ኢዮቤ ማጻፋ 40 - ጋሞ ማጻፋ

¹ ቃሴካ ጾሲ ኢዮቤስ፥

² «ኢዮቤ! ኣሲ ኡባ ዳንዳይዛ ጾሳራ ማርሼቲዲ ላና ኔስ ሚሳቲዜ? ታናራ ጾሳራ ማርሼቲዛይ ኔና ጊዲዳ ጊሻስ ኣኔ ታስ ዛራ» ጊዴስ።

³ ኢዮቢ ዛሪዲ፥

⁴ «ጎዶ! ታኒ ኣይኮ ማዶንታ ላፋ ኣሳ፥ ሃኒፌ ጉዬ ታ ኩሼን ታ ዶና ጎርዳዳ፤ ጮኡ ጉሳፌ ኣቲን ኔስ ታ ዛራና ዛሮይ ታስ ዴና።

⁵ ታኒ ኢሲቶ ጋናይሳ ጋዲስ፤ ጊዶ ኣቲን ታስ ዛሪዛ ሚሺ ባዋ፤ ሃይሳፌ ጉዬ ኡባካ ታ ሃሳይኬ» ጊዴስ።

⁶ ሄሳፌ ጉዬ ጎዳይ ጎቴ ጫርኮ ጊዶን ጊዲዲ ኢዮቤስ ሂዝጊዴስ፥

⁷ «ኣኔ ኣዴ ጊዲኮ ዴንዳዳ ጊጼታ፤ ታ ኦይቺዛይሳ ታስ ዛራ።

⁸ ታና ፒርዳ ጌላሲዛዴ ኬሳዳ ኔና ጺሎ ኣስ ኬሳናስ ዳፌታይ?

⁹ ጾሳ ዎልቃ ማላ ሚኖ ዎልቃይ ኔስ ዲዜ? ጾሳ ቃላ ጉን ማላ ኔ ቃላይ ጉማናዉ ዳንዳይዜ?

¹⁰ ሄሳ ማላ ጊዲኮ ኣኔ ኔ ቦንቾኒኔ ኔ ጊታቴን ዴንዳ! ኔ ቴማቴኔ ጊታቴ ማይኣ።

¹¹ ኦቶራንቻታ ቤያዳ ካዉሻ፤ ኔ ሃንቆዛ ኢስታ ቦላ ጉሳ።

¹² ኣኔ ሎኤ ጼላዳ ኦቶራንቻታ ኡባ ዬላቻ፤ ኢታ ኦዛይታ ኢስቲ ዲዛሶን ሄን ይሳ።

¹³ ኢስታ ኡባ ሞጎ ማይኦን ጻጻዳ ኢሲ ቦላ ዱፎን ሞጋ።

¹⁴ ሄሳፌ ጉዬ ኔኒ ኔ ዎልቃን ጾኒዛይሳ ታኒ ኔስ ማርካታና።

¹⁵ «ታኒ ኔና ሜዳይሳ ሆሪቄ ጌቴቲዛ ዶኣ ሜዲስ፤ ኢዚካ ቦራ ማላ ማታ ሜስ።

¹⁶ ኢዛስ ጼሳን ዲዛ ዎልቃ ቤያ፤ ኢዛስ ኡሎ ጊዶን ዲዛ ሻያ ሚኖቴ ጼላ።

¹⁷ ኢዛስ ጎይናይ ሊባኖሴ ዚጋ ሚ ማላ ሲቲ ጊዳይሳ፤ ኢዛስ ጌዳ ጻጶቲካ ሚኖኔ ኦርዴታ።

¹⁸ ኢዛ ሜቄቲካ ጻርቂማላኔ ቢራታ ማርጮ ማላ ሚኖታ።

¹⁹ ታ ሜዳ ሜታ ኡባፌ ዎልቃማ፤ ታፔ ኣቲን ኢዛ ጾናናይ ሃራይ ዴና።

²⁰ ዎራ ዶኣቲ ኡባይ ካኢዛ ዙማይ፥ ኢዛስ ሚዛ ሚሽ ሞኪሴስ።

²¹ ኩዋይ ዲዛ ሚ ጋርሳን፥ ማቃ ጊዶኒኔ ሃ ዲዛሶ ጫሬ ጊዶን ኢቼስ።

²² ኩዋይ ዲዛ ሚቲ ኢዛ ባንታ ኩዋን ጌንቴስ፤ ሻፋ ዶናን ዲጪዛ ሚቲ ኢዛ ካሜቴስ።

²³ ሻፋ ሃ ኪጻስ ኢዚ ዳጋሜና፤ ዮርዳኖሴ ሻፋይ ኬሂ ኩሚዲ ጎጊንካ ኢዚ ያዬና።

²⁴ ኢዛ ኣይፌታ ቶይሲዲ ኢዛ ኦይካና ኣሲ ዲዜ? ኢዛ ሲካ ዳፎን ቃቺዲ ኢዛ ኦይካናስ ዳንዳይዛይ ኦኔ?