ኢዮቤ ማጻፋ 3 - ጋሞ ማጻፋ

ኢዮቢ ባ ዬሌቲዳ ጋላስ ቃንጌ ኢዮቤ ሃሳያ

¹ ሃይሳፌ ጉዬ ኢዮቢ ሃሳያ ዶሚዴስ፤ ባ ዬሌቲዳ ጋላሳ፥

^2-3 «ታኒ ታ ኣዬይ ኡሎን ሜቲዳ ኦማርሳያኔ ታኒ ዬሌቲዳ ጋላሳያ ቃንጌቲዳይታ ጊዴቶ!

⁴ ሄ ጋላሳይ ማን ላሜቶ፤ ሳሎ ጾሳይ ኢዛ ቆፖፎ፤ ፖኦይ ሙሌካ ኢዛን ቤቶፎ።

⁵ ሻሩማኒኔ ጊርዲ ጊዳ ማን ካሜቲዳይሳ ጊዶ፤ ሻራይ ካሚን ማይ ኢዛ ፖኦ ሚቶ።

⁶ ሄ ጋላሳ ኦማርሳዮ ጊርዲ ጊዳ ማይ ካሞ፤ ላይ ጋላሳታራ ኢሲፌ ታይቤቶፎ፤ ኣጊናታ ቆዳን ጌሊ ቆፌቶፎ።

⁷ ሄ ጋላሳ ኦማርሳይ ኣይኮይ ባይንዳዝ ጊዶ፤ ኡፋይሳ ቃላይካ ኢዛን ሴቴቶፎ።

⁸ ሌዋታኔ ጌቴቲዛ ዶኣ ቃሴናስ ዳንዳይዛይቲ፥ ጋላሳታ ቃንጊዛይቲ፥ ሄ ጋላሳዮ ቃንጌቶ።

⁹ ሄ ጋላሳ ኦማርስ ባካሌ ጾሊንቴቲ ሜቶ፤ ፖኦ ሂዶታይ ኢዛን ቤቶፎ፤ ዎንታ ጻልቄይ ኢዛን ጻልቆፎ።

¹⁰ ታ ኣይፌታፔ ሜቶ ጌንና፥ ታ ኣዬይ ኡሎ ታ ቦላ ጎርዶንታ ኣጊዳ ጊሻስ ሄ ጋላሳይ ቃንጌቲዳይሳ ጊዶ።

¹¹ «ታ ኣዬይ ኡሎን ዳሼ ሃ ጊዳ ኣቲዳኮ ኣዜ! ታ ኣዬይ ኡሎፔ ኬኢዳ ማላ ኣይስ ሃይቃቤኪና?

¹² ጉልባቴቲ ታና ሞኪ ኤካናስ፥ ንቲካ ታና ንናስ ኣይስ ቤቲዶ?

¹³ ሃኢ ታኒ ሳሮን ኢቺዳኮ፥ ስካዳካ ሼምፖ ዴማናኮሺን።

¹⁴ ሃኢ ላሌቲ ቤቲዛይታ ባስ ኬጺዳ ቢታ ካዎታራኔ ዞሪዛይታራ ታ ስካዳ ሼምፖ ዴማናኮሺን።

¹⁵ ባ ኬ ዎርቃኒኔ ቢራን ኩንዳ፤ ዳናታራ ታ ኢሲፌ ሼምፓናኮሺን።

¹⁶ ቃሴካ ኣይስ ቢታ ጋርሳን ሞጌቲዳ ኣዉጫያ፥ ዎይኮ ኢሲ ጋላሳ ፖኦ ሙሌካ ቤኦንታ ና ማላ ኣይስ ጊዳቤኪና?

¹⁷ ሄን ኢታታ ዋዪሶይ ኣታና፤ ዳቡርሲዛ ኦሶን ዴኢዳይቲ ሼምፓና።

¹⁸ ቃሼቲ ዲዛ ኣሳቲካ ሳሮ ዴማና፤ ባና ኦሲሲዛ ኣሳታ ሃንቆ ቃላ ሲያናይሳፌካ ኣታና።

¹⁹ ላፋቲኔ ጊታ ኣሳቲ ኢሲፌ ቤታና፤ ኣይሌቲካ ሄን ባ ጎዳታፔ ዎዜታና።

²⁰ «ጾሲ ኡንኦ ቦላ ዲዛይታስ ፖኦ፥ ዱሳዚ ጫሞ ቆፋን ኩሚዳዴስ ዴኦ ኣይስ ኢሚዜ?

²¹ ሃይቆ ላሞቲዛይታሲኔ ቆቴቲ ዲዛ ኣቆፔ ኣ ኮዪዲ ዴሞንታይታስ ዴኦ ኣይስ ኢሚዜ?

²² ዱጌ ዱፎን ጌሊሼ ኡፋዬቲዛይታስ ዴኦይ ኣይስ ኢሜቲዜ?

²³ ኢዚ ቢዛ ኦጌይ ኢዛዴፌ ጌሜቲዳዴሲኔ ጾሲ ጎርዲ ዎዳ ኣሳስ ፖኦይ ኣይስ ኢሜቲዜ?

²⁴ ዬሆይ ታስ ካ ጊዲዴስ፤ ዋሶይካ ታስ ጎጊዛ ሃ ማላ ጊዲዴስ።

²⁵ ታ ያዪዳ ሚሽ ታ ቦላ ዪዴስ፤ ታ ዳጋሚዳይሲካ ታ ቦላ ጋኪዴስ።

²⁶ ታ ጊዶን ሂርጋይ ጻላ ዲዛ ጊሻስ ሳሮይ፥ ዎፓይኔ ሼምፖይ ዴና» ጊ ቃንጊዴስ።