ኢዮቤ ማጻፋ 31 - ጋሞ ማጻፋ

ኢዮቢ ባ ዉርሴ ሃሳያ ፖሊዴስ

¹ «ሎኦ ማጫሳኮ ጼላዳ ኣሞቶንታ ማላ፤ ታኒ ታ ኣይፌታራ ጫቆ ጌላዲስ።

² ቦላን ዴኢዛ ጾሳይ ኣሳስ ኣይ ቃዳ ኢማንዴሻ? ሳሎን ዲዛ ኡባ ዳንዳይዛ ጾሳፌ ኣሳስ ኢሜቲዳ ጊሻይ ኣዜሻ?

³ ኢታ ኣሳ ቦላ ቆሆይ፥ ናጋራንቻ ኣሳ ቦላካ ዮይ ጋካናይሲ ኤሬቲዳዝ ጊዴኔ?

⁴ ጾሳይ ታ ኦዛይሳ ኡባ ቤዬኔ? ታ ሄሜታካ ሻኪ ኤሬኔ?

⁵ ታኒ ዎርዶ ሃሳይዳ ጊዲኮ፥ ኣሳካ ባሌዳ ጊዲኮ፤

⁶ ጾሲ ታና ሱሬ ጌዳራን ጌዳሮ። ታኒ ጺሎ ጊዲዳይሳ ሻኪ ኤሮ።

⁷ ታ ሱሬ ኦጌፔ ኬኢዳ ጊዲኮ፥ ታ ኣይፌይ ቤኢዳ ኡባ ታ ዎዚናይ ኣሞቲዳ ጊዲኮ፥ ቃሴካ ታ ኩሼይ ናጋራን ቱኒዳ ጊዲኮ፥

⁸ ታኒ ዜሪዳይሳ ሃራ ኣሲ ሞ። ታ ጫሬቻዚካ ኩሜ ሾዴቲ ኦሌቶ።

⁹ «ታ ዎዚናይ ሃራ ማጫ ኣሞቲዳ ጊዲኮ፥ ታ ሾሮዛ ማቾ ላይማታናስ ኢዛ ፔንጌን ታ ዙጊዳ ጊዲኮ፥

¹⁰ ታ ማቻ ሃራ ኣሳስ ጋጩ፤ ቃሴካ ሃራ ኣዴይ ኢዚራ ዚንኦ።

¹¹ ሃይሲካ ኬሂ ቱና፤ ዎጋንካ ቃጻይሲዛ ናጋራ።

¹² ሃ ናጋራይ ታማ ማላ ጹጊዛ ጊሻስ ታ ሃይሳ ኦዳኮ ታ ኣቆታ ጹጊ ይሳናኮሺን።

¹³ «ማጫኔ ኣቱማ ጊዲዳ ታ ኣይሌቲ ታና ሞቲን ኢስታ ሞቶዛ ታ ካዳ ኣጊዳ ጊዲኮ፥

¹⁴ ጾሲ ታና ፒርዲዛ ዎዴ ታኒ ዋናኔ? ቃሴ ኢዚ ታና ኦይቺዛ ዎዴ ታኒ ኣይ ዛሮ ኢማኔ?

¹⁵ ታ ኣዬይ ኡሎን ታና ሜዳይሲ ታ ኣይሌታካ ሜዳይ ኢዛ ጊዴኔ? ኑና ኡባታካ ኣዪ ኡሎን ሜዳይ ኢዛ ዴኔ?

¹⁶ «ማንቆቲ ታና ዎሲን ታ ዲጋ ኤሪኬ፤ ቃሴካ ኣምኤ ማጫሳታ ሚንንታ ኣጋ ኤሪኬ።

¹⁷ ዪኦኔ ዪቶ ናይታ ኣጋዳ ታ ካ ታርካ ማቤኬ።

¹⁸ ታኒ ታ ዬላጋቴፌ ዶማዳ ታኒ ኢስታ ኣዋ ማላ ዲቻዲስ፥ ታ ዴኦ ላይ ኡባን ኣምኤ ማጫሳታ ማዳዲስ።

¹⁹ ማይኦይ ዪን ሜጎይ ዎዛዴ፤ ዎይኮ ሜቶፔ ዴንዲዳይሳን ካሎ ዲዛዴ ቤያዳ፥

²⁰ ታ ዶርሳታ ኢስኬፌ ኦሴቲዳ ማይኦ ታ ማይዚን፥ ኢዛዴ ሆኢን ታና ዛሪ ጋላቶንታ ኣጊዳ ዎዴይ ዴና።

²¹ ታኒ ሞቶን ኢስታ ላናይሳ ኤራዳ ኣዋይ ባይንዳ ናይታ ናቂዳ ጊዲኮ፥

²² ታ ኩሼይ ሃሼፔ ኬኦ። ታ ቄሴይካ ኩሬዛፔ ኮልዶ።

²³ ታኒ ጾሳ ሃንቆስ ያዪዛ ጊሻሲኔ ኢዛ ቴማቴስ ያዪዛ ጊሻስ ሃይሳ ማላ ዮኦታ ኦናዉ ታ ዳንዳይኬ።

²⁴ «ታኒ ታስ ዲዛ ኣቆታን ኣማኔታቤኬ። ዎይኮ ፓያ ዎርቃካ ታስ ኣማኔቲዛ ሚሽ ኦቤኬ።

²⁵ ‹ታስ ዲዛ ኣቆይ ዳሪዴስ፤ ታኒ ዱሬቴፌ ዴንዲዳይሳን ዳሮ ሚሽ ዴማዲስ› ጋዳ ኡፋዬታ ኤሪኬ።

²⁶ ኣርሼ ፖኦዛ ቤያዳ፥ ኣጊና ሎኤቴ ቤያዳ፥

²⁷ ታ ዎዚናን ኢስታ ጌማራ ቦንቻቤኬ፤ ቃሴካ ታ ኩሼ ሚጫ ዬራዳ ኢስታስ ጎይናቤኬ።

²⁸ ታኒ ሃይሳ ማላ ኦዳኮ ሳሎን ዲዛ ጾሳ ካዶ ጊዲዳ ጊሻስ ሃይቲ ሃ ኦሶቲ ታ ቦላ ፒርዳ ኤሂዛ ናጋራታ።

²⁹ «ታ ሞርኬታ ኩንዴን ታኒ ኡፋዬታቤኬ፤ ኢታ ሚሺ ኢስታ ቦላ ጋኪሺንካ ሚጫቤኬ።

³⁰ ‹ታ ሞርኬቲ ዬቶ› ጋ ቃንጋዳ ናጋራ ኦቤኬ።

³¹ ታኒ ኡባ ዎዴ ኢማ ሞኪዛይሳ ታሶ ኣይሌቲ ታ ጊሻስ ማርካቴቴስ።

³² ታኒ ታ ኬ ካሬ ኦጌራ ኣ ቢዛ ማንዳራስ ዶያ ዎዲስ። ሄሳ ጊሻስ ጋዴይ ቃሚን ዪዳ ኢማ ካሬን ኣይሳ ኤሪኬ።

³³ ታኒ ታ ሞሮ ጌንቤኬ፤ ሃራ ኣሳታ ማላ ታ ናጋራካ ቆታቤኬ።

³⁴ ታና ኣሳ ዳሮይ ያሺሲኒኔ ሶ ኣሳታ ካይ ዳጋንን ታኒ ታሶን ጮኡ ጋዳ ቆቴቲዳ ዎዴይ ዴና።

³⁵ «ታ ጊዛይሳ ሲዪዛዴይ ቤቴሬኔሺን! ታኒካ ቴቄ ቃላ ሺሻናኮሺን! ኡባ ዳንዳይዛ ጾሳይ ታ ጊዛይሳ ዛሮ ኢዚ ኢሞ! ታና ሞቲዛ ሞታንቻይ ታና ሞቲዛይሳ ጻፊ ሺሺን ታ ቤያርኪናሺን!

³⁶ ዎይቶ ማላ ታኒ ታ ሃሼን ቶካናኮሺን፤ ካላቻ ማላካ ታ ሁኤ ቦላ ጎጻና።

³⁷ ዳናቴ ዲዛ ኣሳ ማላ ጾሳ ሲንን ያዮንታ ኤቃዳ ታ ኦዳ ኡባ ቆንጪሳ ዮታናኮሺን።

³⁸ «ኣሳ ጋዴ ዎጋይ ባይንዳ ቦንቃ ኤካዳ ታኒ ጎዪዳ ጊዲኮ፥

³⁹ ሄ ጋዳ ጎዳታ ታ ሚሺሲዳ ጊዲኮ፥ ኣይኮካ ኢስታስ ኢሞንታ ዳሼ ሞኪዳ ካ ታኒ ሚዳ ጊዲኮ፥

⁴⁰ ሄ ታ ጎዪዛ ጎሻሶን ዲዛ ጊስቴ ጊሻስ ኣጉን፥ ባንጋ ጊሻስ ሻራፋይ ሞኮ» ጊዴስ። ኢዮቢ ባ ሃሳያ ሃይሳን ፖሊዴስ።