ኢዮቤ ማጻፋ 34 - ጋሞ ማጻፋ

¹ ኤሊሁይ ባ ሃሳያ ጉጂዲ ሂዝጊዴስ፤

² «ኢንቴኖ ኣ ኤራንቻቶ! ታ ኢንቴስ ሃሳይዛይሳ ሲዪቴ፤ ኢንቴኖ ኤራንቻቶ ታ ሃሳያ ኤዝጊቴ።

³ ኢንጻርሲ ካ ማልኦ ሻኪ ኤሬስ፤ ሄሳካ ሃይ ዮኦ ሻኪ ኤሬስ።

⁴ ቱሙ ጊዲዳ ዮኦ ኣኔ ሻኪ ኤሮስ፤ ሎኦ ጊዲዳ ሚሺካ ኢሲፌ ታማሮስ።

⁵ «ኢዮቢ፥ ‹ታኒ ጺሎ ሺን ጾሲ ታና ሱሬ ፒርዳ ዲጊዴስ።

⁶ ታኒ ቱማንቻሺን ዎርዳንቻ ማላ ቆዴታዲስ፤ ታ ኣይኮካ ሞሮንታ ዳሼ ፓጾንታ ማዱንን ዋዬታይስ› ጊዴስ።

⁷ ኢዮቤ ማላ ጾሳ ቦላ ቂልጪዛዴይ ቤታንዴሻ?

⁸ ኢዚ ኢታ ኦዛይታራ ላጌቴስ፤ ኢዛስ ፔይሻይካ ኢታ ላጌታራ።

⁹ ‹ጾሳ ኡፋይሳና ጊዲ ኦሶይ ኣስ ኣይኮካ ማዴና› ጌስ።

¹⁰ «ኣኬኪዛ ኣሳቶ ኣኔ ታና ኤዝጊቴ! ኢታ ኦሶይ ጾሳፌ፤ ባላ ኦሶይ ኡባ ዳንዳይዛ ጾሳፌ ሃኮ!

¹¹ ጾሲ ኣሳስ ኢዛዴ ኦሶ ማላ ኢሜስ፤ ኢዛስ ኢዛዴ ሄሜ ማላ ኦስ።

¹² ኡባ ዳንዳይዛ ጾሳይ ሙሌካ ኢታ ሚሽ ኦና፤ ኣይ ኣሳስካ ሱሬ ፒርዳ ጌላሴና።

¹³ ጾሳሲ ቢታ ሃዳራ ኢሚዳዴይ ዴና፤ ኢዛ ኣላሜ ቦላካ ሹሚዳዴይ ዴና።

¹⁴ ጾሲ ባ ኣያናዛኔ ባ ሼምፖዛ ባኮ ዛሪ ኤካና ኮዪዳኮ፥

¹⁵ ኣሾ ማይኢዳይ ኩሜ ያና፤ ኣሳ ዜሬካ ዱጌ ቢታን ሲማና።

¹⁶ ኔኒ ኣኬኪዛ ጊዲኮ ሃይሳ ሲያ፤ ታ ኔስ ሃሳይዛይሳ ኤዝጋ።

¹⁷ ሱሬ ፒርዳ ኢጺዛዴይ ዴሬ ኣይሳናስ ዳንዳይዜ? ኔኒ ጺሎኔ ዎልቃማ ጾሳ ናጋራንቻ ኬሳይ?

¹⁸ ካዎታ ኢንቴ ሌኬታ፤ ሹሜታካ ኢንቴ ኢታ ጋናይ ኦኔ?

¹⁹ ኡባቲካ ኢዛ ሜታታ ጊዲዳ ጊሻስ ኢዚ ሹሜታ ሻኪ ማዴና፤ ዱሬታካ ማንቆታፔ ሻኬና።

²⁰ ኢስቲ ሌላ ጊዶ ቆፖንታ ሃይቃና፤ ኡባይ ኮኮሪ ያና፤ ዎልቃማቲካ ኦና ኩሼይካ ቦቾንታ ኪቻና።

²¹ «ጾሲ ኣሳ ኡባ ታንጎዛ ጼሌስ፤ ኢሳ ኢሳ ሄሜ ካሌቴስ።

²² ኢታ ኣሳቲ ቆቴታና ማላ ጊርዲ ጊዳ ማይ ዴና።

²³ ጾሲ ኣሳ ቦላ ፒርዳናስ ባሬ ኢሜና።

²⁴ ዎልቃማ ዳናታ ዳናቴፌ ዴንናስ፥ ኢስታሶሆን ሃራ ዎናስ፥ ኣይኮ ኦይሻይ ሺቆንታ ኢዚ ሄሳ ኦስ።

²⁵ ኢዚ ኢስታ ኦሳ ኤሪዛ ጊሻስ ኢሲ ኦማርስ ኢስታ ዳናቴፌ ይሳና።

²⁶ ኢስቲ ኦዳ ማካላቴ ጋሶን ኡባ ኣሳ ሲንን ማካላንቻታ ቃጻዬስ።

²⁷ ኢዚ ኢስታ ቃጻዪዛይሲ ኢስቲ ኢዛ ካሊዛይሳ ኣጊዳ ጊሻሳ፤ ኢዛ ኣዛዞታካ ኢስቲ ካዳ ጊሻሳ።

²⁸ ኢስቲ ማንቆታ ኡንኤዳ፤ ፑዴ ጾሳኮ ዋሳና ማላ ኦዳ። ጾሲካ ማንቆታ ዋሶዛ ሲዪዴስ።

²⁹ ጾሲ ጮኡ ጊኮ ኦኔ ኢዛ ቦላ ፒርዳናይ? ኢዚ ባ ዞኮ ዛሪኮ ኦኔ ኢዛ ቤያናይ?

³⁰ ሄሳካ ጾሳስ ያዮንታ ዴራ ኡንኤዛ ካዎይ ዴራ ቦላ ዴንዲኮ ኢዛ ኦኔ ዲጋናይ?

³¹ «ኢዮቤ! ኔኒ ኔ ናጋራ ጾሳስ ፓጻዳ ዛራ ናጋራ ኦኬ ጋ ቃላ ጌላዲ?

³² ታ ኦዳ ናጋራይ ኣዋይሳኮ ታና ታማርሳ፤ ታ ሞሪዳ ጊዲኮ ዛራዳ ኢዛ ኦኬ! ጋዲ?

³³ ሂስቲን ኔኒ ማሬታናፔ ኢጺስ ጋዳ ኔኒ ሺሺዛ ቆፋ ማላ ጾሲ ኔ ኣሞዛ ኔስ ፖላና ማላ ኔ ኮያይ?

³⁴ «ታና ሲዪዛ ኣሳቲ ኣኬኪዛ ኤራንቻቲካ፥

³⁵ ‹ኢዮቢ ኤራቴ ባይንዳ ሃሳዬስ፤ ሁኤይ ባይንዳ ሃሳያታ ሃሳዬስ› ጌቴስ።

³⁶ ኢታ ኣሳታ ዛሮ ማላ ዛሪዛ ጊሻስ ኢዮቢ ዉርሴ ጋካናዉ ፓጬቲዳኮ ኣዜ ዲዛይ!

³⁷ ኑ ጊዶን ዎጋፔ ካሬ ኬኢዴስ፤ ጾሳ ቦላ ካ ዳርሲዴስ፤ ባ ናጋራ ቦላካ ማካላቴ ጉጂዴስ» ጌቴስ።