ሉቃሳ ሚሺራቾ 19 - ጋሞ ማጻፋ

ዬሱሳኔ ዜኪዮሳ

¹ ዬሱሲ ኢያርኮ ጌቴቲዛሶራ ኣ ቢሺን፥

² ዜኪዮሳ ጌቴቲዛ ኢሲ ኣሲ ሄን ዬሱሲ ቢዛ ኦጌ ቦላ ዴስ። ኢዚካ ቃራጻ ቃንጺሲዛይታስ ሃላቃኔ ኬሂ ዱሬ ኣሳ።

³ ኢዚ ዬሱሳ ጌቴቲዛይሲ ኣዋይሳኮ ቤያናስ ኮዪሺን ቃን ኣሳ ጊዲዳ ጊሻሲኔ ዳሮ ዴሬይ ዬሱሳ ካሊዛ ጊሻስ ዬሱሳ ቤያናስ ዳንዳይቤና።

⁴ ዬሱሲ ሄ ኦጌራ ኣሺን ሲን ኣዲ ኦጌ ቦላ ዲዛ ኢሲ ኤ ሚ ቦላ ኬዚዴስ።

⁵ ዬሱሲ ኤ ጋርስ ጋኪዲ ቁ ሂስቲ ጼሊዲ፥ «ዜኪዮሳ! ሃች ታ ኔ ኬን ፔኣናስ ቤሴስ፤ ኤሌላ ዎ» ጊዴስ።

⁶ ኢዚካ ኤሌሊ ዎዲ ኡፋይሳን ሞኪ ኤኪዴስ።

⁷ ሄ ዎዴ ሄን ኢዛራ ዲዛ ኣሳይ ሄሳ ቤኢዲ፥ «ናጋራንቻ ኬን ኢማቶ ማና ጌስ» ጊዲ ዉሪካ ባ ጊዶን ዙዙሜቲዳ።

⁸ ጊዶ ኣቲን ዜኪዮሲ ኤቂዲ፥ «ጎዶ! ታኒ ታስ ዲዛ ሚሼ ኡባፌ ባጋ ሻካዳ ማንቆታስ ኢማና፤ ታኒ ኦናፔካ ዎርዶራ ቦንቃ ኤኪዳዚ ዲኮ ኦይዱ ኩሼ ጉጃዳ ኢዛዴስ ኢማና» ጊዴስ።

⁹ ዬሱሲካ፥ «ሃ ኣዴዚ ኣብራሃሜ ና ጊዲዳ ጊሻስ ሃች ሃ ኬስ ፓጻቴ ዪዴስ» ጊዴስ።

¹⁰ ሃይሳስ ጋሶይካ ኣሳ ናይ ሃ ዪዳይ ይዳይሳ ኮያናሲኔ ኣሻናሳ።

¹¹ ኣሳይ ሃይሳ ሲዪሺን ሌሚሶራ ሃሳያ ኦይኪዴስ፤ ጋሶይካ ኢዚ ዬሩሳላሜ ጋካናስ ማቲዳ ጊሻሲኔ ኣሳታስ ጾሳ ካዎቴ ቆንጫና ሃኒዛ ሚሳቲዳ ጊሻሳ።

¹² ሄሳ ጊሻስ፥ «ኢሲ ካዎይ ባ ካዎቴ ሹሜቴ ኤኪ ያናስ ሃሆ ቢታ ቢዴስ።

¹³ ባ ኣሽካራታ ጊዶፌ ታማታ ጼይጊዲ ታሙ ሚናኔ ኢስታስ ኢሚዲ፥ ‹ታ ሲማዳ ያና ጋካናስ ሃይሳ ሚሻን ዛልኢቴ› ጊዴስ።

¹⁴ «ሄ ዴሬ ኣሳቲ ቃሴ ኢዛ ኢጺዳ ጊሻስ፥ ‹ሃይሲ ኣዴዚ ኑ ቦላ ካዎታና ማላ ኮዮኮ› ጊዲ ኣስ ኢዛ ጌዶራ ኪታ ኣ ዬዲዳ።

¹⁵ «ጊዶ ኣቲን ሃ ካዎ ናዚ ካዎ ጊዲዲ ጉዬ ባ ዴሬ ሲሚዴስ። ካሴ ቢሼ ታሙ ሚናኔ ኢሚዳ ታሙ ኣሽካራቲ ኢዚ ኢሚዳ ቢራን ዛልኢዲ ኣይ ኬና ቲርፊሲዳኮ ኤራናስ ኢስታ ጼይጊዴስ።

¹⁶ «ኢስታፌ ኮይሮዚ ሺቂዲ፥ ‹ጎዶ! ኔ ታስ ኢሚዳ ታሙ ሚናኔይ ሃራ ታሙ ዬሊዴስ› ጊዴስ።

¹⁷ «ጎዳዚካ ኢዛ፥ ‹ኔ ኣማኔቲዳ ኣሽካራ፤ ሎኦ ኦዳሳ። ጉ ሚሻን ኔ ኣማኔቲዳ ጊሻስ ታሙ ካታማታ ኔ ሃራና ማላ ኔስ ኢማዲስ› ጊዴስ።

¹⁸ «ናምኣንዚካ ኢዛኮ ሺቂዲ፥ ‹ጎዶ! ኔ ታስ ኢሚዳ ሚናኔፔ ሃራ ኢቻሹ ሚናኔይ ዎዴስ› ጊዴስ።

¹⁹ «ኢዛ ጎዳዚ ኢዛስ ዛሪዲ፥ ‹ኔኒ ኣይሳና ማላ ታሙ ካታማቲ ኔስ ኢሜቲዳ› ጊዴስ።

^20-21 «ቃሴካ ሃንኮ ኦሳንቻይ ሺቂዲ፥ ‹ጎዶ! ኔኒ ዎንታሶፔ ኤኪዛዴ፤ ዜሮንታሶፔ ማጺዛዴኔ ሜንጼ ኢታ ኣስ ጊዲዳ ጊሻስ ታ ኔስ ባባዳ ጫርቃን ጻጻ ዎዳ ኔ ሚናኔዮ ሄይ ኤካ› ጊዴስ።

^22-23 «ኢዛ ጎዳዚ ዛሪዲ ኢዛስ፥ ‹ሃይሶ ኢታ ኦሳንቻዞ! ታ ኔ ቃላን ኔና ዛራ ፒርዳይስ። ታኒ ዎንታሶፔ ኤኪዛዴኔ ዜሮንታሶፔ ማጺዛ ሜንጼ ኢታ ኣስ ጊዲዳይሳ ኤራሳሺን ታኒ ታ ሚሻ ዬሎራ ኤካና ማላ ሄ ሚሻን ኦና ኣሳታስ ኣዛስ ኢማቤኪ?› ጊዴስ።

²⁴ «ኢዛ ጎዳዚካ ሄን ኤቂዳ ኣሳታ፥ ‹ኢዛ ኩሼፔ ሚናኔዛ ኤኪዲኔ ታሙ ሚናኔይ ዲዛይሳስ ኢሚቴ› ጊዴስ።

²⁵ «ኢስቲካ ዛሪዲ፥ ‹ጎዶ! ኢዛስ ታሙ ሚናኔይ ዴስኮ› ጊዳ።

^26-27 «ኢዚካ፥ ‹ዲዛዴስ ኡባስ ሃራይ ጉጄታና፤ ባይንዳዴስ ካሴ ዲዛይሲ ኢዛፔ ኤኬቲቻና። ጊዶ ኣቲን ታኒ ኢስታ ቦላ ካዎቶንታ ማላ ኮዪዳይታ ሃይታ ታ ሞርኬታ ታኮ ሃ ኤሂዲ ታ ሲንን ሹኪቴ› ጊ ዛሪዴስ» ጊዴስ።

²⁸ ሄሳ ሃሳዪ ሲሚዲ ዬሱሲ ዬሩሳላሜ ኬዛናስ ኢስታፌ ሲንቲ ቢዴስ።

^29-31 ዳብራዛይቴ ጌቴቲዛ ዙማ ቦላ ዲዛ ቤቴፋጌኔ ቢታኒያ ጌቴቲዛ ካታማታኮ ማቲዳ ዎዴ ባና ካሊዛይታፔ ናምኣታ፥ «ሄን ኢንቴ ሲንን ዲዛ ቄሪ ካታማዮ ቢቴ፤ ቢዲ ካታማዮ ኢንቴ ጌሊሺን ኦኒካ ቶጊ ኤሮንታ ኢሲ ቃሼቲ ዲዛ ሃሬ ጉቴ ኢንቴ ዴማና፤ ኢዛ ቢርሺዲ ሃ ታስ ኤኪ ዪቴ፤ ኢንቴና ኦኒካ፥ ‹ኣዛስ ቢርሼቲ?› ጊዲ ኦይቺኮ፥ ‹ጎዳስ ኮሼስ ጊቴ› » ጊ ኪቲዴስ።

³² ኪቴቲዳይቲካ ቢዲ ኢዚ ኢስታስ ዮቲዳ ማላ ሃሬ ጉቴዛ ዴሚዳ።

³³ ኢስቲ ጉቴዛ ቢርሺን ጉቴዛ ጎዳቲ ቤኢዲ፥ «ኣዛስ ቢርሼቲ?» ጊዲ ኦይቺዳ።

³⁴ ኢስቲካ፥ «ጎዳስ ኮሼስ» ጊዳ።

³⁵ ሃሬ ጉቴዛ ዬሱሳኮ ኤሂዲ ባ ማይኦ ኡባ ጉቴዛ ቦላ ዬጊዲ ሃሬ ጉቴዛ ቦላ ዬሱሳ ቶጊሲዳ።

³⁶ ኣሳይ ዉሪካ ባ ኣፋላ ዬሱሲ ቢዛ ኦጌ ቦላ ሚጪዴስ።

^37-38 ዳብራዛይቴ ዙማ ቦላራ ዱጌ ዎዛ ኦጌዛኮ ማቲዳ ዎዴ ቆዳይ ባይንዳ ዴሬይ ባ ቤኢዳ ማላታ ጊሻስ ዉሪካ ኡፋይሳራ ባ ቃላ ቁ ሂስቲዲ፥ «ጎዳ ሱንን ዪዛ ካዎይ ኣንጄቲዳይሳ፤ ሳሮይ ሳሎን፥ ቦንቾይ ሳሎፔ ቦላ ሳሎን ጊዶ» ጊዴስ።

³⁹ ዴራፔ ኢሲ ኢሲ ፋርሳዌቲ ዬሱሳ፥ «ኣስታማሬ! ሃ ኔና ካሊዛ ኣሳይ ጊዛይሳ ጎንታ ማላ ሃንቃ» ጊዴስ።

⁴⁰ ኢዚካ ኢስታስ ዛሪዲ፥ «ሃይቲ ጮኡ ጊዳኮ ሹቻቲካ ዋሳና» ጊዴስ።

^41-43 ዬሱሲ ዬሩሳላሜ ማቲሼ ካታማዮ ቤኢዲ ኢዚስ ዬኪዴስ። «ኔስ ሳሮ ጊዲዛዝ ሃች ኔ ኤሪዳኮ ኣዜ ዲዛይ? ሃኢ ኔ ኣይፌፔ ቆቴቲዳ ጊሻስ ኔ ሞርኬቲ ሄራ ሃራ ኔና ጊዶዲ ኡንኤና ዎዴይ ያና።

⁴⁴ ኔናኔ ኔ ጊቤ ጊዶን ኔናራ ዲዛ ኔ ናይታ ኡባ ቢታ ኬሳና፤ ሹቻካ ሹቻ ቦላፌ ላሎንታ ኣጌቴና። ሄሲ ዉሪካ ጾሲ ኔና ኮዪሺን ኔኒ ኤሮንታ ኣጊዳ ጊሻሳ» ጊዴስ።

⁴⁵ ሄሳፌ ካሊዲ ዬሱሲ ጾሳ ኬ ጌሊዲ ጾሳ ኬ ጊዶን ዛልኢዛይታ ኬሲዴስ።

⁴⁶ ቃሴካ፥ «ታ ኬይ ዎሳ ኬ ጊዳና ጌቴቲ ጻፌቲዴስ፤ ኢንቴ ጊዲኮ ፓንጋይ ዲዛ ጎንጎሎ ሂስቲዴታ» ጊዴስ።

⁴⁷ ዎንቲን ዎንቲን ጾሳ ኬን ኢዚ ታማርሲሺን ጻፌቲኔ ዴሬ ሃላቃቲ ኢዛ ዎናስ ኮዪዳ።

⁴⁸ ጊዶ ኣቲን ዴሬይ ዉሪካ ኢዛራ ኦይኬቲዲ ኢዚ ታማርሲዛይሳ ካሊዛ ጊሻስ ኦናዚ ኢስታስ ኪርቂ ጊዴስ።