ታይቦ ማጻፋ 1 - ጋሞ ማጻፋ

ኢስራኤሌ ኣሳስ ኮይሮ ቆዴቴ

¹ ኢስራኤሌ ኣሳይ ጊብጼፔ ኬዚዳ ናምኣን ላይን ናምኣን ኣጊናይ ዶሚዳ ኮይሮ ጋላስ ኢስቲ ሲና ባዞን ዲሺን ጎዳይ ጋይቶቴ ዱንካኔ ጊዶን ሙሴራ ጋይቲዲ፥

² «ኣቱማሳ ኢሳ ኢሳ ሱንን ሱንን ጻፋዳ ኢስራኤሌ ኣሳ ቆሞን ቆሞኒኔ ዛርኬን ዛርኬን ቆዳ።

³ ኔኒኔ ኣሮኔይ ኢስታስ ላይይ ናምኡ ታሙኔ ኢዛፔ ቦላራ ዲዛ ኦሌቲ ዳንዳያና ኣቱማሳታ ኢስታ ማራን ማራን ቆዲቴ።

⁴ ዱማ ዱማ ዛርኬታፔ ኢስታ ካሌዛ ኢስታስ ኣዋቲዛ ኮራፒኔቲ ኢንቴናራ ጊዴቶ።

⁵ ኢንቴና ማዳናይታ ሱን ሃይሳፌ ካሊ ዲዛይታ፥ ኦሮቤሌ ዛርኬፌ ሻዱሬ ና ኤልጹሬ፥

⁶ ሲሞና ዛርኬፌ ጹርሻዳዬ ና ሳሉምኤሌ፥

⁷ ዩሁዳ ዛርኬፌ ኣሚናዳቤ ና ኔኣሶኔ፥

⁸ ዪሳኮሬ ዛርኬፌ ጹኣሬ ና ናቲናኤሌ፥

⁹ ዛቢሎኔ ዛርኬፌ ሄሎኔ ና ኤልያቤ፥

¹⁰ ዮሴፌ ናይታፔ ኤፍሬሜ ቆሞቲ ኣሚሁዴ ና ኤልሻማ ሚናሴ ናይታፔ ፔዳጹሬ ና ጋማልኤሌ፥

¹¹ ቢኒያሜ ዛርኬፌ ጊዲኦኔ ና ኣቢዳኔ፥

¹² ዳኔ ዛርኬፌ ኣሚሻዳዬ ና ኣሂኤዜሬ፥

¹³ ኣሴሬ ዛርኬፌ ኦክራ ና ፋጉኤሌ፥

¹⁴ ጋዴ ዛርኬፌ ዳኡኤሌ ና ኤልያሳፌ፥

¹⁵ ኒፍታሌሜ ዛርኬፌ ኤናኔ ና ኣሂሬ» ጊ ዮቲዴስ።

¹⁶ ማባራ ጋርሳፌ ዛርኬፌ ዛርኬፌ ኢስራኤሌ ኣሳ ካሌናስ ዶሬቲዳ ኮራፒኔቲ ሃይታንታ።

¹⁷ ሙሴይኔ ኣሮኔይ ሃይታ ባንታ ሱንን ጻፌቲዳይታ ኤኪዳ።

¹⁸ ናምኣን ኣጊናይ ዶሚዳ ኮይሮ ጋላስ ማባራዛ ኩሜ ኢሲ ቦላ ሺሺዲ ዛርኬን ዛርኬኒኔ ዳቦን ዳቦን ሺሺዳፔ ጉዬ ዴሬዛ ቆዲዳ፤ ዬሌቲን ላይይ ናምኡ ታሙ ኩሚዳይታኔ ሄሳፌካ ቦላራ ጊዲዳ ኣቱማሳ ኢስታ ሱንን ሱንን ማዝጋቢ ቆዲዳ።

¹⁹ ሄሳካ ሙሴይ ጎዳይ ኣዛዚዳ ማላ ሲና ባዞን ዴሬዛ ቆዲዴስ።

²⁰ ኦላ ኦሌታናስ ዳንዳይዛይታ ላይይ ናምኡ ታማኔ ሄሳፌካ ቦላራ ዲዛይቲ ባንታ ዛርኬፌ ዛርኬፌ ቆዴቲዳ፤ ኣዴታ ቆዳይ ሃይሳፌ ካሊዛይሳ፤

²¹ ኦሮቤሌ ዛርኬፌ 46,500፥

^22-23 ሲሞና ዛርኬፌ 59,300፥

^24-25 ጋዴ ዛርኬፌ 45,650፥

^26-27 ዩሁዳ ዛርኬፌ 74,600፥

^28-29 ዪሳኮሬ ዛርኬፌ 54,400፥

^30-31 ዛቢሎኔ ዛርኬፌ 57,400፥

^32-33 ዮሴፌ ና ኤፍሬሜ ዛርኬፌ 40,500፥

^34-35 ዮሴፌ ና ሚናሴ ዛርኬፌ 32,200፥

^36-37 ቢኒያሜ ዛርኬፌ 35,400፥

^38-39 ዳኔ ዛርኬፌ 62,700፥

^40-41 ኣሴሬ ዛርኬፌ 41,500፥

^42-43 ኒፍታሌሜ ዛርኬፌ 53,400።

⁴⁴ ሙሴይ፥ ኣሮኔይኔ ታማኔ ናምኡ ኢስራኤሌ ዛርኬታ ኮራፒኔቲ ቆዲዳ ኣቱማ ኣሳይ ሃይታንታ፤

⁴⁵ ኦላስ ባና ዳንዳይዛ ኣዴቲ ኡባይ ኢስታስ ላይይ ናምኡ ታማኔ ሄሳፌካ ቦላራ ዲዛይቲ ባ ዛርኬን ዛርኬን ቆዴቲዳ።

⁴⁶ ሄይታ ቆዳይ ኢሲ ቦላ 603,550 ጊዲዴስ።

⁴⁷ ጊዶ ኣቲን ሃንኮ ዛርኬታራ ሌዌ ዛርኬቲ ቆዴቲቤቴና።

⁴⁸ ካሴ ጎዳይ ሙሴስ፥

⁴⁹ «ኔ ኢስራኤሌ ኣቱማ ኣሳ ቆዳሼ ሌዌ ዛርኬታ ኢስታራ ጋ ቆዶፓ።

⁵⁰ ሌዌ ዛርኬቲ ጊዲኮ ጋይቶቴ ዱንካኔኔ ኢዛ ጊዶን ጎኤቲዛ ሚሻ ቦላ ኣላፌቴ ኢማ፤ ኢስቲ ዱንካኔዛኔ ኢዛ ጊዶን ጎኤቲዛ ሚሻታ ኡባ ቶኬቶ፤ ዱንካና ጊዶን ኦቶ፤ ኢዛ ዩሾን ዱንካኒ ኡቴቶ።

⁵¹ ኢንቴ ካሴ ዱንካኒ ዲዛሶፔ ዴንዲ ቢዛ ዎዴ ሌዌ ዛርኬቲ ጻላላ ዱንካኔዛ ሾዲ ላሊዲ ኢስቲ ሼምፒዛ ኦራሶን ኢስታካ ቶኬቶ፤ ኢስታፌ ኣቲን ዱንካናኮ ሺቂዛ ኣይ ኣሲካ ሃይቆን ቃጻዬቶ።

⁵² ሃንኮ ኣቲዳ ኢስራኤሌ ኣሳይ ባ ቡቴን ቡቴኒኔ ባ ዲዛ ጉታን ጉታን ባ ባንዲራ ባንዲራ ቶኬቶ።

⁵³ ጊዶ ኣቲን ኣይ ኣሲካ ዱንካናኮ ሺቂዲ ታና ሃንቄዲ ኢስራኤሌ ዴራ ይሲሶንታ ማላ ሌዌ ዛርኬቲ ሄ ዱንካኔዛ ዩሾን ዱንካኒዲ ናጌቶ» ጊዴስ።

⁵⁴ ሄሳ ጊሻስ ኢስራኤሌ ኣሳይ ጎዳይ ሙሴ ኣዛዚዳ ማላ ኡባካ ኦዳ።