ኤርማሳ ዚላስ 5 - ጋሞ ማጻፋ

ማሬታናስ ዎሲዳ ዎሳ

¹ ኣቤት ጎዳዉ! ኑ ቦላ ጋኪዳይሳ ኔ ቆፓ፤ ኑ ካዉሻቴካ ጼላ።

² ኑ ቢታ ኣላጋቲ ላቲዳ፤ ኑ ኬካ ባስ ዱሳሶ ኦዳ።

³ ኑኒ ዪኦ ጊዲዶስ፤ ኑ ኣዬቲ ኣምኤታ ጊዲዳ።

⁴ ኑኒ ኑ ሃ ሚሻን ሻሚ ኡዪዶስ፤ ኑኒ ኑ ሚካ ሻሚ ኤኪዶስ።

⁵ ኑና ጎዲዛይቲ ኑስ ጌዶን ኤቂዳ፤ ኬሂ ዳቡርዶስ፤ ሼምፖካ ዲጌቲዶስ።

⁶ ኑኒ ካ ካላናስ ጊዲ ኣሶሬ ኣሳታሲኔ ጊብጼስ ኩሼ ኢሚዶስ።

⁷ ኑ ኣዋቲ ናጋራ ኦዳ፤ ኑኒ ኢስታ ቂጻቴ ኤኪዶስ።

⁸ ኣይሌቲ ኑና ሃሪዳ፤ ኢስታ ኩሼፔ ኑና ኬሲ ኤካናይ ኦኒካ ዴና።

⁹ ባዞን ዲዛ ኦላ ጋሶን ኑኒ ኑ ሼምፖ ኣ ኢሚዲ ካ ዴሚዶስ።

¹⁰ ኮሻ ዳሮፔ ዴንዲዳይሳን ሃርጊዶስ፤ ኑ ሜይካ ሻላ ማላ ጊዲዴስ።

¹¹ ማጫሳታ ጺዮኔን ቱኒሲዳ፤ ጌላኦታካ ዩሁዳ ካታማታን ዎልቃን ኦይኪ ካዉሺዳ።

¹² ዳናታ ካቂዳ፤ ጪማታካ ቦንቺቤቴና።

¹³ ዬላጋ ኣቱማ ናይቲ ዎጻን ጋጫና ማላ ዎልቃዳ፤ ፓንቲ ዴጾ ሚ ቶኪዲ ጋዲጋዲዳ።

¹⁴ ጪማቲ ፒርዳናስ ኡቲዛ ዱቡሻ ኣጊዳ፤ ፓንቲካ ባንታ ማዛሙሬ ኣጊዳ።

¹⁵ ኡፋይሲ ኑ ዎዚናፔ ይዴስ፤ ኑ ዱሪሲካ ዬሆን ላሜቲዴስ።

¹⁶ ካላቻይ ኑ ሁኤፔ ኩንዲዴስ፤ ኑ ናጋራ ኦዳ ጊሻስ ኣዬ ኣና!

¹⁷ ሄሳ ጋሶን ኑ ዎዚናይ ዳቡርዴስ፤ ኑ ኣይፌይካ ባልጁሚዴስ።

¹⁸ ጺዮኔ ቢታይ ቡላ ጊዲዳ ጊሻስ ዎራካናቲ ጉፒዛሶሆ ጊዲዴስ።

¹⁹ ኣቤት ጎዳዉ! ኔኒ ሜርናስ ሃራሳ፤ ኔ ካዎቴይ ዬሌታፔ ዬሌታ ጋካናስ ዳና።

²⁰ ኔ ኑና ኣይስ ኡባ ዎዴ ጮኡ ጋይ? ቃሴ ኣይስ ሃይሳ ጋካናስ ኣጋጋዲ?

²¹ ጎዳዉ! ኔኒ ኑና ኔኮ ዛራ፤ ኑኒካ ኔኮ ሲማና! ቤኒ ኑ ቦንቾዛ ዛራዳ ኑና ኦራ!

²² ኔ ሄሳ ኦንታ ኣጊኮ ኑና ሙሌራ ኣጋዲ? ኔ ሃንቆዛስካ ዛዋይ ባዌ?