ኢዮቤ ማጻፋ 35 - ጋሞ ማጻፋ

¹ ኤሊሁይ ባ ሃሳያ ጉጂዲ ሂዝጊዴስ፤

² «ኢዮቤ ኔ ኔና፥ ‹ታኒ ጾሳ ሲንን ጺሎ› ጊዛይሲ ሊኬ?

³ ‹ናጋራ ኦንታ ኣጊኮ ታ ኣይ ጎኤታኔ? ቃሴካ ኣይ ዴማኔ?› ጋዳ ኔኒ ኦይቻዳሳ።

⁴ ታኒ ኔሲኔ ኔናራ ዲዛይታስ ዛሮ ኢማና።

⁵ «ቁ ጋዳ ፑዴ ሳሎ ጼላ፤ ኔፔ ቁ ጊዲ ዲዛ ሻራ ኣኬካ።

⁶ ኔኒ ናጋራ ኦኮ ጾሳ ኣዛን ቆሃይ? ኔኒ ኢዛ ዳርሳ ዳርሳ ቆሂኮ ኢዛ ኣይ ኦናዉ ዳንዳያይ?

⁷ ኔኒ ጺሎ ጊዲኮ ኢዛስ ኣይ ኢማኔ? ኢዚ ኔፔ ኣይኮካ ኮዬና።

⁸ ኔ ናጋራ ኦኮ ቆሃናይ ኔ ማላ ኣሳታ ጻላ። ኔ ሎኦ ሚሽ ኦኮካ ኔ ጎኢዛይ ኣስ ጻላ።

⁹ «ኣሲ ሃራይ ዳርሲ ቆሂሺን ዋሴስ፤ ባፔ ዎልቃቲዛዴ ኩሼፔ ባና ኣሺ ኤካናዴስ ማጋኔስ።

¹⁰ ጊዶ ኣቲን ኢስታፌ ኦኒካ፥ ‹ታና ሜዳ ጾሳይ ኣዋኔ? ሌላ ጊዶ ማዛሙሬ ኢሚዛይሲ ኣዋኔ?

¹¹ ሜሄታፔ ኑና ኣ ታማርሲዳ፤ ሳሎ ካፎታፔካ ኣ ኤራንቻታ ኦዳይ ኢዛ› ጊዳይ ባዋ።

¹² ኢስቲ ዋሴቴስ፤ ኢዚ ጊዲኮ ኢስቲ ኦቶራንቻታኔ ኢታታ ጊዲዳ ጊሻስ ኢስታስ ዛሮ ኢሜና።

¹³ ጾሲ ቱማ ዎዚናፔ ጊዶንታ ዋሶ ሲዬና፤ ኡባ ዳንዳይዛ ጾሳይ ሄሳ ማላ ኤዝጌና።

¹⁴ ኢዮቤ! ኔኒ ታ ጾሳ ኣይኮካ ቤኢኬ ጊኮካ፥ ኔ ሜቶይ ኢዛ ሲንን ዴኢዛ ጊሻስ፥ ኔኒ ዳንዳያን ናጋና ኮሼስ።

¹⁵ ቃሴካ ጾሲ ኔና ባ ሃንቆን ሃንቆንታ ኣሳ ኢታቴ ጮኡ ጊዲ ኣና ኔስ ሚሳቲዜ?

¹⁶ ኢዮቤ! ኔኒ ጮ ሜላ ሃሳያ ዳርሳሳ፤ ኤራቴ ባይንዳ ጮ ጋዳ ሃሳያሳ።»