ ሱሬቴ ካሌስ፤ ጊዶ ኣቲን ዎርዳንቻታ ኢስታ ዎርዶቴ ይሴስ።

⁴ ሃንቆ ጋላስ ዱሬቴ ጎኤና፤ ጊዶ ኣቲን ጺሎቴ ሃይቆፔ ኣሼስ።

⁵ ቦሬይ ባይንዳ ኣሳታ ኢስታ ጺሎቴ ኢስታስ ኦጌ ሱሪሴስ፤ ጊዶ ኣቲን ኢታቲ ባንታ ኢታቴን ኩንዴቴስ።

⁶ ሱሬታ ኢስታ ጺሎቴ ኣሼስ፤ ጊዶ ኣቲን ማልቴቲ ባንታ ኢታ ኣሞን ኦይኬታና።

⁷ ኢታ ኣሲ ሃይቂዛ ዎዴ ኢዛ ሂዶታይ ሃዳ ጊዴስ፤ ባ ዎልቃን ኢዚ ጬቄቲዛዚ ኡባይካ ዬስ።

⁸ ጺሎይ ሜቶፔ ኣቴስ፤ ጊዶ ኣቲን ሜቶይ ኢታ ኣሳ ቦላ ጋኬስ።

⁹ ኢታ ኣሲ ባ ዶናን ባ ላጌዛ ይሴስ፤ ጊዶ ኣቲን ጺሎቲ ኤራቴን ኬሲ ኤኪ ኣቴቴስ።

¹⁰ ጺሎታስ ኢንጄቲዛ ዎዴ ካታማይ ኡፋዬቴስ፤ ቃሴ ኢታቲ ይዛ ዎዴ ሃሹ ጌስ።

¹¹ ሱሬታ ኣንጆ ጋሶን ካታማይ ዲጬስ፤ ኢታ ሃሳያን ጊዲኮ ካታማይ ዬስ።

¹² ዎዚና ፓጬ ኣሲ ባ ሾሮዛ ካስ፤ ኣኬካንቻ ኣሲ ጊዲኮ ባ ዶና ሺሺ ኤኬስ።

¹³ ዚጊርዛ ኣሲ ጹራ ላሌስ፤ ኣማኔቲዛ ኣሲ ጊዲኮ ጹራ ናጌስ።

¹⁴ ካሌ ፓጬን ካዎቴ ኩንዴስ፤ ዳሮ ዞራንቻቲ ዴኢኮ ሳሮይ ዴስ።

¹⁵ ኤሮንታ ኣሳስ ዋሴቲዛይ ሜቶን ጌሌስ፤ ዋሴ ጌላናስ ጫቆንታዴ ኣይኮይካ ቦቼና።

¹⁶ ኡሎ ኪያ ማጫሳያ ቦንቼታዉስ፤ ዎልቃዛ ኣሳቲ ዱሬቴ ጻላ ዱሬቴቴስ።

¹⁷ ኪያ ኣሲ ባና ጎኤስ፤ ሜንጼ ኢታ ኣሲ ጊዲኮ ባ ቦላ ሜቶ ኤሄስ።

¹⁸ ኢታ ኣሲ ዴሚዛ ዎይ ዴና፤ ጺሎቴ ዜሪዛ ኣሲ ጊዲኮ ሱሬ ዎይቶ ኤካና።

¹⁹ ጺሎይ ዴኦ ዴማና፤ ጊዶ ኣቲን ኢታቴ ካሊዛ ኣሲ ሃይቃና።

²⁰ ጎዳይ ኢታ ቆፋይ ዴኢዛ ኣሳታ ሻቴቴስ፤ ጊዶ ኣቲን ሱሬ ሄሜቲዛይታን ኡፋዬቴስ።

²¹ ኢታ ኣሲ ቃጻዬቶንታ ኣቴና፤ ጊዶ ኣቲን ጺሎቲ ቃጻዬቴቴና።

²² ኣኬካይ ፓጪዳ ማጫሳ ፑላቴ ጉዱን ሲን ኣዳ ዎርቃ ማላ።

²³ ጺሎታ ኣሞስ ዉርሴ ሎኦ ጻላ፤ ጊዶ ኣቲን ኢታታ ኣሞስ ዉርሴ ሃንቆ ጻላ።

²⁴ ኢሲ ኢሲ ኣሳቲ ጮ ኪያቴ ኢሜቴስ፤ ጊዶ ኣቲን ኢስታስ ኣቆይ ሃ ሃ ዳሬስ። ባጋቲ ኬሂ ኡዜቴቴስ፤ ጊዶ ኣቲን ኢስቲ ማንቂ ማንቂ ቤቴስ።

²⁵ ኪያ ኣሲ ዱሬታና፤ ሃራታስ ኢሚዛይ ባስ ዎፓ ዴሜስ።

²⁶ ጌማራ ካ ዳጋሲዛዴ ዴሬይ ቃንጌስ፤ ኬሲ ባይዚዛዴይ ጊዲኮ ኣንጄቴስ።

²⁷ ሎኦ ሚሽ ሚን ኮይዛዴ ሎኦ ሚሺ ናጌስ፤ ጊዶ ኣቲን ኢታ ሚሽ ኮይዛዴ ኢታ ሚሺ ጋኬስ።

²⁸ ባ ዱሬቴን ኣማኔቲዛ ኣሲ ኩንዳና፤ ጺሎቲ ጊዲኮ ሎኦ ሚ ማላ ጪሊላና።

²⁹ ሶ ኣሳ ቦላ ሺሮ ዴንዛ ኣሲ ጎኣይ ባይንዳ ኣታና፤ ኤያቲካ ኣ ኤራንቻታስ ኣይሌ ጊዳና።

³⁰ ጺሎ ኣሲ ዴኦ ኣይፌ ኣይፊዛ ሚ ማላ፤ ሼምፖታ ኣሺዛይ ኣ ኤራንቻ።

³¹ ጺሎቲ ሳኣን ባንታ ኦሶ ዋጋ ኤኪዛ ጊዲኮ፥ ኢታቲኔ ናጋራንቻቲ ባንታ ኦሶስ ኤካና ዋጋይ ዋኒ ዳራንዴሻ!