ኢዮቤ ማጻፋ 32 - ጋሞ ማጻፋ

ኤሊሁ ሃሳያ

¹ ኢዮቢ፥ «ታኒ ጺሎ ኣሳ» ጊዛ ቆፋ ላሞንታ ጊሻስ ሄ ኣሳቲ ኢዛ ዞሪዛይሳ ኣጊዳ።

² ኤራማ ዜሬፌ ቡዜ ዴሬ ኣስ ባራኬሌ ና ኤሊሁይ ኢዮቢ ባና ጾሳፌ ኣዲ ጺሊሲዳ ጊሻስ ኢዮቤ ቦላ ኬሂ ሃንቄቲዴስ።

³ ቃሴካ ኢዮቤ ላጌ ሄቲ ኢዮቤ ቦላ ፒርዳፌ ኣቲን ኢዛ ኣማንዛ ቃላ ዮቲ ኣማንንታ ጊሻስ ኢስታ ቦላካ ሃንቄቲዴስ።

⁴ ኤሊሁይ ሃንኮይታፔ ዬላጋ ጊዲዳ ጊሻስ ሃንኮይቲ ባንታስ ዲዛይሳ ሃሳዪ ዉርሳናሼ ጋካናስ ኢዮቤራ ሃሳያናዉ ባ ታራ ናጎ ቦላ ዴስ።

⁵ ኢዮቤ ላጌ ሄቲ ኢዮቤስ ቤሲዛ ዛሮ ኢማናስ ዳንዳዮንታይሳ ቤኢዲ ኬሂ ሃንቄቲዴስ።

⁶ ቡዜ ዴሬ ኣስ ባራኬሌ ና ኤሊሁይ፥ «ታኒ ኢንቴፌ ዬላጋ ጊዲዳ ጊሻሲኔ ኢንቴ ጪማ ጊዲዳ ጊሻስ ፖኮይኔ ያሺ ታና ኦይኪን ሃኖ ጋካናስ ታ ቆፋ ቆንጪሶንታ ጋምኣዲስ።

⁷ ‹ጪማቲ ሲንቲ ሃሳዬቶ፤ ባንታ ላይን ዴሚዳ ኣ ኤራቴፌ ታማርሴቶ› ጋ ቆፓዲስ።

⁸ ጊዶ ኣቲን ኣሳ ጊዶን ኣቂዲ ኣ ኤራቴ ኣሳስ ኢሚዛይ ኡባ ዳንዳይዛ ጾሳ ኣያና።

⁹ ኣስ ኣ ኤራንቻ ኬሲዛይ ጪማቴ ጊዴና፤ ቃሴካ ኣሲ ኣኬካናስ ዳንዳይዛይ ኢዛዴስ ላይ ኣዱቂዳ ጊሻስ ጊዴና።

¹⁰ «ሄሳ ጊሻስ ሎኤ ሲዪቴ፤ ታኒካ ታ ቆፋ ኢንቴስ ዮታና።

¹¹ ኢንቴ ሃሳይዛ ዎዴ ታኒ ጮኡ ጋዳ ኤዝጋይስ፤ ኢንቴ ሃሳያና ቃላ ቆፒሺንካ ታኒ ናጋይስ።

¹² ታኒ ኢንቴ ሃሳይዛይሳ ሎኤ ሲያዲስ፤ ጊዶ ኣቲን ኢንቴፌ ኦኒካ ኢዮቢ ሞራንቻ ጊዲዳይሳ ኣማንዳይኔ ቃሴካ ኢዛ ሃሳያስ ቤሲዛ ዛሮ ኢሚዳይ ዴና።

¹³ ኢዮቤ ሃሳያስ ቤሲዛ ዛሮ ኢማናስ ዳንዳይዛይ ጾሳፌ ኣቲን ኣስ ጊዶንታ ጊሻስ ኢንቴ፥ ‹ኑኒ ኣ ኤራቴ ዴሚዶስ› ጊዲ ጮ ሃዳ ጬቄቶፍቴ።

¹⁴ ኢዮቢ ማርሼቲዳይ ኢንቴናራፔ ኣቲን ታናራ ጊዴና፤ ታኒካ ኢንቴ ሃሳይዛይሳ ማላን ኢዛስ ዛሮ ኢሚኬ።

¹⁵ «ኢስቲ ዳጋሚዲ ሃሳይዛ ቃላይ ይዳ ጊሻስ ኣይኮ ሃሳያናዉ ዳንዳይቤቴና።

¹⁶ ሄኮ! ኢስቲ ሃሳይዛ ሚሺ ዪን ጮኡ ጊዲ ኤቂዳ፤ ሂስቲን ታኒካ ጮኡ ጋ ናጋናሲ ታስ ቤሲዜ?

¹⁷ ኣካይ! ጮኡ ጊኬ፤ ታኒካ ታ ባጋራ ዲዛ ዛሮዛ ኢማና፤ ታ ቆፋካ ቆንጪሳና።

¹⁸ ታ ሃሳያናስ ቤሲዛዚ ዳሮይ ዲዛ ጊሻስ፤ ታናን ዲዛ ኣያናይ ታና ዎልቃራ ሃሳይሴስ።

¹⁹ ቤኢቴ! ታኒ ሃሳዮንታ ኣጊኮ ዎይኔ ጫጄ ዎዛ ኦራ ሉካሞይ ሼምፒዛሶ ይዲ ቃናስ ፑሪዛይሳ ማላ ታ ጊዶይ ፑሪዲ ቃና ጋኪዴስ።

²⁰ ኣኔ! ታኒ ሃይሳፌ ሃሳያዳ ሼምፓይስ፤ ታ ዶና ዶያዳ ታኒ ሃሳያናስ ቤሴስ።

²¹ ሃይሳ ሃ ዮኦዛን ታኒ ኦናካ ማዲኬ፤ ዎይኮ ኣይ ኣሳካ ኣዳሺኬ።

²² ታኒ ኣስ ኣዳሾይ ሙሌካ ሃኔና፤ ታ ሄሳ ማላ ኦኮ ታና ሜዳይሲ ታና ሃንቃና።