ኢዮቤ ማጻፋ 5 - ጋሞ ማጻፋ

¹ «ኢዮቤ! ኔ ጼይጊን ኔስ ኮያናዴይ ዲኮ ጼይጋ፤ ኔስ ማዶ ኢማና ማላ ኪታንቻታፔ ኣዋይሳኮ ጼላይ?

² ኤያ ኣስ ዪሎይ ዎና፤ ቃናቴይካ ኣስ ይሳና።

³ ኤያ ኣሲ ሚኒዲ ዲሺን ቤያዲስ፤ ጊዶ ኣቲን ኢዛ ኣቆይ ቆፖንታ ዲሺን ጾሳ ሃንቆን ላሌቲዴስ።

⁴ ኢዛ ናይቲካ ባ ዴኦዛስ ኣማንዛዝ ዴሜቴና፤ ዱቡሻንካ ኢስታ ጊሻስ ሃሳይዛ ኣስ ኢስቲ ዴሞንታ ጊሻስ ኢስታ ቦላ ቆሆይ ጋካና።

⁵ ኢዚ ዜሪዳ ካካ ኮሻቲዳ ኣሳቲ ማና፤ ሃራይ ኣቲን ኣጉን ጊዶን ሞኪዳይሳካ ኢዛስ ኣሼቴና፤ ሳሜቲ ኡቲዳ ኣሳቲ ኢዛ ሃሮዛ ኤካናስ ኣሞቴቴስ።

⁶ ሜቶይ ጮ ቢታፌ ዴንዴና፤ ዋዬይካ ጋዴፔ ጮ ኬዜና።

⁷ ታማ ፊንጼ ቦንቆፌ ዴንዲዲ ፑዴ ፊንጺዛ ማላ፥ ኣሲካ ዋዬስ ዬሌቴስ።

⁸ «ታኒ ኔና ጊዲዳኮ ጾሳ ዎሳና፤ ታ ሜቶ ኡባ ኢዛስ ቆንጪሳና።

⁹ ኢዚ ቆዳይ ባይንዳ ማላሊሲዛ ሚሽ፥ ፒልጊን ጋኬቶንታ ጊታ ሚሽ ኦስ።

¹⁰ ቢታ ቦላ ኢራ ቡኪሴስ፤ ጎሻታካ ሃን ሹጊሴስ።

¹¹ ካዉዪዳይታ ቦንቾን ቁ ሂስቴስ፤ ሙዞቲዛይታ ሚንዲ ኡፋይሴስ።

¹² ኢስታ ኦሶይ ፖሌቶንታ ማላ ጌኔ ኣሳታ ቆፋ ሃዳ ኦስ።

¹³ ጪንጫታ ኢስታ ጌኔ ኦሶዛን ዛሪ ኦይኬስ። ጌኔ ኣሳታ ቆፋካ ኤሶራ ይሴስ።

¹⁴ ጋላሳይ ኢስታስ ማ ጊዴስ፤ ቡሮ ሴታ ጋላሳን ኦማርስ ማ ጊዶን ዲዛ ማላ ኢስቲ ታታፌታና።

¹⁵ ማንቆታ ኢስታ ሞርኬታ ማሻፌ ኣሼስ፤ ሜቶታንቻታካ ዋዪሲዛይታ ኩሼፔ ኬሲ ኤኬስ።

¹⁶ ማንቆታስ ሂዶታ ኢሜስ፤ ማካላቴካ ቢታ ቦላፌ ይሴስ።

¹⁷ «ጾሲ ሴሪዛ ኣሲ ኣንጄቲዳይሳ፤ ሄሳ ጊሻስ ኡባ ዳንዳይዛ ጾሳ ሴራ ሌቆፋ።

¹⁸ ጾሲ ማዱንኮካ ዛሪዲ ፓስ፤ ኢዚ ሜንስ፤ ባ ኩሼን ዛሪዲ ኮሌስ።

¹⁹ ኡሱፑን ቆሞ ቦሻፔ ኔና ኣሺ ኤካና፤ ላፑንዛንካ ኣይ ቆሆይካ ኔ ቦላ ጋኬና።

²⁰ ኮሻ ላይን ኢዚ ኔና ሼምፖራ ፓጻ ዎና፤ ኦላ ላይንካ ኢዚ ኔና ሃይቆፔ ኣሻና።

²¹ ጾሲ ኔና ኢታ ኢንጻርሳፌ ናጋና፤ ቦሻይ ኔ ቦላ ዪኮካ ያያካ።

²² ዎልቃማታ ቆሆይኔ ኮሻይ ኔና ዳጋንና፤ ቢታ ዶኣታስካ ኔ ያያካ።

²³ ኔ ጎዪዛ ጋዴን ኔና ሹቺ ዋዪሴና፤ ዶኣታራካ ኔ ሳሮን ዳና።

²⁴ ኔ ኬን ሳሮይ ኩማናይሳ ኔ ሻካ ኤራና፤ ኔ ሜሄ ጼሊሺን ኣቆፔ ፓጬና።

²⁵ ኔ ዜሬይ ዳራናይሳ ኔ ኤራና፤ ኔ ዜሬይካ ዴምባን ዲዛ ማታ ማላ ዳራና።

²⁶ ካ ካጺዲ ማጼቲዛይሳ ማላ ኔካ ሎኤ ጪማዳ ዱፎን ባና።

²⁷ ኑኒ ሃይሳ ኡባ ፒልጊዲ ቱሙ ጊዲዳይሳ ኤሪዶስ፤ ኔኒካ ኣኬካዳ ሃይሳ ኦሶን ፔይሻ።»