ሌሚሶ ማጻፋ 1 - ጋሞ ማጻፋ

ሌሚሶታ ዎስቲ ጎኤታናኮ ቤሲዛ ኦጌ

¹ ሃይቲ ኢስራኤሌ ካዎ ዳዊቴ ና ሶሎሞኔ ሌሚሶታ።

² ሌሚሶቲ ኣሳይ ኣ ኤራቴ፥ ሴራኔ ኤራቴ ሃሳያ ኣኬካናስ ማዴቴስ።

³ ኢስቲካ ዴኣና ዴኦን ኣ ኤራቴ፥ ጺሎቴ፥ ሱሬ ፒርዳኔ ሱሬ ሃኖ ታማርሲዛይታ።

⁴ ኤራቴ ፓጪዳይታስ ኣኬካ፥ ናቴታስ ኤራቴኔ ዎዚናማቴ ኢሚዛይታ።

⁵ ኣ ኤራንቻቲ ሃ ሌሚሶታ ሲዪዲ ኤራቴ ጉጄቴስ፤ ኣኬካንቻ ኣሳቲካ ሎኦ ዞሬታ ኤኬቴስ።

⁶ ሄሳ ማላን ሌሚሶታኔ ኢስታ ቢርሼታ፥ ኣ ኤራንቻታ ሃሳያኔ ኢስታ ማሌ ኣኬካናስ ዳንዳዬቴስ።

⁷ ኣ ኤራቴስ ኮይሮይ ጎዳስ ያሻቴ፤ ኤያቲ ጊዲኮ ኣ ኤራቴኔ ሴራ ካቴስ።

ዬላጋ ናይታስ ኢሜቲዳ ዞሬ

⁸ ታ ናዞ! ኔ ኣዋ ዞሬ ኤዝጋ፤ ኔ ኣያ ታማርሲዛይሳካ ኣጎፋ።

⁹ ሄሲ ኔ ሁኤስ ቦንቾ ካላቻ፤ ኔስ ቆን ኣዛ ኣሌቆ ማላ ጊዳና።

¹⁰ ታ ናዞ! ኔና ናጋራንቻቲ ባሌኮ ኤኖ ጎፓ።

¹¹ ኢስቲ ኔና፥ «ኣኔ ሃያ፤ ኢሲፌ ቢዲ ሱ ጉሳናስ ዙጎስ፤ ጺሎታካ ዎናስ ቆቴቲ ኡቶስ።

¹² ዱፎይ ሚቲዛ ማላ ኑኒካ ኣኔ ኢስታ ፓጻ ዲሺን ሚቶስ፤ ኑኒ ኢስታ ጪማ ኦላን ኦሌቲዛ ኣሳ ማላ ኣኔ ኦስ።

¹³ ኑኒ ኣልኦ ሚሽ ኡባ ዴማና፤ ሂስቲዲ ኑ ኬ ቦንቂ ኤኪዳ ሚሻን ኩንና።

¹⁴ ኑናራ ዙፔታ፤ ዴሚዳዝ ኢሲፌ ጎኤታና» ጋና።

¹⁵ ታ ናዞ! ኢስታራ ኢሲፌ ኦጌ ሄሜቶፋ፤ ኢስቲ ቢዛ ኦጌ ባና ጋዳ ኔ ቶሆ ዴንፋ።

¹⁶ ጋሶይካ ኢስቲ ኢታ ሚሽ ኦናስ ዎጼቴስ፤ ኣሳ ሱ ጉሳናስካ ጃሜቴስ።

¹⁷ ካፎይ ጼሊሺን ኢዛ ኦይካናስ ያርዴ ዎኮ ኣይኮካ ማዴና።

¹⁸ ሃይቲ ሃ ኣሳቲ ባንታ ሱ ጉሳናስ ዙጌቴስ፤ ባንታ ሼምፖ ዎናስ ቆቴቲ ኡቴቴስ።

¹⁹ ቤሶንታ ኦጌራ ጎኣ ዴማናስ ዎጺዛ ኡባታ ዉርሴይ ሃይሳ ማላ፤ ኢስቲ ሺሺዳ ኣቆታይ ኢስታ ሼምፖ ኤኪ ባና።

ኣ ኤራቴ ካዛይታስ ኢሜቲዳ ሴራ

²⁰ ኣ ኤራቴያ ኦጌ ቦላ ዴኣሼ ጼይጋዉስ፤ ዱቡሻን ባ ቃላ ቁ ሂስታዳ ዋሳዉስ።

²¹ ኣ ኤራቴያ ጮራ ኣሲ ሺቂዛሶን ዋሳዉስ፤ ካታማ ጌሊዛ ፔንጌን ኤቃዳ፥

²² «ኢንቴኖ ዎዚና ፓጬቶ! ኢንቴ ኣዉዴ ጋካናስ ኤያቴ ኦጌ ካላኔ? ቂልጪዛይቶ! ኢንቴ ቂልጪዛይሳን ኣዉዴ ጋካናስ ኡፋዬቴቲ? ኤያቶ! ኤራቴ ኣዉዴ ጋካናስ ኢጻኔ?

²³ ታ ሴራን ኢንቴ ሲሚዳኮ፥ ታኒ ታ ቆፋ ኢንቴስ ቆንጪሳናኮሺን፤ ታ ቃላካ ኢንቴና ታማርሳናኮሺን።

²⁴ ታኒ ጼይጊዳ ዎዴ ኢንቴ ኮዮንታ ኢጺዴታ፤ ታኒ ታ ኩሼዛ ሚጪን ኦኒካ ዉዱ ጊቤና።

²⁵ ታ ዞሬ ኡባ ካዴታ፤ ታ ሴራካ ኤኪቤኬታ።

²⁶ ሄሳ ጊሻስ ኢንቴና ሜቶይ ጋኪዛ ዎዴ ታኒ ኢንቴ ቦላ ሚጫና፤ ባሺ ኢንቴ ቦላ ጋኪዛ ዎዴ ታኒ ኢንቴ ቦላ ቂልጫና።

²⁷ ባሺ ኣባ ዳምባላ ማላ ኢንቴና ቃዛ ዎዴ፥ ሜቶይ ጎቴ ጫርኮ ማላ ኢንቴና ዴንዛ ዎዴ፥ ቱጋይኔ ዋዬይ ኢንቴና ሚቲዛ ዎዴ ታኒ ኢንቴና ቂልጫና።

²⁸ «ሄ ዎዴ ኢስቲ ታና ጼይጋና፤ ታ ጊዲኮ ኢስታስ ኮይኬ፤ ኢስቲ ታና ሚን ኮያና፤ ጊዶ ኣቲን ታና ዴሜቴና።

²⁹ ኢስቲ ኤራቴ ኢጺዳ፤ ጎዳስ ያሻቴ ዶሪቤቴና።

³⁰ ታ ዞሬ ኤካናስ ኮዪቤቴና፤ ታ ሴራ ኡባ ካዳ።

³¹ ሄሳ ጊሻስ ኢስቲ ባንቲ ኦዳ ኦሶ ኣይፌዛ ማና፤ ባንቲ ቆፒዳ ቆፋ ኣይፌካ ካላና።

³² ዎዚናይ ፓጪዳይታ ኣ ኤራቴፌ ሃኮይ ኢስታ ዎና፤ ባላታ ዉዳ ዮይ ኢስታ ይሳና።

³³ ጊዶ ኣቲን ታና ሲዪዛይቲ ኡባይ ሳሮን ዳና፤ ኣይኮ ሂርጋይ ባይንዳ ዎፓን ዳና» ጋዉስ።