ናሆሜ ቲንቢቴ 3 - ጋሞ ማጻፋ

ናናዌስ ኣዬ ኣና

¹ ሱ ካታማይስ ኣዬ ኣና፤ ዎርዶይኔ ቦንቃይ ኢዚን ኩሚዴስ፤ ኢዚፔ ቆጪሬቲ ሺቂዳይሲ ኤፊንካ ዉሬና።

² ጹርቃፌ ጊሪሲ፥ ኢሪዞ ጬንጉርሲ፥ ፒላታ ፓራ ኣዳራሶይ፥ ፓራ-ጋሬታ ጊሪሲ ሲዬቲዴስ።

³ ቶጋንቻይ ቶጌስ፤ ማሻይ ፖፖልኡ ጌስ፤ ቶራይ ጾልቄቴስ፤ ዳሮይ ሃይቂዴስ፤ ኣሃይ ኣሃ ቦላ ኮሬቲዴስ፤ ኢዛስ ቆዳይካ ዴና፤ ኣ ቢዛሶይካ ቤቲቤና።

⁴ ሃይሲ ኡባይ ሃኒዳይ ቡቴ ኣዳ ኣስ ባሌዛኔ ሙሬኒዛ ላይማይ ጋሶና። ኢዛ ባ ላይማቴን ካዎቴ፥ ማሮቴን ዴሬዛ ኣይሌሲዳሮ።

⁵ ኡባፌ ዎልቃማ ጎዳይ፥ «ሃኔ ታኒ ኔ ቦላ ሞርኬቴን ዴንዳዲስ፤ ታኒ ኔ ቃሚሳ ቃራ ኔ ኣይፌሶ ካማና፤ ኔ ካሎቴ ዴራስ፥ ዬላቴ ካዎቴታስ ታ ቤሳና።

⁶ ታኒ ኔ ቦላ ቡራ ኦላና፤ ታ ኔና ካና፤ ቂስካ ኣ ኢማና።

⁷ ኔና ቤኢዛይቲ ኔፔ ባቃቲሼ፥ ‹ናናዌይ ላሌታዱስ፤ ኢዚስ ዬካናይ ኦኔ?› ጋና። ኔና ሚንናዴ ታ ኣዋፔ ዴማኔ?» ጊዴስ።

⁸ ኔኒ ኣባዬ ሻፋ ኣቻን ዲዛ፥ ሃን ዶዴታ ዲዛ ኖኤ ኣሞኔፔ ጎባይ? ሻፋዚ ኢዚስ ቴቄ ሃዚካ ኢዚስ ጊምቤ።

⁹ ቶጵያይኔ ጊብጼይ ኢዚስ ዛዋይ ባይንዳ ዎልቃ፤ ፑጼይኔ ሊቢያይ ኢዞ ማዲዛይታ፤

¹⁰ ጊዶ ኣቲን ኢዛ ዲኤታዱስ፤ ጎዴታ ባዱስ፤ ኢዚ ናይቲ ኦጌታ ቲጻ ቦላ ዲንጬቲዳ፤ ኢዚ ዳናታ ቦላ ሳማይ ዎዴስ፤ ኢዚ ጊታ ኣሳቲ ኡባይ ሳንሳላታን ቃሼቲዳ።

¹¹ ኔኒካ ቃሴ ማታናኔ ቆቴታና፤ ሞርኬታፔ ኣቲዛሶ ኔ ኮያና።

¹² ኔ ሚጻቲ ኡባይ ሙሳስ ጋኪዳ ባላሴ ሚስ ኮይሮ ኣይፌ ማላ፤ ኢስቲ ቃጺዛ ዎዴ ኢስታ ኣይፌቲ ሚዛዴ ዶናን ዎቴስ።

¹³ ሄኮ ኔ ኦላ ኣሳይ ዉሪካ ማጫ ጻላ! ኔ ዛዋቲ ኔ ሞርኬታስ ዋጊ ጊ ዶዬቲዳ፤ ኢስታ ኮላታታካ ታማይ ሚዴስ።

¹⁴ ኔና ጊዶዛ ዎዴስ ሃ ዱቃ፤ ኔስ ቴቄ ሚን ጊጊሳ፤ ማና ኡርቃ ኮያ፤ ኡርቃ ዬዳ ጹቤ ኦ።

¹⁵ ኔና ሄን ታማይ ማና፤ ማሻይካ ኔና ቃንጻና፤ ጉምባሮይ ሚዛ ማላ ኔና ጋርጫና፤ ጉምባሮ ማላ ዬሌታ፤ ቦሌ ማላ ዳራ።

¹⁶ ኔ ዛልኣንቻታ ሳሎ ጾሊንቴፔካ ዳርሳዳሳ። ኢስቲ ጊዲኮ ቢታዮ ቦሌ ማላ ፒቲ ሚዲ ፒራ ቢዳ።

¹⁷ ኔና ናጊዛይቲ ቦሌ ማላ፤ ኔ ጊታ ኣሳቲ ሜጎ ጋላስ ጊምቤ ጋርሳን ኡቲዛ ጉምባሮ ማላ። ኢስቲ ኣርሼይ ኬዚሺን ፒራቴስ፤ ኢስቲ ፒራ ቢዛሶይ ኣዋኮ ኤሬቴና።

¹⁸ ኣሶሬ ካዎ፥ ኔ ሄንንቻቲ ስኪዳ፤ ኔ ጊታ ኣሳቲ ዎፑ ጊ ኢቺዳ፤ ኔ ዴሬይ ሺሺዛይ ዪን ዙማ ቦላ ላሌቲዴስ።

¹⁹ ኔ ማዱን ፓና ዳንዳይዛይ ዴና፤ ኔኒ ሃይቆስ ጋዛ ሜቆ ሜቃዳሳ፤ ኔ ጊሻስ ሲዪዳ ኡባይ ኔ ኩንዴን ኡፋዬቲ ኩሼ ባቃና፤ ዛዋይ ባይንዳ ኔ ሜንጼ ኢታቴ ቦቾንታይ ኦኔ?