ኢያሶ ማጻፋ 19 - ጋሞ ማጻፋሲሞና ቆሞታ ጋኪዳ ቢታ 1 ናምኣን ሳማይ ሲሞና ቆሞታ ኢስታ ዛርኬን ዛርኬን ጋኪዴስ። ኢስታ ጋኪዳ ቢታይ ዩሁዳ ቆሞቲ ላቲዳ ቢታይ ኢስቲ ላቲዳ ቢታ ጊዶ ኡቲዴስ። 2 ኢስቲ ላቲዳ ካታማቲ ቤርሳቤሄ፥ ሼባኤ፥ ሞላዴ፥ 3 ሃጻሬ-ሹኣሌ፥ ባላ፥ ኤጼሜ፥ 4 ኤልቶላዴ፥ ባቱሌ፥ ሆርማ፥ 5 ጺጊላጌ፥ ቤቲ-ማርካቦቴ፥ ሃጻሬ-ሱሳ፥ 6 ቤቲ-ላባኦቴኔ ሻሩሄኔ። ሄይቲ ኡባይ 13 ካታማታኔ ኢስታ ዩሾን ዲዛ ጉታታ። 7 ቃሴ ኣዪኔ፥ ኣርሞኔ፥ ኤቴሬኔ ኣሻኔ ጌቴቲዛ ኦይዱ ካታማታኔ ኢስታ ዩሾን ዲዛ ጉታታ። 8 ባኣላቴ-ባኤሬ ዎይኮ ኔጌቤን ዲዛ ኣራማቴሜ ጋካናስ ዲዛ ካታማታ ዩሾን ዲዛ ጉታታ ኡባ ላቲዳ። ሲሞና ቆሞቲ ባ ዛርኬን ዛርኬን ጊሼቲ ኤኪዳ ቢታቲ ሄይታንታ። 9 ዩሁዳ ቆሞቲ ኦይኪዳ ጺንጾይ ኬሂ ኣኮ ጊዲዳ ጊሻስ ሲሞና ቆሞታስ ጺንጾ ጊዲ ኢሜቲዴስ፤ ሄሳ ጊሻስ ሲሞና ቆሞቲ ዩሁዳ ቆሞታ ጊሻፔ ጊሼቲ ኤካና ዳንዳይዳ። ዛቢሎኔ ቆሞታ ጋኪዳ ቢታ 10 ሄን ሳማይ ዛቢሎኔ ቆሞታስ ኢስታ ዛርኬን ዛርኬን ጋኪዴስ። ኢስቲ ላቲዳ ቢታ ዛዋይ ሳሪዴ ጋኬስ። 11 ቃሴ ሄሳፌ ቢዲ ኣርሼይ ዉሊዛሶራ ማራላ ባጋራ ካን ቤስ፤ ዳባሼቴ ማታራ ዮቂናኣሜ ኣቻን ዲዛ ሻፋን ቢ ጌሌስ። 12 ሃራ ባጋራ ቃሴ ሳሪዴ ካታማፔ ኣርሼይ ሞኪዛሶ ባጋ ሲሚዲ ኪሲሎቴ-ታቦሬራ ካን ቢዲ ዳቢራቴራ ጌዴ ያፊኣ ቤስ። 13 ሄራ ጌዴ ኣርሼይ ሞኪዛ ባጋራ ጌት-ሄፌሬኔ ኤቲ-ቃጺኔ ካን ቤስ፤ ሄፔካ ጌዴ ኣርሞኔ ጋኪዲ ኒኣ ባጋ ሚርቄቴስ። 14 ፑዴሃ ባጋራ ሃናቶኔ ሲሚዲ ዪፍታሂኤሌ ሾባን ጋኪ ኤቄስ። 15 ቃሴካ ቃጻቴ፥ ናሂላሌ፥ ሺሚሮኔ፥ ኢዳሌኔ ቤቴሊሄሜ ጌቴቲዛ ካታማቲካ ዴቴስ። ኢስቲ ዉሪ 12፤ ኢስታ ዩሾን ዲዛ ጉታቲካ ኢስታን ጉጄቴቴስ። 16 ሃይቲ ዛቢሎኔ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ጉታታ። ዪሳኮሬ ቆሞታ ጋኪዳ ቢታ 17 ኦይዳን ሳማይ ዪሳኮሬ ቆሞታ ኢስታ ዛርኬን ዛርኬን ጋኪዴስ። 18 ኢስታ ቢታቲ ሃይሳፌ ካሊዛይታ፤ ኢዝራኤሌ፥ ካሱሎቴ፥ ሱኔሜ፥ 19 ሃፋራኢሜ፥ ሺኦኔ፥ ኣናሃራቴ፥ 20 ኤራቢቴ፥ ቂሶኔ፥ ኣቤጼ፥ 21 ኤሬሜቴ፥ ኤን-ጋኒሜ፥ ኤን-ሃዳኔ ቤቲ-ጳጼጼ። 22 ሄ ቢታታ ዛዋይ ታቦሬ፥ ሻሃጹሜኔ ቤቲ-ሼሚሼ ቦቺ ቢዲ፥ ዮርዳኖሴ ሻፋን ጌሌስ። ኢስቲ ኡባይ ታማኔ ኡሱፑን ካታማታ፤ ኢስታ ዩሾን ዲዛ ጉታቲካ ኢስታን ጉጄቴቴስ። 23 ሃይቲ ዪሳኮሬ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ጉታታ። ኣሴሬ ቆሞታ ጋኪዳ ቢታ 24 ኢቻሻን ሳማይ ኣሴሬ ቆሞታ ኢስታ ዛርኬን ዛርኬን ጋኪዴስ። 25 ኢስታ ቢታቲ ሃይሳፌ ካሊዛይታ ሄልቃቴ፥ ሃሌ፥ ቤጼኔ፥ ኣኪሻፌ፥ 26 ኣላሜሌኬ፥ ኣማዴኔ ሚሻሌ። ኣርሼይ ዉሊዛሶ ባጋራ ቃርሜሎሴራኔ ሺሆሬ-ሊቢናቴራ ዛዋቴስ። 27 ቃሴ ኣርሼ ኬሳሶ ባጋ ሲሚ ቤቲ-ዳጎኔኮ ሚርቄቲዲ፥ ዛቢሎኔ ቢታኔ ዪፍታሂኤሌ ሾባራ ካን ቢዲ ካቡሌ ሃዲርሳ ቦላ ዬጊዲ ፑዴሃ ባጋራ ቤቲ-ኤሜቄኔ ናኢኤሌ ቤስ። 28 ሄሳፌ ቃሴ ኤቢሮኔ፥ ኤራሆቤ፥ ሃሞኔኔ ቃና ፑዱን ኬዚዲ ጊታ ሲዶና ጋኬስ። 29 ዛዋይ ኤራማ ሲሚዳፔ ጊምቤቲዳ ጺሮሴ ካታማኮ ሚርቄቲ ጌዴ ሆሳ ሲሚዲ ኣኪዚቤ ባጋራኔ ማሂሌቤ ጌዴ ሜዲቴራኔ ኣባን ጋኪ ጌሌስ። 30 ሄን ኡማ፥ ኣፌቄኔ ኤራሆቤ ጌቴቲዛ ካታማቲካ ዴቴስ። ኢስቲ ኡባይ 22፤ ኢስታ ዩሾን ዲዛ ጉታቲካ ኢስታን ጉጄቴቴስ። 31 ሃይቲ ኣሴሬ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ጉታታ። ኒፍታሌሜ ቆሞታ ጋኪዳ ቢታ 32 ኡሱፑን ሳማይ ኒፍታሌሜ ቆሞታ ኢስታ ዛርኬን ዛርኬን ጋኪዴስ። 33 ኢስታ ዛዋይ ሄሌፌፔኔ ዛናኒሜን ዲዛ ጊታ ዎላፔ ዶሚዲ ኣዳሜ-ኔቄቤ፥ ያቢንኤሌኔ ላቁሜ ካን ቢዲ ዮርዳኖሴ ሻፋ ጌሌስ። 34 ዛዋዚካ ኣርሼይ ዉሊዛ ባጋራ ኣዚኖቴ-ታቦሬኮ ሚርቄቴስ፤ ሄሳፌ ቃሴ ሁቆቄ ሲሚዲ ዱጌሃ ባጋራ ዛቢሎኔ ቢታኒኔ ኣርሼይ ጌሊዛ ባጋራ ኣሴሬ ቢታን ዛዋቲዲ ኣርሼይ ኬዚዛ ባጋራ ዮርዳኖሴ ሻፋን ጌሌስ። 35 ጊምቤቲዳ ካታማቲካ ጺዲሜ፥ ጼራ፥ ሃማቴ፥ ኤራቃቴ፥ ኪኔሬቴ፥ 36 ኣዳማ፥ ኤራማ፥ ሃጾሬ፥ 37 ቃዴሴ፥ ኤዲራኤ፥ ኤን-ሃጾሬ፥ 38 ዪሮኔ፥ ሚጊዳልኤሌ፥ ሆሬሜ፥ ቤቲ-ኣናቴኔ ቤቲ-ሼሚሼ። ኢስቲ ዉሪ 19፤ ኢስታ ዩሾን ዲዛ ጉታቲካ ኢስታን ጉጄቴቴስ። 39 ሃይቲ ኒፍታሌሜ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ኢስታ ዩሾን ዲዛ ጉታታ። ዳኔ ቆሞታ ጋኪዳ ቢታ 40 ላፑን ሳማይ ዳኔ ቆሞታ ኢስታ ዛርኬን ዛርኬን ጋኪዴስ። 41 ኢስቲ ላቲዳ ቢታቲ ጾራኣ፥ ኤሽታኦሌ፥ ኢር-ሼሜሼ፥ 42 ሻኣልቢኔ፥ ኣያሎኔ፥ ዪታላ፥ 43 ኤሎኔ፥ ቴሚና፥ ኣቃሮኔ፥ 44 ኤልቴቄ፥ ጋባቶኔ፥ ባኣላቴ፥ 45 ዩሁዳ፥ ባኔ-ባራቄ፥ ጌት-ኤርሞኔ፥ 46 ሜያርቆኔ፥ ኤራቆኔኔ ዮጴ ካታማ ዩሾን ዲዛ ሄራታ ኡባ ኦይኬስ። 47 ጊዶ ኣቲን ዳኔ ቆሞታስ ኢሜቲዳ ጺንጾይ ኢስታስ ጊዶንታ ኣጊዳ ጊሻስ ላይሻ ካታማ ኦሊ ኦይኪዳ፤ ሄ ካታማን ዲዛ ኣሳ ጊ ማሻን ሲፊ ዉርሲዲ ካታማ ባስ ኤኪዲ ሄን ኡቲዳ። ሄ ካታማ ሱንካ ላሚዲ ባ ኣዋ ዳኔ ሱንን ጼይጊዳ። 48 ሃይቲ ዳኔ ቆሞታስ ጺንጾ ጊዲዲ ኢስታ ዛርኬን ዛርኬን ጊሻን ጋኪዳ ካታማታኔ ጉታታ። ኢያሶ ጋኪዳ ቢታ 49 ኢስራኤሌ ኣሳይ ባንታና ጋኪዳ ቢታ ኤኪዳፔ ጉዬ ናዌ ና ኢያሶስ ባንታ ቢታፌ ጺንጾ ጋዴ ኢሚዳ፤ 50 ጎዳይ ኣዛዚዳ ማላኔ ኢያሶይ ኮይዛ ማላ ኤፍሬሜ ጌዜ ዴሬን ዲዛ ቴሚናቴ-ሴራሃ ጌቴቲዛ ካታማ ኢዛስ ኢሚዳ። ኢዚካ ካታማዮ ሎኤዲ ባስ ዱሳሶ ኦዴስ። 51 ቄሴ ኤልኤዜሬይ፥ ናዌ ና ኢያሶይኔ ኢስራኤሌ ቆሞታ ኮራፒኔቲ ሴሎን ጋይቶቴ ዱንካኔዛ ፔንጌን ጎዳ ሲንን ሳማ ዬጊዲ ጊሺዳ ጺንጾ ቢታይ ሃይሳ። ኢስቲ ቢታ ጊሼሬ ጊጊዳ። |
The Word for the World International amp The Word for the World Ethiopia