ኢዮቤ ማጻፋ 26 - ጋሞ ማጻፋ

ኢዮቤ ሃሳያ

¹ ኢዮቢ ሂዝጊ ዛሪዴስ፤

² «ሃይሳ ኔ ሃሳዮይሳን ዳቡራንቻታ ማዲዳ ኔስ ሚሳቲዜ? ቄሴይ ኣርጋጪዳዴ ሚንዳ ኔስ ሚሳቲዜ?

³ ኣ ኤራቴ ፓጪዳዴስ ኔ ኣይ ዞሬ ኢማዲ! ኣይ ኤራቴካ ኢዛዴስ ቆንጪሳዲ!

⁴ ሂስቲን ሃይሳ ኔ ሃሳያና ማላ ኔና ማዲዳይ ኦኔ? ኔ ሃሳያና ማላ ኔና ዴንዳይ ኦና ኣያና!»

⁵ «ዎልቃማ ዎጋ ጊታ ኣባፌ ጋርሳን ዲዛ ሃይቂዳይታ ሼምፖቲ ዎልቃማ ኮኮርሳን ዴቴስ።

⁶ ሲኦሌይካ ጾሳ ሲንን ቆንጬን ዴስ፤ ኣባዶኔ ጌቴቲዛሶዛ ኣይ ሚሺካ ካማናዉ ዳንዳዬና።

⁷ ጾሲ ፑዴሃ ባጋራ ዲዛ ሳሎዛ ጫርኮ ቦላ ሚጪዴስ፤ ቢታካ ኣይኮይ ባይንዳሶን ኩሎቲ ዳና ማላ ኦዴስ።

⁸ ጾሲ ሻራቲ ሃ ጹንጺ ኦይካና ማላ ኦስ፤ ሃፌ ዴንዶይሳን ሻራቲ ዳኬቴቴና።

⁹ ኢዚ ኡቲዛ ካዎቴ ኣራታ ጌንና፤ ሻራራካ ካማና።

¹⁰ ፖኦኔ ማ ሻካናስ ዎልቃማ ዎጋ ጊታ ኣባ ሲንን ሳሎዛ ዛዋ ኦዲ ሚጪዴስ።

¹¹ ኢዚ ሃንቂዛ ዎዴ ሳሎ ቱሳቲ ዳጋማን ኮኮሬቴስ።

¹² ኢዚ ባ ዎልቃን ኣባ ጮኡ ኦስ፤ ኢዛ ኣ ኤራቴይካ ኤራኣቤ ጌቴቲዛይሳ ይሳና።

¹³ ባ ፔኖዛን ሳሎዛ ጌሻና፤ ጾንጌቲዛ ሾሻ ባ ኩሼን ጫዳና።

¹⁴ ሃይታንቲ ኡባይ ጾሲ ኦዛ ኦሶታፔ ጉታ፤ ኑ ሲዪዛይሲ ኢዛስ ሳሱኬ ጻላ፤ ዎልቃማ ጊሪሳ ኢዛይሳ ኦኒ ኣኬካናዉ ዳንዳይዜ?»