ሌሚሶ ማጻፋ 10 - ጋሞ ማጻፋ

ሶሎሞኔ ሌሚሶታ

¹ ሃይቲ ሶሎሞኔ ሌሚሶታ። ኣ ኤራቴ ዲዛ ናይ ባ ኣዋ ኡፋይሴስ፤ ጊዶ ኣቲን ኤያ ናይ ባ ኣዮ ጬጪሴስ።

² ቤሶንታ ኦጌራ ዪዳ ኣቆታይ ጎኤና፤ ጊዶ ኣቲን ጺሎቴ ሃይቆፔ ኣሼስ።

³ ጎዳይ ጺሎታ ጋፊሴና፤ ጊዶ ኣቲን ናጋራንቻታ ኣሞ ጫልቃሚሳና።

⁴ ኣዛላቴ ማንቂሴስ፤ ሚኒ ኦሶይ ጊዲኮ ዱሬሴስ።

⁵ ኣ ኤራንቻይ ካ ዎዴራ ሺሼስ፤ ካ ሺሺዛ ዎዴ ስኪዛ ኣሲ ጊዲኮ ካዉዬስ።

⁶ ጺሎ ኣሲ ኣንጄቴስ፤ ኢታ ኣሳ ዶና ማካላቴ ጎርዴስ።

⁷ ጺሎታ ሱንይ ኣንጆን ጼይጌቲሼ ዳና፤ ኢታታ ሱን ጊዲኮ ዶጌታና።

⁸ ኣ ኤራንቻይ ኣዛዞ ኤሮ ጊ ኤኬስ፤ ሎምኡሎምኢዛ ኤያቲ ጊዲኮ ባሻሶ ቤቴስ።

⁹ ሱሬ ኣሲ ሂርጋይ ባይንዳ ዴስ፤ ጌላ ኦጌ ቢዛ ኣሲ ጊዲኮ ባ ሞሮን ኦይኬታና።

¹⁰ ጌኔ ኦሶስ ቂምኦቲዛ ኣሲ ሜቶ ኤሄስ፤ ሎምኡሎምኢዛ ኤያይካ ሜቶ ኤሄስ።

¹¹ ጺሎታ ሃሳያይ ዴኦ ፑልቶ፤ ኢታታ ሃሳያይ ማካላቴ ጌንስ።

¹² ኢጾይ ፓላማ ዴንስ፤ ሲቆይ ጊዲኮ ባላ ኡባ ካሚ ኣስ።

¹³ ዎዚናማ ኣሳይ ኣ ኤራን ሃሳዬስ፤ ኤያ ዞኮን ጊዲኮ ጻምኣይ ሜቄስ።

¹⁴ ኣ ኤራንቻቲ ኤራቴ ዳጋሴቴስ፤ ኤያ ሃሳያይ ጊዲኮ ባሽ ጼይጌስ።

¹⁵ ዱሬታ ኣቆታይ ኢስታስ ጊምቤቲዳ ካታማ፤ ማንቆታ ማንቆቴ ኢስታስ ዮሶ።

¹⁶ ጺሎ ኣሳ ዳሞዛይ ዴኦ፤ ኢታ ኣሳታስ ዎይ ጊዲኮ ቂጻቴ።

¹⁷ ሴራ ኤኪዛ ኣሲ ዴኦ ኦጌን ሄሜቴስ፤ ሴራ ኢጺዛ ኣሲ ጊዲኮ ሜቶ ቦላ ዎስ።

¹⁸ ኢጺሼ ባ ኢጺዛይሳ ቆቲዛ ኣሲ ዎርዳንቻ፤ ዚጊርስ ዚጊርዛ ኣሲ ጊዲኮ ኤያ።

¹⁹ ዳሮ ሃሳያ ጊዶን ሞሮይ ዬና፤ ባ ዶና ሺሺ ኤኪዛ ኣሲ ጊዲኮ ኣ ኤራንቻ።

²⁰ ጺሎታ ሃሳያቲ ጌሻ ቢራ ማላ፤ ኢታ ኣሳ ቆፋስ ጊዲኮ ጎኣይ ዴና።

²¹ ጺሎታ ሃሳያይ ዳሮታ ጎኤስ፤ ኤያቲ ጊዲኮ ባ ዎዚና ፓጬን ሃይቄቴስ።

²² ጎዳ ኣንጆይ ዱሬ ኬሴስ፤ ኢዚ ሄ ዱሬቴን ሜቶ ጉጄና።

²³ ኤያ ኣሲ ኢታ ኦሶን ኡፋዬቴስ፤ ዎዚናማ ኣሲ ጊዲኮ ኣ ኤራቴን ኡፋዬቴስ።

²⁴ ኢታ ኣስ ሂርጊዛ ሚሽ ኢዛ ቦላ ጋካና፤ ጊዶ ኣቲን ጺሎ ኣሞይ ኢዛስ ፖሌታና።

²⁵ ጎቴ ጫርኮይ ዴንዲሺን ኢታቲ ፒቴቲ ያና፤ ጺሎቲ ጊዲኮ ሜርናስ ሚኒ ዳና።

²⁶ ጫላይ ኣች ዚልኢሲዛ ማላኔ ጩዋይ ኣይፌ ቆሂዛ ማላ ኣዛላ ኣሲ ኪቲዳዴንታስ ሄሳ ማላ።

²⁷ ጎዳስ ያሺ ላይ ኣዱሴስ፤ ኢታታ ባሬይ ጊዲኮ ቃን።

²⁸ ጺሎታ ሂዶታይ ኡፋይሳን ጋስ፤ ኢታታ ሂዶታይ ጊዲኮ ሃዳ ጊዲ ኣቴስ።

²⁹ ጎዳ ኦጌይ ጺሎታስ ባቃቲ ኣቲዛሶሆ፤ ኢታ ኦዛይታስ ጊዲኮ ባሻ ሶሆ።

³⁰ ጺሎቲ ሙሌካ ቃሌቴቴና፤ ኢታቲ ጊዲኮ ቢታ ቦላ ዴኤቴና።

³¹ ጺሎታ ዶናይ ኣ ኤራቴ ሃሳዬስ፤ ጌላታ ኢንጻርሲ ጊዲኮ ቃንጼታና።

³² ጺሎታ ሜቴርሻይ ቤሲዛ ዮኦ ሃሳዬስ፤ ኢታ ዶናይ ጊዲኮ ቦካ ዮቴስ።