ኢያሶ ማጻፋ 16 - ጋሞ ማጻፋ

ዮሴፌ ቆሞታ ጋኪዳ ቢታ

¹ ዮሴፌ ዛሬታ ጋኪዳ ቢታይ ኢያርኮ ማታን ዮርዳኖሴ ሻፋፔ ዶሚዲ ኢያርኮ ፑልቶታፔ ኣርሼይ ሞኪዛ ባጋራ ባዞ ካንዲ ጌዜቲዛ ቢታራ ኣዲ ቤቴሌ ጋኬስ።

² ሎዛ ጌቴቲዛ ቤቴሌፔ ዴንዲዲ ኣጻሮቴ ጌቴቲዛ ኣርኬታ ቢታ ጋኬስ።

³ ሄሳፌ ኣርሼይ ዉሊዛ ባጋራ ዲዛ ያፋሌጼታ ቢታ ዱጉን ዱጌ ቤቲ-ሆሮኔ ዎዲ ጌዜሬራ ካን ቢዲ ጊታ ኣባን ጌሌስ።

⁴ ዮሴፌ ቆሞ ሚናሴ ዛሬቲኔ ኤፍሬሜ ዛሬቲ ባንታና ጋኪዛ ቢታ ላቲዳ።

⁵ ኤፍሬሜ ዛሬታ ኢስታ ዛርኬን ዛርኬን ጋኪዳ ቢታይ ሃይሳፌ ካሊዛይሳ፤ ኢስታ ዛዋይ ኣርሼይ ሞኪዛ ባጋራ ዲዛ ኣጻሮቴ-ኣዳሬፔ ቢዲ ጋና ቤቲ-ሆሮኔ ጋኬስ።

⁶ ሄፔ ቢዲ ዎጋ ኣባን ጌሌስ። ቃሴ ፑዴሃ ባጋራ ዲዛ ዛዋይ ሚኪማታቴፔ ኣርሼይ ሞኪዛሶ ባጋ ታናቴ-ሺሎራ ሚርቄቲ ሲሚዲ፥ ኣርሼይ ሞኪዛሶ ባጋራ ዲዛ ያኖኬ ጋኬስ።

⁷ ያኖኬፔ ዱጌ ኣጻሮቴኔ ናራቴ ዱጉን ዎዲ ኢያርኮራ ካን ቢዲ ዮርዳኖሴ ሻፋን ጌሌስ።

⁸ ዛዋዚ ታጱሄፔ ኣርሼይ ዉሊዛ ባጋራ ቢዲ ቃና ሻፋራ ዎ ቢዲ ሜዲቴራኔ ኣባን ጌሌስ። ኤፍሬሜ ዛሬቲ ባ ዛርኬን ዛርኬን ላቲዳ ቢታይ ሃይሳ።

⁹ ሄሲ ሚናሴ ዛሬታ ቢታፌ ኤፍሬሜ ዛሬታስ ኢሚዳ ካታማታኔ ኢስታ ጉታታ ኡባ ጋ ኦይኪዴስ።

¹⁰ ሃይሲ ኡባይ ሃኒንካ ኤፍሬሜ ዛሬቲ ጌዜሬ ካታማን ዲዛ ካናኔ ኣሳታ ኬሲ ጎዲቤቴና። ካናኔ ኣሳቲ ሃች ጋካናስ ኤፍሬሜ ዛሬታራ ኢሲፌ ዴቴስ። ጊዶ ኣቲን ኤፍሬሜ ዛሬቲ ኢስታ ዎልቃራ ኦሲሴቴስ።