ኤርማሳ ዚላስ 3 - ጋሞ ማጻፋ

ማሬቴን ቤቲዛ ሂዶታ

¹ ጎዳ ሃንቆ ጉፌን ዋዬ ቤኢዳ ኣሲ ታና።

² ኢዚ ታና ባ ሲንፌ ኬሲ ዬዲዴስ፤ ፖኦይ ባይንዳ ጌዴ ማን ታና ጌልዴስ።

³ ኢዚ ኩሜ ጋላስ ዛሪ ዛሪዲ ታና ሾጪዴስ።

⁴ ኢዚ ታ ኣሳቴካ ጬጊሲዴስ፤ ታ ሜቄታካ ሜንሬዴስ።

⁵ ኢዚ ታና ሜቶኒኔ ኢታ ቱጋ ጊዶ ዬጊዴስ።

⁶ ሃይቂዲ ጋምኢዳ ኣሳ ማላ ታኒ ማን ዳና ማላ ኦዴስ።

⁷ ታ ኬዞንታ ማላ ታ ዩሾዛ ዲርዴስ፤ ሚኖ ሳንሳላታን ታና ቃቺዴስ።

⁸ ታኒ ማዶ ኮያዳ ዋሳ ጼይጊንካ ኢዚ ታ ዋሳ ሲያናስ ኮዪቤና።

⁹ ታ ኦጌዛ ማሴቲዳ ሹቻን ጎርዲዴስ፤ ታ ኣ ቢዛ ኦጌዛካ ጌላሲዴስ።

¹⁰ ኢዚ ታስ ዛማዲ ኡቲዳ ዛርዶ ማላ ጊዲዴስ፤ ቃሴካ ቆቴቲ ናጊዛ ጋሞ ማላ ጊዲዴስ።

¹¹ ታና ታ ቢዛ ኦጌፔ ጎቺ ኬሲዲ ዱሴሬ ዬጊዴስ፤ ታና ኣሲ ባይንዳሶን ኦላጊዴስ።

¹² ኢዚ ባ ዎንዳፌ ዳፊ ኦይኪዴስ፤ ታና ጫዳናስ ባ ዪሽ ጊግሲ ዎዴስ።

¹³ ኢዚ ዪሻ ዬዲዲ ታስ ዎዚና ኣይፌን ጫዲዴስ።

¹⁴ ታኒ ታ ዴሬ ኣሳስ ቂ ሚሽ ጊዳዲስ፤ ጋላስ ኩሜ ታ ቦላ ቂ ማዛሙሬ ዬጼቴስ።

¹⁵ ኢዚ ታ ዴኦዛ ጫሞን ኩንዴስ፤ ኢዚ ታና ጪዬ ኡሹ ካልሲዴስ።

¹⁶ ኢዚ ታ ኣች ሹቻን ሜንዴስ፤ ኢዚ ታና ጉዱላን ዬቲዴስ።

¹⁷ ታ ሼምፖይስ ሳሮቴ ይዴስ፤ ኡፋይሲ ኢዚ ኣዛኮኔ ታ ባላዲስ።

¹⁸ ሄሳ ጊሻስ፥ «ታ ቦንቾይ ታፔ ሻኬቲዴስ፤ ታኒ ጾሳፌ ናጊዛ ሂዶታ ኡባይ ይዴስ» ጋዲስ።

¹⁹ ታ ዋዬኔ ታ ቶይላቴ ታ ቆፒሺን ታ ዴኦይ ታና ጫሚዴስ።

²⁰ ኡባ ዎዴካ ታ ሃይሳ ቆፒሺን ታ ዎዚናይ ጬጬስ።

²¹ ጊዲኮካ ታኒ ሃይሳ ቆፒዛ ዎዴ ታስ ሲንፌ ሂዶታይ ዴስ።

²² ሄሲካ ኑኒ ዮንታ ኣጊዳይ ጎዳ ሲቆይ ዳሮ ጊዲዳ ጋሶና፤ ኢዛ ቃታይካ ሜርናስ ዉሮንታ ጊሻሳ።

²³ ኢስቲ ማላዶ ማላዶ ኦራ፤ ኔ ኣማኔቴይካ ዳሮ።

²⁴ ታስ ቃዳይ ጎዳ፤ ሄሳ ጊሻስ ታ ኢዛን ጻላ ሂዶታ ኦይስ።

²⁵ ጎዳይ ባና ሂዶታ ኦዛይታሲኔ ኢዛ ኮይዛይታስ ሎኦ።

²⁶ ጎዳይ ኣስ ኣሺዛ ኣሾዛ ኢዛዴይ ጮኡ ጊ ናጊኮ ሎኦ።

²⁷ ኣሲ ዬላጋቴ ዎዴን ቃምባራ ቶኪኮ ሎኦ።

²⁸ ጎዳይ ኢዛ ቶሲዳ ጊሻስ ኢዚ ባርካ ጮኡ ጊ ኡቶ።

²⁹ ሲንፌ ኢዛስ ሂዶታይ ዳና ዳንዳይዛ ጊሻስ ባና ዚቂ ሂስቲ ሃሪሶ።

³⁰ ባቃና ኮዪዳዴስ ኢዚ ባ ሻጋላ ቤሶ፤ ካዉሻቴካ ኤኮ።

³¹ ጎዳይ ኣሴ ሜርናስካ ዬጊ ኣጌና።

³² ኢዚ ኣሳ ቦላ ሜቶ ኤሂኮካ ባ ሜርና ሲቆን ሲሚ ቃቴስ፤

³³ ኢዚ ኦዲዲ ኣሳ ቦላ ሜቶ ዎይኮ ዋዬ ኤሂ ኤሬና።

³⁴ ዴራን ዲዛ ቃሾ ኣሳይ ኡባይ ጌኔን ዬቲሺን፥

³⁵ ኡባፌ ቃ ጾሳይ ቤዪሺን ኣሳስ ኣሳቴ ማታይ ዲጌቲዛ ዎዴ፥

³⁶ ቃሴካ ቱማ ፒርዳይ ጌላቲዛ ዎዴ ጎዳይ ሄሳ ማላ ሃኖታ ዴሜኔ?

³⁷ ጾሲ ኣዛዞንታ ዲሺን ባ ጊዳዝ ፖላናስ ዳንዳይዛይ ኦኔ?

³⁸ ኢታ ጊዲን ዎይኮ ሎኦ ጊዲን ባ ጊዳዝ ፖሊዛይ ኡባፌ ቃ ጾሳ ጊዴኔ?

³⁹ ሂስቲን ሼምፖራ ፓጻ ዲዛ ኣሲ ባ ናጋራን ቃጻዬቲሼ ኣዛስ ዙዙሚዜ?

⁴⁰ ሄሳ ኣጊዲ ኑኒ ኑ ኦጌ ኣኔ ፒልጊ ጼሎስ፤ ጎዳኮካ ሲሞስ።

⁴¹ ኣኔ ኑኒ ኑ ዎዚናኔ ኑ ኩሼ ሳሎን ዲዛ ጾሳኮ ፑዴ ዴንዲ፥

⁴² «ኑ ጎዳዉ! ኑኒ ማካሊዶስ፤ ናጋራካ ኦዶስ፤ ሄሳ ጊሻስ ኔኒ ኑና ማራቤካ።

⁴³ ኔኒ ሃንቆን ኩማዳ ኑና ጎዳዳሳ፤ ኔ ኑና ቃታይ ባይንዳ ዎዳሳ።

⁴⁴ ዎሳይ ኔኮ ኣ ቦንታ ማላ ኔና ሻራን ካማዳሳ።

⁴⁵ ኔ ኑና ኣይዛቤታ ጊዶን ኦርጮኔ ቡራ ኬሳዳሳ።

⁴⁶ ኑ ሞርኬቲ ኡባይ ባ ዶና ኑ ቦላ ዶይዳ።

⁴⁷ ኑኒ ባሻኒኔ ላሌቴን ሜቶኒኔ ሺሮን ኩምዶስ» ጎስ።

⁴⁸ ታ ዴሬይ ዉሪዳ ጊሻስ ታ ኣይፌፔ ኣፉን ዲኦ ማላ ጎጊዴስ።

⁴⁹ ሼምፖንታ ኡባ ዎዴ ታ ኣይፌፔ ኣፉን ጉኬስ።

⁵⁰ ሄሲ ሃናናይ ጾሲ ሳሎፔ ዱጌ ጼላና ጋካናሳ።

⁵¹ ታኒ ዲዛ ካታማን ዲዛ ኡባ ማጫሳታ ቦላ ጋኪዳ ሜቶዛ ታኒ ታ ኣይፌን ቤኢዳ ጊሻስ ታ ዎዚናይ ጬጪዴስ።

⁵² ጋሶይካ ባይንዳ ታስ ሞርኬ ጊዲዳይቲ ካፎ ማላ ታና ሻንካቲዳ።

⁵³ ኢስቲ ታኒ ሼምፖራ ፓጻ ዲሺን ዱጌ ኦላን ዬጊዳ፤ ሹቺካ ታ ቦላ ኦሊዳ።

⁵⁴ ሃ ኩሚዲ ታስ ሁኤ ቦላራ ጎጊዴስ፤ ታኒ ያዲስ ጋዳ ቆፓዲስ።

⁵⁵ ታ ጎዳዉ! ታኒ ጪማ ኦላ ጊዶን ዳሼ ኔ ሱን ጼይጋዲስ።

⁵⁶ ታ ዋሶ ኔ ሲያና ማላ ታ ኔና ዎሲን ሲያዳሳ።

⁵⁷ ታ ኔና ጼይጊዳ ዎዴ ኔ ታኮ ሺቃዳ፥ «ያዮፋ» ጋዳሳ።

⁵⁸ ጎዶ! ኔ ታስ ሞቴታዳ ታና ኣሻዳሳ።

⁵⁹ ጎዳዉ! ኔ ታ ቦላ ጋኪዳ ቆሆዛ ቤያዳሳ፤ ኔ ታስ ፒርዳ።

⁶⁰ ታ ሞርኬቲ ታ ቦላ ሃሎ ኬሳናስ ቆፒዳይሳኔ ኢስቲ ታ ቦላ ዙፔቲዳይሳ ኔ ቤያዳሳ።

⁶¹ ታ ጎዳዉ! ኢስቲ ታና ጫዪዳ ጫሻኔ ታ ቦላ ማቄቲዳ ማቆዛ ኔ ሲያዳሳ።

⁶² ጋላስ ኩሜ ታ ሞርኬቲ ታ ቦላ ሳሱኬቴቴሲኔ ዙዙሜቴስ።

⁶³ ኔ ኢስታ ጼላ! ኢስቲ ኤቂዲ ጊዲን ኡቲዲ ባ ዬን ታና ጫዴቴስ።

⁶⁴ ታ ጎዳዉ! ኔ ኢስታስ ኢስታ ኦሶ ማላ ኢማ።

⁶⁵ ኢስታ ዎዚና ዳሚሳ፤ ኔ ቃንጌ ኢስታ ጋኮ።

⁶⁶ ኣቤት ጎዳዉ! ኔ ኢስታ ኔ ሃንቆን ጎዳ፤ ሳሎ ጋርሳፌ ይሳ።