ታይቦ ማጻፋ 23 - ጋሞ ማጻፋ

ባላሜይ ዮቲዳ ኮይሮ ቲንቢቴ

¹ ባላሜይ ባላቄ፥ «ኔ ታስ ሃይሳን ላፑን ያርሾ ያርሻናሶታ ኦ፤ ቃሴካ ላፑን ኮርማ ቦራታኔ ላፑን ዶርሳ ርሾታ ታስ ሃ ኤካ ያ» ጊዴስ።

² ባላቄይ ባላሜይ ኢዛስ ዮቲዳ ማላ ኦዴስ፤ ኢስቲ ናምኣይ ያርሾ ያርሺዛሶሆታ ቦላ ኢሲ ኢሲ ኮርማ ቦራኔ ኢሲ ኢሲ ርሾ ያርሾ ሺሺዳ።

³ ሄሳፌ ጉዬ ባላሜይ ባላቄስ፥ «ጾሲ ሃ ታኮ ያናኮኔ ዮንታኮ ታኒ ጌዴ ባዳ ኤራና ጋካናስ ኔኒ ሃይሳን ጹጌቲዛ ያርሾዛ ኣቻን ኤቃሻ፤ ጎዳይ ታስ ቆንጪሲኮ ሄሳ ታ ኔስ ዉርሳ ዮታና» ጊዴስ፤ ሄሳፌ ጉዬ ባላሜይ ባርካ ፑዴ ቃሶ ኬዚዴስ።

⁴ ሄን ጾሲ ኢዛራ ጋይቲዴስ፤ ባላሜይካ፥ «ታኒ ላፑን ያርሾ ያርሺዛሶሆታ ጊጊሳዲስ፤ ያርሾ ያርሺዛሶሆታ ኢሳ ኢሳ ቦላ ኢሲ ኢሲ ኮርማ ቦራኔ ኢሲ ኢሲ ርሾ ያርሻዲስ» ጊዴስ።

⁵ ጎዳይካ ባላሜይ ባላቄስ ዮታናስ ቤሲዛ ኪታ ኢዛስ ዮቲዳፔ ጉዬ ባላቄኮ ሲሚ ባና ማላ ዮቲዴስ።

⁶ ኢዚካ ጉዬ ሲሚ ቢሺን ባላቄይ ሞኣቤ ኣይሲዛ ዳናታ ኡባራ ኢሲፌ ሄ ጹጌቲዛ ያርሾዛ ኣቻን ኤቂዳ ማላ ዴሚዴስ።

⁷ ሄሳፌ ጉዬ ባላሜይ ሃሳያ ዶሚዲ፥ «ሞኣቤ ካዎ ባላቄይ ኣርሼይ ሞኪዛ ባጋራ ዲዛ ዙማቲ ዲዛ ኣራሜፔ ታና ጼይጊ ኤሂዴስ፤ ኢዚ ታና፥ ‹ሃ ያዳ ኢስራኤሌ ኣሳ ታስ ዶቃርኪ! ኢስቲ ያና ማላ ታስ ኢስታ ቃንጋርኪ!› ጊዴስ።

⁸ ሂስቲን ታኒ ጾሲ ቃንጎንታዴ ዎስታ ቃንጎ? ጾሲ ሂሎንታዴ ታኒ ዎስታ ሂሎ?

⁹ ታኒ ኢስታ ሃይታ ጊታ ዛላታ ቦላ ዳሼ ዴማይስ፤ ቃ ዙማታ ቦላ ዳሼ ታ ኢስታ ጼላይስ፤ ኢስቲ ባርካ ዲዛ ካዎቴ፤ ኢስቲ ባና ሃራ ካዎቴራ ጋ ቆዶንታይሲ ታስ ቤቴስ።

¹⁰ ጉዱላ ማላ ጮሪዳ ያቆቤ ዜሬ ቆዲ ዳንዳያናይ ኦኔ? ዎይኮ ኢስራኤሌስ ጪጎዛካ ቆዲ ካንናይ ኦኔ? ጺሎ ኣሳታ ሃይቆ ታ ሃይቃና፤ ታ ዉርሴይካ ኢስታ ዉርሴ ማላ ጊዶ» ጊዴስ።

¹¹ ባላቄይ ባላሜስ፥ «ሃይሲ ኔ ታ ቦላ ኦዳይሲ ኣዜ? ታኒ ኔና ሃ ኤሂዳይ ኔ ታ ሞርኬታ ቃንጋናሳ፤ ኔኒ ጊዲኮ ኢስታ ኣንጆ ኣንጃዳሳ ኣቲን ቃንጋቤካ» ጊዴስ።

¹² ባላሜይካ ዛሪዲ፥ «ጎዳይ ታስ ቆንጪሲዳይሳ ጻላ ታ ዮታናስ ቤሴኔ?» ጊዴስ።

ባላሜይ ዮቲዳ ናምኣን ቲንቢቴ

¹³ ባላቄይ ባላሜስ፥ «ኢስራኤሌ ኣሳ ኩሜ ጊዶንታ ኢስታፌ ጉቲ ኔስ ቤቲዛሶ ጌዴ ሃራሶ ታናራ ኢሲፌ ባዳ ኔ ኢስታ ሄን ታስ ቃንጋርኪ!» ጊዴስ።

¹⁴ ሄሳፌካ ፑዴ ፒዝጋ ዙማ ሁኤን ዲዛ ጾፊሜ ዴምባ ኤፊዴስ፤ ሄንካ ላፑን ያርሾ ያርሺዛሶ ጊግሲዲ ኢሲ ኢሲ ያርሺዛሶዛ ቦላ ኢሲ ኢሲ ኮርማ ቦራኔ ርሾ ያርሺዴስ።

¹⁵ ባላሜይ ባላቄስ፥ «ኔኒ ሃይሳ ጹጌቲዛ ያርሾዛ ማታን ኤቃሻ፤ ታኒ ጎዳራ ጋይታና ጌዴ ባይስ» ጊዴስ።

¹⁶ ጎዳይካ ባላሜራ ሄን ጋይቲዴስ፤ ኢዚ ዮታና ኪታ ኢዛስ ዮቲዲ ኔኒ ባላቄኮ ሲማ ባዳ ሃይሳ ሃ ኪታ ኢዛስ ዮታ።

¹⁷ ኢዚ ሲሚ ቢሺን ባላቄይ ሞኣቤ ዴሬዛ ካሌዛይታራ ሄ ጹጌቲዛ ያርሾዛ ማታን ኤቂዳ ማላ ዴሚዴስ፤ ባላቄይካ ጎዳይ ኢዛስ ኣይ ዮቲዳኮ ኢዛ ኦይቺዴስ።

¹⁸ ባላሜይካ ኢዛስ ሃሳያ ዶሚሼ፥ «ጺፖራ ና ባላቄ! ሃ ሺቃ! ታኒ ኔስ ዮቲዛይሳ ሲያ።

¹⁹ ጾሲ ኣሳ ማላ ዎርዶቴና፤ ኢዛ ቆፋይ ኣሳ ቆፋ ማላ ላሜቴና፤ ኢዚ ባ ኢሚዳ ሂዶታ ኡባ ፖሌስ፤ ኢዚ ባ ዮቲዳ ኡባ ኦስ።

²⁰ ኢዚ ታስ ታ ኣንጃና ማላ ዮቲዴስ፤ ጾሲ ኣንጂዳ ቃላ ታኒ ላማናስ ዳንዳይኬ።

²¹ ያቆቤ ዜሬ ቦላ ሜቶይ ጋኬና፤ ኢስራኤሌ ኣሳ ቦላካ ዋዬይ ጋኮንታይሲ ታስ ቤቴስ፤ ጎዳይ ኢስታራ ዴስ፤ ጾሲ ካዎ ጊዲዳይሳ ኢስቲ ቆንጬን ዮቴቴስ።

²² ጾሲ ኢስታ ጊብጼፔ ኬሲዴስ፤ ኢዚ ኢስታስ ሜን ማላ ቃይጫና።

²³ ያቆቤ ናይታ ቦላ ኣይ ቢታይ፥ ኢስራኤሌ ቦላ ኣይ ሙሬኖይካ ኦና፤ ሄኮ ሃኢ ያቆቤሲኔ ኢስራኤሌስ፥ ‹ጾሲ ኢስቲ ኣይ ኦዳኮ ኣኔ ጼሊቴ!› ጌቴታና።

²⁴ ኢስራኤሌ ኣሳይ ማጫ ጋሞ ማላ ዴንዳና፤ ባ ሻንካቲ ኤሂዳይሳ ሞንታ፥ ሱካ ኡዮንታ ዲሼ ሼምፖንታ ጋሞ ማላ ዴንዳና» ጊ ዮቲዴስ።

²⁵ ሄሳፌ ጉዬ ባላቄይ ባላሜስ፥ «ኔኒ ኢስራኤሌ ኣሳ ቃንጎንታ ኢጺዳ ማላ ኢስታ ኣንጆካ ኣንጆፋ!» ጊዴስ።

²⁶ ባላሜይካ፥ «ታኒ ካሴ ኔስ ጎዳይ ታስ ዮቶሮ ጻላ ታ ኦና ጋዳ ዮታቤኪና?» ጊዴስ።

ባላሜይ ዮቲዳ ሄን ቲንቢቴ

²⁷ ባላቄይካ፥ «ሃ ያ ኣኔ ሃይሳፌ ሃራሶ ቦስ፤ ኦኔ ኤሪዛይ ኔኒ ሄን ዳዳ ሃይሳ ዴሬዛ ታስ ቃንጋና ማላ ጾሲ ኔስ ኤሮ ጎንታ ኣጌና» ጊዴስ።

²⁸ ሄሳ ጊሻስ ባላቄይ ባላሜ ጌዴ ባዞ ጊናራ ዲዛ ፔኦሬ ዙማ ሁኤ ኤኪ ኬዚዴስ።

²⁹ ባላሜይካ ኢዛ፥ «ሃይሳን ታስ ላፑን ያርሾ ያርሺዛሶ ጊጊሳ፤ ላፑን ኮርማ ቦራታኔ ላፑን ርሾታ ሃ ታስ ኤካ ያ» ጊዴስ።

³⁰ ባላቄይካ ባላሜይ ኢዛስ ዮቲዳ ማላ ኦዴስ፤ ያርሾ ያርሺዛሶዛ ቦላ ኢሲ ኢሲ ኮርማ ቦራኔ ኢሲ ኢሲ ርሾ ያርሾ ሺሺዴስ።