ኢያሶ ማጻፋ 8 - ጋሞ ማጻፋ

ኣዬ ካታማ ጾኔቴ

¹ ጎዳይ ኢያሶስ፥ «ያዮፋ፤ ዳጋሞፋ! ኦላንቻታ ኡባ ኔናራ ኤካዳ፥ ኣዬ ካታማ ባዳ ኦላ። ሄኮ ኣዬ ካታማ ካዎ፥ ኢዛ ዴራ፥ ኢዛ ካታማኔ ኢዛ ቢታ ታኒ ኔ ኩሼን ኣ ኢማዲስ።

² ኔኒ ኢያርኮ ካታማኔ ኢዛ ካዎዛ ይሲዳ ማላ ኣዬ ካታማኔ ኢዛ ካዎዛካ ይሳና። ጊዶ ኣቲን ቦንቂዳ ሃሮዛኔ ዲኢዳ ሜሄዛ ኢንቴስ ኤኪቴ። ካታማፔ ጉዬ ባጋራ ዛማዲ ናጊዛ ኦላንቻታ ዎ» ጊዴስ።

³ ሂስቲን ኢያሶይኔ ኦላንቻቲ ኡባይ ኣዬ ኦላናስ ዴንዲዳ። ኢያሶይ ባ ኦላንቻታ ጊዶፌ 30,000 ጊዲዛ ሚኖ ኦላንቻታ ዶሪዲ ቃማራ ዬዲዴስ።

⁴ ኢያሶይ ኢስታስ፥ «ሲዪቴ፥ ካታማፔ ጉዬ ባጋራ ዛማዲ ናጊቴ፤ ካታማፔ ሃኮፍቴ፤ ኡባይካ ሚኒ ናጊቴ።

⁵ ታኒኔ ታናራ ዲዛ ኣሳ ኡባይ ካታማይኮ ሺቃና፤ ሄ ዎዴ ኣዬ ካታማ ኣሳይ ካሴይሳካ ኑናራ ኦሌታና ጊዲ ኑኮ ኬዚሺን ኑኒ ኢስታፌ ባቃታና።

⁶ ካታማፔ ኢስቲ ኡባይ ኬዛና ጋካናስ ኑኒ ኢስታ ሲንፌ ባቃታና፤ ሂስቲዳ ማላ ኢስታስ፥ ‹ካሴይሳ ኢስራኤሌቲ ኑ ሲንፌ ባቃቴቴስ› ጊሼ ኑ ኢስታ ካሌዲ ሃሲ ኤፋና ጋካናስ ኢስቲ ኑና ካላና፤ ኑኒካ ኢስታፌ ባቃታና።

⁷ ሄ ዎዴ ኢንቴ ቆቴቲዳሶፔ ኬዚዲ ካታማዮ ኦይካንዴታ፤ ጎዳ ኢንቴ ጾሳይ ካታማዮ ኢንቴስ ኣ ኢማና።

⁸ ካታማዮ ኦይኪዳፔ ጉዬ ጎዳይ ኣዛዚዳ ማላ ታማን ጹጊቴ፤ ቤኢቴ ታኒ ኢንቴና ኣዛዛዲስ» ጊዴስ።

⁹ ሂስቲዲ ኢያሶይ ኦላንቻታ ዬዲዴስ፤ ኢስቲ ቢዲ ኣዬ ካታማፔ ኣርሼይ ዉሊዛሶ ባጋራ ዲዛ ቤቴሌሲኔ ኣዬስ ጊዶን ዛማዲ ናጊዳ፤ ጊዶ ኣቲን ኢያሶይ ሄ ጋላሳ ኦማርስ ኣሳራ ኢሲፌ ኣቂዴስ።

¹⁰ ኢያሶይ ዎንቴ ጋላስ ዎንታራ ዴንዲዲ ኦላንቻታ ኡባ ሺሺዴስ፤ ኢዚኔ ኢስራኤሌ ጋዳዋቲ ኦላ ኣሳ ካሌዲ ኣዬ ቢዳ።

¹¹ ኢዛራ ዲዛ ኦላንቻቲ ኡባይ ካታማይስ ሲን ቢ ማቲዳ፤ ሄሳፌ ጉዬ ቃሴ ኣዬ ካታማፔ ፑዴሃ ባጋራ ዲዛ ሾባፌ ሄ ፒንን ዱንካኒዳ።

¹² ኢያሶይ 5,000 ጊዳና ኦላንቻታ ኤኪዲ ካታማይፔ ኣርሼይ ዉሊዛ ባጋራ ቤቴሌፔኔ ኣዬፔ ጊዶን ዛማዲ ኡታና ማላ ኦዴስ።

¹³ ካታማይፔ ፑዴሃ ባጋራ ዲዛ ኦላንቻታኔ ካታማይፔ ኣርሼይ ዉሊዛ ባጋራ ዛማዲ ኡቲዳ ኦላንቻታ ኡባ ሶሆ ሶሆ ኦይዴስ። ሄ ጋላሳ ኦማርስ ኢያሶይ ዱጌ ሾባ ዎዴስ።

¹⁴ ኣዬ ዴሬ ካዎይ ሄሳ ቤኢዲ ኢዚኔ ኢዛ ኦላንቻቲ ኡባይ ኢስራኤሌ ኣሳ ኦላናስ ኣራቤፔ ሲን ባጋራ ዲዛሶሆ ዪዳ። ጊዶ ኣቲን ካዎዚ ካታማይፔ ጉዬ ባጋራ ዛማዲ ናጊዛይቲ ዲዛይሳ ኤሪቤና።

¹⁵ ኢያሶይኔ ኢስራኤሌ ኣሳይ ኡባይ ጾኔቲዳ ሚሳቲዲ ባዞ ሲሚ ባቃቲዳ።

¹⁶ ኣዬ ኣሳይ ኡባይ ኢስታ ዬዴናስ ጼይጌቲዳ፤ ኢያሶካ ዬዴዳ፤ ሄሳ ኦዲ ኣዬ ኣሳይ ካታማፔ ሃካና ማላ ኦዳ።

¹⁷ ኢስራኤሌ ኣሳ ዬዴናስ ኣዬፔኔ ቤቴሌፔ ኬዞንታ ኣቲዳ ኣቱማሲ ዴና፤ ካታማዮ ዶያ ዬጊዲ ኢስራኤሌ ዬዴዳ።

¹⁸ ሄሳፌ ጉዬ ጎዳይ ኢያሶስ፥ «ካታማዮ ታ ኔ ኩሼን ኣ ኢማና፤ ኔ ኦይኪዳ ቶራ ኣዬ ቦላ ጾንጋናስ ማላ ጼላ» ጊዴስ። ሂስቲን ኢያሶይ ባ ቶራ ካታማኮ ዛሪዲ ማሊዴስ።

¹⁹ ኢያሶይ ቶራ ሄ ዛሪ ማሊዳ ማላ ካሴ ዛማዲ ኡቲዳ ኦላንቻቲ ባንቲ ቆቴቲዳሶፔ ኤሶን ኬዚዳ። ዎጺ ጌሊዲ ኦይኪዳ፤ ሄራካ ኢዞ ታማን ጹጊዳ።

²⁰ ኣዬ ኣሳይ ጉዬ ሲሚዲ ጼሊሺን ካታማይፔ ጩዋይ ሳሎ ኬዚዛይሳ ቤኢዳ። ባዞ ባቃቲዳ ኢስራኤሌ ኣሳይ ኢስታ ቦላ ሃ ሲሚ ዎዳ ጊሻስ ኢስታስ ቢዛሶይ ይዴስ።

²¹ ኢያሶይኔ ኢስራኤሌ ኣሳይ ኡባይ ዛማዲ ኡቲዳ ኦላንቻቲ ካታማ ኦይኪዳይሳኔ ጩዋይ ሳሎ ኬዚዳይሳ ቤኢዳ ማላ ጉዬ ሲሚዲ ኣዬ ኣሳ ቦላ ሜቶ ዬጊዳ።

²² ዛማዲ ኡቲዳ ኦላንቻቲካ ካታማይፔ ኢስታ ቦላ ኬዚዳ። ሄሳ ጊሻስ ኢስራኤሌ ኦላንቻቲ ኢስታ ያራ ሃራ ጊዶዲ ዲፒ ሂስቲዳ፤ ኢሲ ኣሲካ ኣቲቤና።

²³ ጊዶ ኣቲን ኣዬ ካዎ ጻላ ሼምፖራ ፓጻ ኦይኪዲ ኢያሶኮ ኤሂዳ።

²⁴ ኢስራኤሌ ኣሳይ ኣዬ ኣቱማ ኣሳ ኡባ ዬዴዳ ዴምባኒኔ ባዞን ኢሳ ኢሳ ቃራ ማሻን ዎ ዉርሲዳፔ ጉዬ ሲሚዲ ካታማዮ ቢዲ ሄን ቤቲዳ ኣስ ኡባ ዎዳ።

²⁵ ሄ ጋላስ ኣዬ ኣሳይ ኡባይ ሃይቂዴስ፤ ሃይቂዳ ኣሳ ኡባ ቆዳይ 12,000 ጊዲዴስ።

²⁶ ኢያሶይ ኣዬ ካታማይን ዲዛ ኣሳ ሙሌራ ይሳና ጋካናስ ካታማኮ ማሊ ዎዳ ቶራ ዱጌ ዎቤና።

²⁷ ጊዶ ኣቲን ጎዳይ ኢያሶ ኣዛዚዳ ማላ ኢስራኤሌ ኣሳይ ሄ ካታማይን ዲዛ ሜዶሳታኔ ዲኢዳ ሚሻታ ባስ ኤኪዳ።

²⁸ ኢያሶይ ኣዬ ካታማ ጹጊዴስ፤ ሃች ጋካናስ ቤቲዛ ማላ ሜርናስ ቢዲን ዶሬኔ ቡላ ኬሲዴስ።

²⁹ ኣዬ ዴሬ ካዎ ሚ ቦላ ካቂዴስ፤ ኢዛ ኣሃዛ ኦማርስ ጋካናስ ሄ ሚ ቦላ ኣጋጊዴስ፤ ኣርሼይ ዉሊሺን ኢያሶይ ኢዛ ኣሃ ካታማ ፔንጌ ቦላ ዬጋና ማላ ኣዛዚዴስ፤ ኢዛ ቦላ ዳሮ ሹች ኮሪዳ፤ ሹቻይ ሃች ጋካናስ ሄ ሶሆን ዴስ።

ኤባሌ ዙማ ቦላ ኦራጺዳ ጫቆ ቃላ

³⁰ ሄሳፌ ጉዬ ኢያሶይ ኤባሌ ዙማ ቦላ ጎዳስ ኢስራኤሌ ጾሳስ ያርሾ ያርሺዛሶሆ ጊግሲዴስ።

³¹ ጎዳ ኣይሌ ሙሴይ ኢስራኤሌ ኣሳ ኣዛዚዳ ማላኔ ሙሴ ዎጋ ማጻፋን ጻፌቲዳ ማላ ያርሺዛሶሆዚ ማሴቶንታኔ ቢራታይ ቦቾንታ ሹቻፌ ኬሌቲዴስ። ኢዛን ጎዳስ ጹጌቲዛ ያርሾኔ ኢሲፌቴ ያርሾ ያርሺዳ።

³² ኢያሶይ ሙሴይ ጻፊዳ ዎጋ ማጻፋ ኢስራኤሌ ኣሳይ ጼሊሺን ሹቻ ቦላ ዎጪ ጻፊዴስ።

³³ ኢስራኤሌ ኣሳይ ኡባይ፥ ቤቴ ኣሳቲ፥ ጪማቲ፥ ሹሜቲኔ ዳናቲ ኡባይ ጎዳ ጫቆ ቃላ ታቦታ ቶኪዳ ሌዌ ዛሬ ጊዲዳ ቄሴታ ሲንን ጫቆ ቃላ ታቦታፔ ኡሻቻ ባጋራኔ ሃዲርሳ ባጋራ ኤቂዳ። ጎዳ ኣይሌ ሙሴይ ካሴ ኣዛዚዳ ማላ ኢስራኤሌ ኣሳ ኣንጃናስ ኢስታፌ ባጋ ኣሳይ ጋሪዛኔ ዙማኮ፥ ባጋ ኣሳይ ኤባሌ ዙማኮ ሲሚ ኤቂዴስ።

³⁴ ሄሳፌ ጉዬ ዎጋ ማጻፋን ጻፌቲዳ ማላ ኢያሶይ ዎጋ ቃላ ኣንጆኔ ቃንጌ ኡባ ናባቢዴስ።

³⁵ ሙሴይ ኣዛዚዳ ኡባፌ ኢያሶይ ናባቦንታ ኣጊዳ ኢሲ ቃላይካ ዴና። ኩሜ ኢስራኤሌ ዴራስ፥ ማጫሳስ፥ ናይታሲኔ ኢስታ ጊዶን ዲዛ ቤቴ ኣሳታስ ኡባስ ናባቢዴስ።