ናሆሜ ቲንቢቴ 1 - ጋሞ ማጻፋ

¹ ኤልቆሼ ዴሬ ኣስ ናሆሜይ ናናዌ ዮ ጊሻስ ዮቲዳ ኣጁታ ማጻፋይ ሃይሳፌ ካሊዛይሳ።

ናናዌ ቦላ ቆንጪዳ ጾሳ ሃንቆ

² ጎዳይ ዚልኤቲዛኔ ሃሎ ኬሲዛ ጾሳ፤ ጎዳይ ሃሎ ኬሲዛኔ ሃንቆን ኩሚዳ ጾሳ። ጎዳይ ሃሎ ኬሲዛዴኔ ፓላ ሚሺ ኢዛን ኩሚዳዴ። ጎዳይ ባ ባልጋራታ ቦላ ሃሎ ኬሴስ፤ ባ ሞርኬታ ቦላ ባ ሃንቆ ኤሄስ።

³ ጎዳይ ሃንቄታናስ ኤሶቴና፤ ኢዛ ዎልቃይካ ጊታ። ጎዳይ ሞራንቻ ቃጻዮንታ ኣጌና፤ ጎቴ ጫርኮይኔ ኣባ ዳምባላይ ኢዛስ ኦጌ፤ ሻራይ ኢዛ ቶሆ ጉዱላ።

⁴ ኣባ ሴሪዲ ሜሊሴስ፤ ሻፋታ ኡባ ሚጪንቼስ። ባሳኔይኔ ቃርሜሎሴይ ሹሊዳ። ሊባኖሴ ጪሻቲካ ቆቆፌቲዳ።

⁵ ዙማቲ ኢዛ ሲንን ኮኮሪዳ፤ ዙምቡላቲካ ሴሪዳ። ኢዛ ሲንን ቢታይ፥ ኣላሜይኔ ኢዚን ዲዛ ኡባቲ ቃጺዳ።

⁶ ኢዛ ሃንቆራ ኤቄታና ዳንዳይዛይ ኦኔ? ኢዛ ሃንቆ ሚኖዛ ቶካና ዳንዳይዛይ ኦኔ? ኢዛ ሃንቆይ ታማ ማላ ኤጺዴስ፤ ዛላቲካ ኢዛ ሲንፌ ዛኢዳ።

⁷ ጎዳይ ሎኦ፤ ሜቶ ጋላሲካ ቆቴቲ ኣቲዛሶ። ኢዛን ኣማኔቲዛይታ ናጌስ።

⁸ ጊዶ ኣቲን ኢዚ ናናዌ ዎልቃማ ዲኦ ሃን ይሳና፤ ባ ሞርኬታ ማይ ዲዛሶ ዬዴና።

⁹ ኢስቲ ጾሳ ቦላ ኣይ ዱላቲኮካ ኢዚ ኢስታ ይሳና። ሜቶይ ናምኣን ዴንዴና።

¹⁰ ኢስቲ ኣጉንን ቃጼታና፤ ባ ዎይኔ ኡሻን ኢስቲ ማታና፤ ታማይ ኢስታ ቡጻ ማላ ማና።

¹¹ ሃኔ ናናዌ! ጎዳ ቦላ ኢታ ዱላቲዛይቲኔ ኢታ ዞሬ ዞሬቲዛይቲ ኔ ጋርሳፌ ቤቲዳ፤

¹² ጎዳይ፥ «ኢስቲ ኣይ ዎልቃማታኔ ዳሮታ ጊዲኮካ ኢስቲ ቃንጼቲ ያና። ሃይሶ ዩሁዳ ኔኒ ሃይሳፌ ካሴ ታ ኔና ኡንኤዳ ጊዲኮ ሃይሳፌ ጉዬ ታ ኔና ኡንኤኬ።

¹³ ሃኢካ ታ ኢስታ ቃምባራ ኔ ሞርጌፌ ሜን ዲጋና፤ ኔ ኢዛን ቃሼቲዳ ሳንሳላታካ ዱ ዬጋና» ጌስ።

¹⁴ ሃኔ ናናዌ ጎዳይ ኔና፥ «ሃይሳፌ ሲንን ኔ ሱን ጼይጊዛ ዬሌታይ ዴና። ኔ ኤቃ ጾሳታ ኬን ዲዛ ማሴቲ ጊጊዳ ሚስሌታኔ ሴሪሲ ጊግሲዳ ኤቃ ጾሳታ ይሳና፤ ኔ ኢታ ጊዲዳ ጊሻስ ኔ ሞጌታናሶ ታ ቦካና» ጌስ።

¹⁵ ሄኮ ሚሺራቾ ዮቲዛይሲ፥ ሳሮቴ ኣዋጂዛይሲ ዙማ ቦላራ ዩሳን ዴስ። ዩሁዳ ኔ ባኣሌታ ቦንቻ፤ ኔ ኣዲኔቲዳይሳ ጋ፤ ሃይሳፌ ጉዬ ኢታቲ ኔ ዴሬ ዎራጄቴና፤ ኢስቲ ሙሌራ ያና።