ኤርማሳ ዚላስ 4 - ጋሞ ማጻፋ

ዬሩሳላሜ ቦላ ጋኪዳ ቂጻቴ

¹ ዎርቃይ ዋኒ ታሲዴስ፤ ዋላካይ ባይንዳ ሙሩታ ዎርቃይ ዋኒ ላሜቲዴ! ጾሳ ኬ ኬጼቲዳ ቦንቾ ሹቻቲ ኦጌ ዶናን ላሌቲዳ።

² ካሴ ቦንቼቲዳ ዎርቃ ሚሳቲዛ ጺዮኔ ናይቲ ሃኢ ዋኒዲ ኩሼን ኡርቃፌ ቲሊዲ ሜዳ ማና ሚሻ ማላ ጊዲዶ!

³ ዎራካናቲ ባ ማራታ ዲቻናስ ባ ን ንቴስ፤ ታ ዴሬይ ጊዲኮ ባዞን ዲዛ ያንቻ ካፎታ ማላ ሜንጼ ኢቲዴስ።

⁴ ዳሮ ሳሜቲዳ ጊሻስ ጉ ናይታ ኢንጻርሲ ፑዴ ጎንጊራራ ኦይኬቲዴስ፤ ናይቲ ካ ዎሲዳ ሺን ኦኒካ ኢስታስ ኢሚቤና።

⁵ ካሴ ሎኦ ካ ሚዛይቲ ሃኢ ሜቶቲዲ ኦጌ ቦላ ቶይላቲዳ፤ ካሴ ሎኦ ማይኦ ማይኢዲ ኢሻሎን ዲጪዳይቲ ሃኢ ቢዲንን ኢቺዳ።

⁶ ታ ዴሬዛ ቦላ ጋኪዳ ቂጻቴይ ኦና ኩሼይካ ቦቾንታ ዲሺን ኤሶን ኣ ዎዳ ሶዶሜ ካታማ ኣሳ ጋኪዳ ቂጻቴዛፔካ ኬሂ ኢታ።

⁷ ኢስታ ካሌዛይቲ ሻቻፌ ኣዳ ጌሻ፤ ማፌ ኣ ቦ፤ ኢስታ ቦላይ ዞኦ ኢንቁፌ ኣዳ ኣሪሳ፤ ቃሴ ኢስታስ ሜይካ ሲምፔሬ ጌቴቲዛ ሹቻ ማላ።

⁸ ሃኢ ጊዲኮ ኢስታ ሜይ ሻላፔካ ኣ ካሬቲዴስ፤ ኦኒካ ኢስታ ኦጌን ቤኢዲ ኤሬና፤ ኢስቲ ሜቄ ጻላ ኣቲዳ፤ ሜላ ሚ ማላ ጊዲዳ።

⁹ ኮሻን ሃይቂዳይታፔ ማሻን ሃይቂዳይቲ ሎኦ፤

¹⁰ ታ ኣሳ ቦላ ጋኪዳ ሃንቆ ጋሶን ናይታስ ሚሼቲዛ ኣዬቲ ባ ዬሊዳ ናይታ ባ ኩሼራ ዶይሲ ሚዳ።

¹¹ ጾሲ ባ ዎልቃማ ሃንቆዛ ቆንጪሲዴስ፤ ጺዮኖ ዲፒ ሂስቲ ይሲዛ ታማ ኦይሴዴስ።

¹² ቢታ ቦላ ዲዛ ካዎታፔ ዎይኮ ኣላሜ ቦላ ዲዛ ኣሳፔ ኦኒካ ኢስታ ሞርኬቲ ዎይኮ ዎራጂዛይቲ ዬሩሳላሜ ፔንጌታ ሜን ጌላና ጊዲ ኦኒካ ቆፒቤና።

¹³ ሃይሲ ሃኒዳይ ናቤቲኔ ቄሴቲ ኦዳ ናጋራ ጋሶና፤ ቃሴ ኢስቲ ጺሎታ ሱ ጉሲዳ ጊሻሳ።

¹⁴ ቆቄ ኣሳ ማላ ኢስቲ ኦጌ ቦላ ጋዲጋዳና፤ ኢስቲ ሱን ቱኒዳ ጊሻስ ኢስታ ማይኦ ቦቻናስ ጻሊዛዴይ ዴና።

¹⁵ ሄሳ ጊሻስ ኣሳይ ኢስታ ቦላ፥ «ኪቺቴ! ኢንቴ ቱና! ሃኪቴ! ኑና ቦቾፍቴ!» ጊ ዋሳና። ሄሳ ጋሶን ኢስቲ ባቃቲዲ ካዎቴ ጊዶን ቶይላቲሼ ኣሳይ ኢስታስ፥ «ኢንቴ ኑናራ ሃይሳን ዳናስ ዳንዳዬኬታ» ጊዳ።

¹⁶ ኢስታ ላሊዳይ ጾሳ፤ ሃይሳፌ ጉዬ ኢዚ ኢስታስ ቆፔና፤ ኢስታ ቄሴታስ ቦንቾይ ኢሜቴና፤ ጪማታስካ ፑላይ ዴና።

¹⁷ ኑ ኣይፌይ ማዶ ዴማናስ ጼሊሼ ጮ ሜላ ዳቡርዴስ፤ ኑና ኣሻናስ ዳንዳዮንታ ዴሬታፔ ማዶ ዴማናስ ላሞታን ናጊዶስ።

¹⁸ ኣሳይ ኑ ጌዶን ኤቂዛ ጊሻስ ኑ ኦጌራ ሄሜታናስ ዳንዳይቤኮ፤ ኑስ ዉርሴ ማቲዴስ፤ ኑ ላይ ዉሪዴስ፤ ኑ ይዛ ዎዴይ ጋኪዴስ።

¹⁹ ኑና ጎዲዛይቲ ሳሎራ ፓሊዛ ጎሌፌ ኣ ኤሶቴቴስ፤ ኢስቲ ኑና ዙማ ቦላራ ጎዲዳ፤ ባዞን ኑና ዙጊ ናጊዳ።

²⁰ ኑኒ ኢዛ ኩዋ ጋርሳን ኡቲ ዴኣና ጊ ቆፒዳይሳ፥ ጾሲ ቲይዳይሳ፥ ኑስ ዴኦ ሼምፖካ ጊዲዳይሳ ባንታ ዎጺማዴን ኦይኪዳ።

²¹ ኢንቴኖ ኡጼ ቢታን ዲዛ ኤዶሜ ኣሳቶ! ኡፋይስ ኖጮጩ ጊቴ! ጊዶ ኣቲን ቃዳይ ኢንቴናካ ጋካና፤ ኢንቴ ማታናኔ ካሎ ኣታና።

²² ኢንቴኖ ጺዮኔ ኣሳቶ! ኢንቴ ሞሮ ጋሶን ቃጻዬቶይሲ ኢንቴስ ጊዳና፤ ሃይሳፌ ጉዬ ኢንቴና ዲኤቲዳ ቢታን ጋምኢሴና፤ ጊዶ ኣቲን ኤዶሜ ኣሳቶ! ኢዚ ኢንቴና ኢንቴ ናጋራ ጊሻስ ቃጻያና፤ ኢዚ ኢንቴ ሞሮዛካ ቆንጬ ኬሳና።