ኢዮቤ ማጻፋ 9 - ጋሞ ማጻፋ

ኢዮቤ ሃሳያ

¹ ኢዮቢ ሂዝጊ ዛሪዴስ፤

² «ኤ! ታኒ ሃይሲ ቱሙ ጊዲዳይሳ ኤራይስ፤ ጊዶ ኣቲን ኣሲ ጾሳ ሲንን ዋኒ ጺሎ ጊዳናስ ዳንዳይዜ?

³ ኢዛራካ ኦኒ ማርሼታናስ ዳንዳይዜ? ኢዚ ኢሲ ሺ ኦይሾታ ኦይቺዛ ጊዲኮ ኢስታፌ ኢሲኖካ ዛራናስ ዳንዳይዛዴይ ዴና።

⁴ ጾሲ ኤራንቻኔ ዎልቃማ፤ ኢዛራ ኤቄቲዲ ጾኔቶንታይ?

⁵ ኣኬኮንታ ዙማታ ኮኮርሳና፤ ባ ሃንቆዛንካ ሺሬቺ ዬጋና።

⁶ ጾሲ ቢታ ዲዛሶፔ ኮኮርሳና፤ ቢታ ቱሳታካ ቃሴና።

⁷ ኣዋ ኣርሼይ ሞኮንታ ማላ ኦናዉ ዳንዳዬስ፤ ጾሊንቴቲካ ፖኢሶንታ ማላ ኦና።

⁸ ኦኒካ ማዶንታ ዲሺን ሳሎታ ሚጪዳይ ኢዛ፤ ኢዚ ኣባ ዳምባላ ቦላ ሄሜቴስ።

⁹ ዛርዶ፥ ኦሪዮኒኔ ፒሊያዲሴ ጌቴቲዛ ጾሊንቴታ፥ ቃሴካ ዱጌ ባጋራ ዲዛ ዳሮ ጾሊንቴታ፥ ሳሎ ቦላ ሜ ዎዳይ ጾሳ።

¹⁰ ኢዚ ኦዛ ማላሊሲዛ ሚሻታ ኑኒ ፒልጊዲ ኣኬካናዉ ዳንዳዮኮ፤ ኢዚ ፖሊዛ ማካላ ሚሻታ ኑኒ ቆዳናዉ ዳንዳዮኮ።

¹¹ «ጾሲ ታ ማታራ ኣኮካ ታ ዴሚኬ፤ ሃ ታኮ ሺቂኮካ ሻካዳ ኤሪኬ።

¹² ኢዚ ባ ኮዪዳይሳ ኤኪኮ ኦኒካ ኢዛ ዲጌና፤ ‹ኣይስ ሃይሳ ኦይ?› ጊዲ ኢዛ ኦይቻናስ ጻሊዛይ ዴና።

¹³ ጾሳይ ባ ሃንቆዛፔ ጉዬ ሲሜና፤ ኤራኣቤ ጌቴቲዛ ኣባ ጊዶ ዶኣታ ማዲዛይቲካ ኢዛ ቶሆ ጋርሳን ጉልባታና።

¹⁴ «ሂስቲን ታኒ ኢዛስ ዛሮ ዋና ኢማና ዳንዳያዚና? ኢዛራ ማርሼታናስ ኣይ ቃላ ታ ዴማኔ?

¹⁵ ጌሽ ጊዳ ታ ቤቲዳኮካ፤ ታ ቦላ ፒርዲዛዴይ ታና ማራና ማላ ዎሳና ኣቲን ኢዛስ ዛሮ ኢማናስ ጻሊኬ።

¹⁶ ታ ኢዛ ሱን ጼይጊኮ ኢዚ ዛሮ ታስ ኢሚዛ ጊዲኮካ ታ ማጋና ኢዚ ሲያና ጋዳ ታ ኣማኔቲኬ።

¹⁷ ኢዚ ታና ጎቴ ጫርኮን ሊቂሳና፤ ኣይኮ ጋሶይካ ባይንዳ ታስ ማዱን ሃ ዳርሳና።

¹⁸ ሼምፖ ታ ዛራና ዎዴይ ጋካናስካ ታስ ሼምፖ ኢሜና፤ ታ ሼምፖን ዋዬ ኩንዴስ።

¹⁹ ታስ ዲዛ ዎልቃን ታ ኢዛራ ባጼታና ጎንታ ማላ ዎልቃን ኢዛራ ኤቄቲዲ ዳንዳያናይ ዴና፤ ታ ሞቴታዳ ኢዛ ላና ጎንታ ማላ ኢዛ ፒርዲዛ ኣሳታኮ ሺሻናስ ዳንዳይዛ ኣሲ ዴና።

²⁰ ታኒ ጌሺኔ ጺሎኮሺን ታ ሃሳያይ ታና ቆሃንቻ ኬሴስ፤ ታ ሃሳይዛ ሃሳያቲ ኡባይ ታ ቦላ ፒርዴቴስ።

²¹ «ኣይኮካ ታኒ ቦሬይ ባይንዳዴ ጊዲኮካ ታ ጊሻስ ቆፒኬ፤ ታ ሼምፖዮካ ሃራሴታይስ።

²² ጾሲ ጺሎዛኔ ቆሃንቻዛካ ይሲዛ ጊሻስ ኣይኮ ዱማቴካ ዴና ታ ጊዳይ ሄሳ ጊሻሳ።

²³ ኣሲ ኢታ ሜቶን ዉርሺን ኢዚ ጌሻ ኣሳ ሜቶ ቂስ።

²⁴ ቢታይ ኢታ ኣሳታ ኩሼን ኣ ኢሜቲሺን ኢዚ ፒርዲዛ ኣሳታ ኣይፌ ጎዜስ፤ ሃይሳ ኦዳይ ጾሳ ጊዶንታ ኣጊኮ ሃራይ ኦኔ?

²⁵ «ታ ላይቲ ዎጺዛይታፔ ሃ ኣ ኤሶቴቴስ፤ ኣይኮ ኡፋይሲካ ታ ዴሞንታ ኣቴስ።

²⁶ ኢስቲካ ሶኬ ጊዛይሳፌ ኦሴቲዳ ዎጎሎ ማላ ኤሶቴቴስ፤ ባቂ ኤኪዛ ጎሌ ካፎ ማላ ኤሶቴቴስ።

²⁷ ታኒ ታ ዙዙን ባላና፤ ‹ታ ሲንካ ካሬ ኣጋዳ ኣኔ ፖኢሳ ቤሳይስ› ጊኮ፥

²⁸ ጾሲ ታና ጌሽ ኦዲ ቆዶንታይሳ ታኒ ኤሪዛ ጊሻስ ሜቶይኔ ዋዬይ ታ ቦላ ጋካና ጋዳ ያያይስ።

²⁹ ሂስቲን ታ ቆሃንቻ ጌቴታ ቆዴቲዳ ጊዲኮ ታስ ሃዳ ዳቡራይ ኣዛሴ?

³⁰ ታኒ ታ ኣሳቴ ሳሙናን ሜጪዛ ጊዲኮ፥ ታ ኩሼዛካ ኬሃ ጌሺዛ ጊዲኮ፥

³¹ ሃ ኡባ ኦንካ ኔኒ ዱጌ ኢታ ጪማን ታና ኦላና፤ ታ ማይኦቲካ ታና ሻቴታና።

³² ኢዚ ታ ማላ ኣስ ጊዶንታ ጊሻስ፥ ፒርዲዛ ኣሳታኮ ቢዲ ፒርዴቶስ ጋናዉ ዳንዳይኬ።

³³ ኑ ቦላ ባ ኩሼዛ ጋ ዎዲ ፒርዲ ኑና ሻኪዛ ኣሲ ኑ ጊዶን ዲዛኮ፥

³⁴ ኢዛ ቴማቴ ታና ሂርጊሶንታ ማላ ጾሲ ባ ጉፌዛ ታ ቦላፌ ዴንዳኮ፥

³⁵ ታኒ ኢዛስ ያዮንታ ሃሳያናኮሺን፤ ሃኢ ጊዲኮ ታ ዲዛ ሃኖን ዳሼ ሃሳያና ዳንዳይኬ።