ኢዮቤ ማጻፋ 33 - ጋሞ ማጻፋ

¹ «ኢዮቤ! ታ ኔስ ዮቲዛይሳ ሲያ፤ ታ ኔስ ጊዛይሳካ ኣኬካን ኤዝጋ፤

² ታ ኔስ ዛሮ ኢማናስ ጊጌታ ኡታዲስ፤ ታ ዶናይካ ጊጌቲ ኡቲዴስ።

³ ታ ሃሳይዛ ቃላቲ ታ ዎዚና ሱሬቴ ቆንጪሴቴስ፤ ታ ኢንጻርሳይ ታ ኤሪዛ ቱማ ሃሳዬስ።

⁴ ታና ሜዳይ ጾሳ ኣያና፤ ታስ ዴኦ ኢሚዳይ ኡባ ዳንዳይዛ ጾሳ ኣያና።

⁵ ኔኒ ዳንዳይዛ ጊዲኮ ታ ጎይሳስ ዛሮ ኢማ፤ ኔ ጋናይሳ ጊጊሳዳ ታናራ ሃሳዬታ።

⁶ ሄኮ! ታኒ ጾሳ ሲንን ኔናራ ጊና፤ ታኒካ ሜቲዳይ ኡርቃፌ።

⁷ ኔኒ ታስ ያያናስ ቤሴና፤ ታኒካ ኔና ናቃናዉ ኮሼና።

⁸ ኔኒ ሃሳይዳ ኡባ ኤዝጋሼ ታ ጋምኣዲስ፤ ኔ ኢንጻርሳፌ ኬኢዳ ቃላታ ታ ሲያዲስ።

⁹ ኔኒ ሃሳያሼ፥ ‹ታኒ ቆሆይኔ ቦሬይ ባይንዳ ኣሳ፤ ታኒ ናጋራ ኦንታዴኔ ጺሎ ኣሳ።

¹⁰ ጊዶ ኣቲን ጾሲ ታና ቃጻያናስ ጋሶ ኮዬስ፤ ታናካ ባስ ሞርኬ ማላ ቆዴስ።

¹¹ ታ ቶሆታ ኢዚ ዱሩማን ዱጺ ቃቺዴስ። ታ ቢዛሶ ኡባን ታና ጼሌስ› ጋዳሳ።

¹² «ኢዮቤ! ሃይሲ ኔ ሃሳያይ ባላ ጊዲዴስ፤ ታኒካ ኔስ ቆንጪሳናስ ኮያይስ፤ ጾሲ ኣሳ ኡባፌ ኣስ።

¹³ ሂስቲን፥ ‹ኔኒ ጾሲ ኣሲ ማጋኒዛ ማጋና ሲዬና› ጋዳ ኣይስ ጾሳ ቦላ ዙዙማይ?

¹⁴ ኣሲ ኣኬኬናፌ ኣቲን ጾሲ ዱማ ዱማ ኦጌራ ሃሳዬስ።

¹⁵ ኦማርስ ኣሲ ሂጻን ኢቺ ዲዛ ዎዴ ኣሲ ኮይሮ ስኮ ሴራጊዳ ዎዴ፤ ኣጉሞኒኔ ኣጁታንካ ጾሲ ሃሳዬስ።

¹⁶ ሄ ዎዴ ኣሲ ኢዛ ቃላ ሲያና ማላ ሃይ ዶዬስ፤ ኢዚ ባ ኢሚዛ ሴራንካ ዳጋንስ።

¹⁷ ሄሳ ማላ ኦሶን ኣሲ ናጋራ ኦንታ ማላ ዲጌስ፤ ኦቶሬቴካ ኢስታፌ ዴንስ።

¹⁸ ጾሲ ኣሳ ሼምፖ ዮፔ ኣሼስ፤ ባሻ ሃይቆፔካ ዎዜስ።

¹⁹ ዎይኮ ኣሲ ሜቄን ጌሊዳ ሳኮን ዲሺን ኣሲ ባ ባላፔ ሲማና ማላ ሃርጌ ሂጻን ጾሲ ዞሬስ።

²⁰ ሃይሳ ማላን ሃርጋንቻ ካ ላንቃናስ ኢዛ ኢቴስ፤ ሎኦ ካካ ሃራሴስ።

²¹ ጊልቃቴፔ ዴንዶይሳን ኢዛስ ኣሾዚካ ዉሪዴስ፤ ሜቄ ጻላ ኣቲዴስ።

²² ኢዛ ሼምፖይ ኬዛናሲኔ ሞጌታናስ ማቲዴስ።

²³ «ኣሲ ሱሬ ኦጌ ቤሳናስ ሺያን ቆዴቲዛ ጾሳ ኪታንቻታፔ ኢሶይ ኢዛ ማዳናስ ዪዳኮ፥

²⁴ ኪታንቻይ ኢዛስ ቃቲዲ፥ ‹ኢዛ ዎዚዛዴ ታ ዴሚዳ ጊሻስ ኢዚ ዱጌ ዱፎን ዎንታ ማላ ኣጋጋ!› ጊዲ ሃይቆ ኦይኪዳኮ፥

²⁵ ሄሳ ጊሻስ ኢዛ ኣሳቴይ፥ ቄሪ ና ኣሾ ማላ ዛሪ ኦራጻና፤ ኢዛስ ዬላጋቴ ዎዴ ማላ ቃሴካ ሃናና።

²⁶ ሄ ዎዴ ጾሳኮ ኢዚ ዎሳና። ኢዛ ዎሳካ ጾሲ ሲያና፤ ጾሳ ሲን ኢዚ ቤኢዲ ኡፋዬታና፤ ጾሲካ ኢዛ ዎሳስ ዛሮ ኢማና።

²⁷ ኢዚ ኣሳ ሲንን፥ ‹ታኒ ናጋራ ኦዲስ፤ ሱሬ ጊዲዳይሳካ ጌላሳዲስ። ጾሳይ ጊዲኮ ታ ሞራ ማላ ታስ ኦቤና።

²⁸ ታኒ ዱፎን ጌሎንታ ማላ ታና ኣሺዴስ፤ ሄኮ ሃኢ ፓጻ ዳዳ ታኒ ፖኦ ቤያይስ› ጊ ዬጺዴስ።

²⁹ «ሄኮ! ጾሲ ሃይሳ ኡባ ሚሻ ኣሳስ ዛሪ ዛሪ ኦስ።

³⁰ ዴኦን ዲዲ ፖኦ ቤያና ማላ ኢዛ ሼምፖ ሃይቆፔ ኣሼስ።

³¹ «ኢዮቤ! ታ ኔስ ዮቲዛይሳ ሎኤ ሲያ፤ ታኒ ኔስ ዮታይስ ኣኔ ኔኒ ጮኡ ጋ።

³² ኔኒ ሃሳያናስ ኮይዛ ሚሺ ዲኮ ታስ ዮታ፥ ታ ኔኒ ጺሎ ጊዲዳይሳ ኔና ቤሳና ኮያይስ።

³³ ኣካይ ጊኮ! ታኒ ሃሳይዛይሳ ጮኡ ጋዳ ሲያ፤ ታኒ ኔና ኤራቴ ታማርሳና» ጊዴስ።