ኢዮቤ ማጻፋ 4 - ጋሞ ማጻፋ

ኤልፋዜይ ኮይሮ ሃሳይዳ ሃሳያ

¹ ቴማኔ ዴሬ ኣስ ኤልፋዜይ ሂዝጊ ዛሪዴስ፤

² «ኢዮቤ! ኢሲ ኣሲ ኔ ቦላ ዎልቃ ሃሳይኮ ኢዛዴ ኔ ዳንዳያን ኤዝጋኔ? ሃሳያናፔ ኣቲን ኦኒ ኣጋኔ?

³ ኔኒ ዳሮ ኣሳታ ታማርሳዳሳ፤ ዳቡርዳ ቄሴታካ ሚንዳሳ።

⁴ ካሴ ኔ ቃላቲ ጴቲዛይታ ማዴቴስኮሺን፤ ኔኒ ኮኮሪዛ ጉልባቴታካ ሚንሳኮሺን።

⁵ ሃኢ ጊዲኮ ሜቶይ ኔ ቦላ ጋኪዳ ጊሻስ ሂዶታይ ባይንዳዴ ጊዳዳሳ፤ ሜቶይካ ኔ ቦላ ሚኒዳ ጊሻስ ሂዶታ ቃንጻዳሳ።

⁶ ጾሳስ ኔ ያዪዛ ያሻይ ኣማንዛዝ ጊዴኔ? ኔ ሱሬ ኦጌቲካ ኔስ ሂዶታታ ዴቴኔ?

⁷ ጺሎ ኣስ ጊዲ ዲሺን ኢዛ ሜቶይ ጋኪዳዴይ፥ ሱሬ ኣስ ጊዲ ዲሼ ቲምኢ ጊ ይዳዴይ፥ ዲኮ ኣኔ ቆፓ።

⁸ ታኒ ኣኬኪዳ ማላ፥ ኢታቴ ጎዪዲ ሜቶ ዜሪዛይቲ ሄይታንቲ ባ ኦሮ ሺሻና።

⁹ ኢስቲ ጾሳ ፔኖን ያና፤ ኢዛ ሃንቆ ዳምባላን ኢስቲ ዲፒ ጊ ያና።

¹⁰ ኢታቲ ጋሞ ማላ ጻጋና፤ ባ ቃላ ቁ ኦዲ ዋሳና፤ ጾሲ ጊዲኮ ኢስታስ ኣቻ ሜንሬና።

¹¹ ጋሞይ ሻንካቲዲ ሚዛዝ ይዳ ዎዴ ሃይቂዛ ማላ ኢስቲካ ሃይቃና፤ ጋሞ ማራቲካ ላሌቲዛ ማላ ኢስታ ናይቲካ ላሌታና፤

¹² ጋላሳፌ ኢሲ ጋላስ ጹራ ጊዲዳ ኪታይ ታኮ ዪዴስ፤ ሄሳ ሄ ኪታዛ ሳሱኬን ታ ሲያዲስ።

¹³ ኣሳይ ኦማርስ ዎልቃማ ስኮ ሴሪዳ ዎዴ፥ ታና ኢታ ኣጉሞይ ኣጉንዴስ።

¹⁴ ባቦይኔ ኮኮርሲ ታና ኦይኪን፥ ታስ ሜቄቲ ኡባይ ኮኮራና ማላ ኦዴስ።

¹⁵ ኣያናይ ታ ሲንራ ኣዴስ፤ ዳጋማፔ ዴንዲዳይሳን ታ ሃሳይ ኤቂዴስ።

¹⁶ ሄንካ ኢሲ ሚሺ ኤቂ ዲዛይሳ ቤያዲስ፤ ቲሺ ኦ ጼላዲስ ሺን ኢዚ ኣዛኮ ሻካ ኤራናዉ ዳንዳያቤኬ። ሄሳፌ ጉዬ ጮኡ ጊዳሶሆፔ ሂዝጊዛ ቃላ ሲያዲስ፥

¹⁷ ‹ጾሳ ሲንን ጺሎ ጊዲ ቤታናስ ዳንዳይዛ ኣሲ ዲዜ? ዎይኮ ባና ሜዳይሳ ሲንን ጌሻ ኣሲ ቤታኔ?

¹⁸ ጾሲ ባስ ኦዛይታን ኣማኔቶንታ ኣጊኮ፥ ባ ኪታንቻታ ቦላካ ኢዚ ሞሮ ሚሽ ዴሚዛዝ ጊዲኮ፥

¹⁹ ሂስቲን ሃራይ ሞንታ ዲሺን ላሌቲዛ ኢስታ ዮቻይ ቢታፌ ጊዲዳ ኡርቃፌ ኦሴቲዳ ኬ ጊዶን ዲዛይታ ቦላ ዋኒ ኣማኔታኔ?

²⁰ ማላዶፔኔ ኦማርሳፌ ጊዶን ኢስቲ ሜቄሬታና፤ ኤሬቶንታ ዲሺን ኢስቲ ሜርናስካ ያና።

²¹ ቶሌ ሽኬይ ሾዴቲቺዳ ዱንካኔ ማላ ኢስቲ ኤራቴ ባይንዳ ሃይቃና።›