ናሆሜ ቲንቢቴ 2 - ጋሞ ማጻፋ

ናናዌ ኩንዴ

¹ ሃኔ ናናዌ! ኔና ቆሃናይ ኔ ቦላ ዪዴስ፤ ኔ ሚጻ ናጋ፤ ኔ ኦጌ ጾሞሳ፤ ሚን ጊጻ፤ ኔ ዎልቃ ኡባ ሚን።

² ይሲዛይቲ ኢስታ ሜላ ኣሺኮካ፥ ኢስቲ ዎይኔ ኣታኪልቴ ቶኪዛሶሆ ሙሌራ ይሲኮካ ኢስራኤሌ ቦንቾ ኡባ ማላ ጎዳይ ያቆቤ ቦንቾካ ዛራና።

³ ኢዛ ዎታዳራታ ጎንዳሌይ ዞኦ፤ ኢዛ ኦላንቻቲካ ዞኦ ማይኦ ማይኢዳ፤ ኢስቲ ኦሌታናስ ጊጌቲዳ ጋላስ ኢስታ ፓራ-ጋሬታ ቢራታይ ጾልቄስ፤ ኢስታ ቶራ ቶማይ ሉጼስ።

⁴ ፓራ-ጋሬቲ ዴምባን ያኔ ሃ ቡራቄቴስ፤ ኦጌታ ቦላካ ሾምኡሾምኡ ጌቴስ፤ ላጪዛ ጾምፔ ሚሳቴቴስ፤ ዎልቃን ማላ ዋዋጪ ጌቴስ።

⁵ ዶሬቲዳ ኦላንቻታ ጼይጌስ፤ ጊዶ ኣቲን ኢስቲ ዪሼ ኦጌን ጴቴቴስ፤ ካታማ ጊምቤኮ ዎጼቴስ፤ ኦላ ቴቂዛ ጎንዳሌይካ ሄን ዴስ።

⁶ ሻፋ ፔንጌይ ዋጊ ጊ ዶዬቲዴስ፤ ካዎቴ ኬ ኩንዲዴስ።

⁷ ናናዌይ ካዉዪን ኢዚ ካዎያ ዲኤታዳ ቡሲ ኣቶንታይሲ ካሴቲ ዮቴቲዴስ። ኢዚ ማጫ ኣይሌቲ ሃራጴ ማላ ዬካና፤ ባንታ ቲራካ ኢጫና።

⁸ ናናዌይ ኤሌ ሃ ማላ፤ ኢዚ ሃካ ሚጫና። «ኤቃ! ኤቃ!» ጊ ኢስቲ ዋሳና፤ ጊዶ ኣቲን ጉዬ ሲሚዛይ ዴና።

⁹ ኢዛ ሚንጃ ኬን ዳጋቲዳ ኣቆታስ ቆዳይ ዴና፤ ቢዲ ቢራካ፥ ዎርቃካ ቦንቂ ኤኪቴ።

¹⁰ ቆጪሬታዱስ፤ ቦንቄታዱስ፤ ካሎታዱስ፤ ዎዚናይ ታሂዴስ፤ ጉልባቴይ ኮኮሪዴስ፤ ኣሾይ ቃጺዴስ፤ ኣይፌሶይካ ጊልቂዴስ።

¹¹ ጋሞቲ ካሴ ዴኢዛ ጎንጎሎይ፥ ኢስታ ማራቲ ሚዛሶይ፥ ማጫ ጋሞይኔ ኣዴ ጋሞይ ቢዛሶሆይ፥ ኢስታ ማራቲ ሂርጋይ ባይንዳ ሚዛሶይ ሃኢ ኣዋን ዲዜ?

¹² ጋሞይ ባ ማራታስ ጊዳናይሳ ኬና ዎዴስ፤ ማጫሳታስካ ጩሊ ዎዴስ፤ ባ ዎዳይሳ ባ ሼምፒዛሶን፥ ባ ቦንቂ ሺሺዳይሳ ባ ጎንጎሎ ኩንዴስ።

¹³ ኡባፌ ዎልቃማ ጎዳይ፥ «ታ ኢንቴ ቦላ ዴንዳዲስ፤ ኢንቴ ፓራ-ጋሬታካ ጹጋና፤ ኢንቴ ጋሞ ማራታ ማሻይ ማና፤ ኢንቴስ ማና ሚሺካ ቢታ ቦላ ኣሽኬ፤ ኢንቴ ኪቲዛይታ ጬንጉርሲ ሃይሳፌ ጉዬ ሴቴቴና» ጊ ኣዋጄስ።