ኢዮቤ ማጻፋ 30 - ጋሞ ማጻፋ

¹ «ኢስታ ኣዋቲ ታስ ዶርሳ ዉዴዛ ሄሚዛ ታ ካናታራ ሞንታ ማላ ኢስቲ ታ ካዛ ኣሳታኮሺን፤ ሃኢ ጊዲኮ ላይን ታፔ ናቲዛ ኣሳቲ ታ ቦላ ቂልጬቴስ።

² ኢስታስ ዎልቃይ ኢጺዳ ጊሻሲኔ ኢስታ ቦላይ ጊልቂዳ ጊሻስ ኣይኮካ ታና ጎኤቴና።

³ ሜቶፔኔ ኮሻ ዳሮፔ ዴንዲዳይሳን ባዞ ቢታ ቢ ቢዲ ሚ ጻጶ ማጼ ጋንጬቴስ።

⁴ ማጺኔ ማላ ማልኢዛ ባዞን ሞኪዛ ዱማ ዱማ ሚ ሃይታ ማጼቴስ፤ ማልኦንታ ሳንካራ ጻጶ ቆሬሬ ሜቴስ።

⁵ ኣሲ ካይሶታ ዋሲዲ ጎዲዛይሳ ማላ ኢስቲካ ዴራ ጊዶፌ ጎዴቴስ።

⁶ ኢስቲ ባንታ ዱሳሶ ሃ ባይንዳ ሻፋ ጊዶን፥ ኣሲ ባይንዳ ባዞ ቢታኒኔ ኬልካ ጊዶን ቦኬቲዳ ጎንጎሎታን ዶሳይ ባይንዳ ዴኢዳ።

⁷ ዎራይ ዲዛሶ ዩዪ ዩዪ ዎራ ዶኣታ ማላ ዋሴቴስ፤ ዎራ ጋርሳን ኢሲ ቦላ ሺቄቲ ኣቄቴስ።

⁸ ባንታ ቢታፌ ጹርቃፌን ሾጬቲ ጎዴቲዳ ጊሻስ ሎኦ ሱንኔ ዎዚናይ ባይንዳይታ ጊዲዲ ዴቴስ።

⁹ ሃኢ ቃሴ ኢስታ ናይቲ ዬን ታና ቂቴስ፤ ታኒ ኢስታ ጊዶንካ ሚጬቴስ ኣታዲስ።

¹⁰ ታና ሻቴቲዲ ታፔ ሃኬቴስ፤ ኣይኮ ዬላይካ ባይንዳ ታ ሲንን ጩቴቴቴስ።

¹¹ ጾሳይ ታ ዎልቃ ዳቡርሲዲ ታና ካዉሺዳ ጊሻስ ኢስቲ ቃሴ ቢጻላይ ባይንዳ ፓራ ማላ ታ ቦላ  ቴስ።

¹² ታፔ ኡሻቻ ባጋራ ዬዳ ዲጪዳይቲ ታ ቦላ ዴንዲዳ፤ ታና ኦይካናስ ዎጺማዴ ዎዳ፤ ታና ጊዶዳ።

¹³ ታስ ኣዛሶ ይሲዲ ታና ዎና ኮዬቴስ። ኢስቲ ሃይሳ ኦናይሳ ዲጋናዴይ ዴና።

¹⁴ ዲኦይ ሜን ጌሊዛይሳ ማላ ኢስቲካ ታና ጩጊ ጌሊዳ፤ ኡባካ ሜንሬዲ ታ ቦላ ዪዳ።

¹⁵ ጊታ ዳጋማይ ታና ጋኪዴስ፤ ታስ ዲዛ ቦንቾይ ጫርኮ ማላ ኣዴስ፤ ታ ኣታና ጊዛ ሂዶታይ ሻራ ማላ ዴንዲ ይዴስ።

¹⁶ «ታ ሼምፖያ ኬሃ ጬጫዱስ፤ ሃይቆስካ ማታዱስ።

¹⁷ ኦማርስ ኩሜ ታ ሜቄቲ ሃርጌን ዋዬቴቴስ፤ ሳኮዚካ ታስ ሼምፖ ኢሜና።

¹⁸ ታና ሳኪዛ ዎልቃማ ሳኮዛ ጋሶን ታ ማይኦይ ጉንዲ ሞሬቲዴስ፤ ቆ ጹን ሻሚዜ ማላ ታና ጩሊ ኦይኪዴስ።

¹⁹ ጾሲ ታና ዱጌ ቢታን ኦሊዳ ጊሻስ ታኒ ጉዱላኔ ቢዲን ሚሳታዲስ።

²⁰ ጾሶ፥ ታ ኔና ዎሳዲስ፤ ጊዶ ኣቲን ኔ ታስ ዛራቤካ፤ ታ ኤቃዳ ኔኮ ዎሳዲስ፤ ኔኒ ጊዲኮ ኔ ሲን ታኮ ዛራቤካ።

²¹ ኔ ታስ ኣዳፌ ሜንጼ ኢታዳሳ፤ ኔኒ ኔ ጊታ ዎልቃንካ ታና ጎዳዳሳ።

²² ኔ ታና ዴንዳ ጫርኮ ቦላ ዎዳሳ፤ ኢዚ ታና ዩሻና ማላካ ኦዳሳ፤ ጎቴ ጫርኮይካ ታና ሺሬቺ ሺሬቺ ዬጌስ።

²³ ኣሳ ኡባስ ቃዳ ጊዲዳ ሃይቆስ ኔ ታና ኣዳ ኢማናይሳ ታ ኤራይስ።

²⁴ «ኢሲ ሜቶቲዳ ኡራይ ማዶ ዴማናስ ባ ኩሼ ሚጪዲ ዎሲሺን ቱማፔ ኣይ ኣሲካ ኢዛ ቆሄና።

²⁵ ታኒ ሜቶቲዳ ኣሳታስ ዬካቤኪና? ማንቆታስካ ሚሼታቤኪና?

²⁶ ሎኦ ሚሽ ዴማና ጋ ታ ናጊሺን ኢታ ሚሺ ታና ጋኪዴስ፤ ፖኦይ ያና ጋ ታ ናጌቲሺን ታስ ጋላሳይ ሚዴስ።

²⁷ ታ ዎዚናይ ዳሮ ጬጪዴስ፤ ኣይ ሳሮካ ዴማቤኬ፤ ሜቶ ጋላሳቲካ ታ ቦላ ጋኪዳ።

²⁸ ታ ቦላይ ኣዋ ጹሳን ጊዶንታ ሙዞቴን ካሬጺዴስ፤ ዱላታ ኣሳ ሲንን ኤቃዳ ማዶ ታስ ኦይቻይስ።

²⁹ ኣሳፔ ሻኬታዳ ዎራካናታስ ኢሻ፥ ጉቶታስ ላጌ ጊዳዲስ።

³⁰ ታስ ጋልባዚ ካሬጺዲ ዴንዲዴስ፤ ታስ ቦላዚካ ሚሻን ጹጌቲዴስ።

³¹ ታኒ ታ ኡፋይስ ኢስታን ቆንጪሲዛ ባጋናኔ ዛዬይ ሃኢ ታ ካዮታዳ ኬሲዛ ዚላሳ ቃላ ሲሲዛ ሚሽ ጊዲዳ።