ኤርማሳ ዚላስ 1 - ጋሞ ማጻፋ

ዬሩሳላሜ ዋዬኔ ካዮ

¹ ካሴ ኢዚን ዳሮ ካዎቴይ ዲዛ ካታማያ ዋናዳ ኦሌታ ኣታዴ! ዴሬታ ጊዶን ካሴ ጊታ ጊዲዳራ ዋናዳ ኣምኢ ማላ ጊዳዴ! ኣዉራጃታ ጋርሳን ጎዳቶ ጊዲዳራ ሃኢ ዋናዳ ኣይሌ ጊዳዴ!

² ኢዛ ጊዶ ጫሞ ዬሆ ዬካዉስ፤ ኢዚስ ኣፉንይካ ሻጋላራ ጎጌስ፤ ኢዚ ላጌታፔ ኢዞ ሚንዛይ ኦኒካ ዴና፤ ኡባቲካ ኢዞ ካዲዳ፤ ዛሪዲካ ኢዚስ ሞርኬ ጊዲዳ።

³ ዩሁዳይ ዳሮ ዋዬቲዳፔኔ ቶሼቲዳፔ ጉዬ ዲኤታዱስ፤ ኢዛ ካዎቴታ ጊዶን ኡታዱስ፤ ኢዚስ ሼምፒዛሶይካ ይዴስ፤ ኢዛ ሜቶ ጋርሳን ዲሺን ጎዲዛይቲ ኡባይ ኢዞ ዴሚዳ።

⁴ ኦኒካ ኢዚ ባኣሌታ ቦንቻናስ ዮንታ ጊሻስ ጺዮኔ ኦጌቲ ዬኬቴስ፤ ኢዚ ፔንጌታራ ጌሊዛይኔ ኬዚዛይ ዴና፤ ኢዚ ቄሴቲ ጬጬቴስ፤ ጌላኦቲካ ሙዞቴቴስ፤ ኢዛካ ጊታ ሜቶ ጋርሳን ቱጋታዉስ።

⁵ ኢዚ ናጋራይ ዳሮ ጊዲዳ ጋሶን ጎዳይ ኢዚ ቦላ ሜቶ ዬጊዴስ፤ ኢዚ ሞርኬቲ ኢዞ ሃሪዳ፤ ኢዚ ናይቲካ ሞርኬታን ዲኤቲዳ፤ ኢዚ ሞርኬታስ ዱሲ ሎኢዴስ።

⁶ ጺዮኔ ማጫ ናይፔ ኢዚ ፑላቴኔ ቴማይ ሻኬቲ ኪቺዴስ፤ ኢዚ ዳናቲ ማታ ሚዛሶይ ይዳ ጌኔሳ ማላ ጊዲዳ፤ ኢስቲ ባና ጎዲዛይታፔ ዎልቃይ ዉሪን ባቃቲዳ።

⁷ ዬሩሳላሜይ ሜቶቲዳ ዎዴኒኔ ዋዬቲዳ ጋላሳታን ካሴ ኢዚስ ዲዛ ኣቆታ ዩሻ ቆፓዉስ፤ ኢዛ ሞርኬ ኩሼን ኩንዲዳ ዎዴ ኢዞ ማዲዛይ ኦኒካ ባይንዳ ዎዴ፥ ኢዚ ሞርኬቲ ኢዚ ኩንዴ ቤኢዲ ኢዚ ቦላ ሚጪዳ።

⁸ ዬሩሳላሜይ ዳሮ ዴጾ ናጋራ ኦዱስ፤ ካስካ ኣታዱስ፤ ኢዛ ካሎ ዲሺን ቤኢዳ ጊሻስ ካሴ ኢዞ ቦንቺዳይቲ ኡባይ ኢዞ ካዳ፤ ኢዛካ ባ ባጋራ ዬላታዳ ቢታ ጼላሼ ጉዬ ሲማዱስ።

⁹ ኢዚ ቱናቴ ኢዚ ማይኦ ቦላ ቤቲዴስ፤ ሲንፌ ኢዚ ቦላ ሃናናይሳ ኢዛ ቆፓቤኩ፤ ኢዚ ኩንዴ ዳጋንዛዝ ጊዲዴስ፤ ኢዛ፥ «ታ ጎዳ ጾሶ! ታ ሜቶቲዛ ሜቶዛ ቤኣ፤ ታ ሞርኬቲ ታና ጾኒዳ» ጋ ዎሲንካ ኢዞ ሚንዛይ ኦኒካ ቤቲቤና።

¹⁰ ኢዚ ኣቆታ ኡባ ቦላ ሞርኬይ ባ ኩሼ ዬዲዴስ፤ ጾሳ ኣሳ ሺቆን ጌሎንታ ማላ ኔኒ ዲጊዳይቲ ኤቃ ጾሳታስ ጎይኒዛ ኣይዛቤቲ ጌዴ ኢዚ ጾሳ ኬን ጌሊሺን ቤኣዱስ።

¹¹ ኢዚ ኣሳይ ሚዛ ካ ዴማናስ ኮሻን ዳቡሬስ፤ ሼምፖራ ፓጻ ዳናስ ባስ ዲዛ ኣቆታ ማና ካራ ላሜቴስ፤ ዬሩሳላሜ ኣሳይ፥ «ኣቤት ጎዳዉ! ኑኒ ካዉዪዶስ፤ ኑና ጼላዳ ኑስ ቆፓ።

¹² «ጎዳ ጾሲ ባ ዎልቃማ ሃንቆዛ ኑ ቦላ ዬዲዳ ዎዴ ኑ ቦላ ጋኪዳ ሜቶ ማላ ሜቶይ ጋኪዳ ኣሲ ዲዛ ጊዲኮ ኢንቴኖ ኦጌራ ኣ ቢዛ ኡባቶ ኣኔ ቤኢቴ! ሃ ሜቶይ ኢንቴስ ካዉሻ ሚሳቲዜ?

¹³ «ኢዚ ቦላ ቃሶሆፔ ታማ ዬዲዴስ፤ ሄ ታማዚካ ኑስ ሜቄን ጌሊዴስ፤ ኑ ቶሆታ ቃቻናስ ጊቴ ዬጊዴስ፤ ሂስቲዲ ኑና ጉዬ ዛሪ ኩንዲሲዴስ፤ ኩሜ ጋላስ ኑና ዳቡርሲዴስ፤ ጮ ሜላካ ቶይላሲዴስ።

¹⁴ «ታ ናጋራ ሺሺ ቃቺዲ ታ ሞርጌን ዎዴስ፤ ታ ዎልቃካ ዉርሲዴስ፤ ታኒ ኤቄታናስ ዳንዳዮንታ ሞርኬታስ ጎዳይ ታና ኣ ኢሚዴስ።

¹⁵ «ኑ ጋርሳን ዲዛ ኦላንቻታ ኡባታራ ጾሲ ኤቄቲዴስ፤ ኑ ጊዶፌ ዬላጋታ ይሳናስ ኦላንቻታ ኑ ቦላ ዬዲዴስ። ዎይኔ ሚ ኣይፌ ኡሹ ኬሳናስ ዬዛ ማላ ጎዳይ ቦሼቶንታ ጌላኦ ሚሳቲዛ ዩሁዳ ኣሳ ዬዴስ።

¹⁶ «ሞርኬይ ኑ ቦላ ጎቢዴስ፤ ኑ ናይቲካ ባርካ ኣቲዳ፤ ኑና ዞሪ ሚንዛይቲ ኑፔ ሃኪዳ፤ ሄሳ ጊሻስ ታ ዬካይሲኔ ኣፉን ጉሳይስ።

¹⁷ ጺዮና ባ ኩሼ ሚጫዱስ፤ ኢዞ ሚንዛዴይ ዴና፤ ያቆቤ ዛሬታስ ሾሮቲ ኢዛስ ሞርኬ ጊዳና ማላ ጾሲ ኣዛዞ ኬሲዴስ፤ ዬሩሳላሜይካ ኢስታ ጊዶን ቱና ሚሻ ማላ ቆዴታዱስ።

¹⁸ «ጾሲ ጺሎ፤ ታኒ ጊዲኮ ኢዛ ኣዛዞ ቦላ ማካላዲስ፤ ኢንቴ ዉሪካ ሲዪቴ፤ ታ ሜቶዛካ ጼሊቴ፤ ማጫ ናይቲኔ ናቴ ኣቱማ ናይቲ ታፔ ዲኤቲ ቢዳ።

¹⁹ ታኒ ታ ዶሲዛይታ ጼይጋዲስ፤ ኢስቲ ጊዲኮ ታና ካዲዳ፤ ታ ቄሴቲኔ ጪማቲ ባ ሼምፖ ኣሻናስ ካ ኮዪሼ ካታማይ ጊዶን ዉሪዳ።

²⁰ «ኣቤት ጎዳዉ! ታ ዋዬዛ ቤኣ! ታ ጊዶ ኣሳቴይ ሜቶቲዴስ፤ ታ ኬሃ ማካላዲስ፤ ታ ዎዚናይካ ሜቂዴስ፤ ካሬን ጊዲን ሶን ዴራ ሃይቆይ ዉርሴስ።

²¹ «ዴሬይ ታ ዚላሊዛይሳ ሲዪዴስ፤ ጊዶ ኣቲን ኦኒካ ታና ሚንዛዴይ ቤቲቤና፤ ታ ሞርኬቲ ኡባይካ ታ ሜቶቶይሳ ሲዪዳ፤ ኔኒ ኦይሳካ ኤሪዲ ኢስቲ ኡፋዬቲዳ፤ ኔ ኢስታ ቦላ ኤሃና ጋ ቃቺዳ ጋላሳያ ዩ፤ ኢስቲካ ታ ማላ ዚላሌቶ።

²² «ኢስታ ኢታቴ ኔ ሲንን ቤቶ፤ ታ ናጋራ ጋሶን ኔ ታ ቦላ ኦይሳ ኢስታ ቦላካ ኦ፤ ታ ጬጫዳ ዚላሊዛ ዚላሳይ ዳሪዴስ፤ ታ ዎዚናይካ ዳቡርዴስ» ጊሼ ዋሴቴስ።