ኢዮቤ ማጻፋ 24 - ጋሞ ማጻፋ

¹ «ኡባ ዳንዳይዛ ጾሳይ ኣይስ ባ ፒርዳ ኢማና ጋላሳ ባሪቤኔ? ኢዛስ ኣማኔቲዳይቲ ኣዉዴ ጋካናስ ኢዛ ፒርዳ ቃላ ናጌታንዴቶ?

² ኢታ ኣሳቲ ዛዋ ላሌቴስ፤ ካይሲ ኤሂዳ ዶርሳታ ሄሜቴስ።

³ ዪኦታ ሃሬ ቦንቄቴስ፤ ኣምኤ ማጫሳያ ቦራ ኦይዱስ ጊዲ ባንታስ ኤኬቴስ።

⁴ ማንቆታ ሻቴቲዲ ጮ ኦጌፔ ጎዴቴስ፤ ኢስታ ሲንፌ ባቃቲዲ ቆቴታና ማላ ኦቴስ።

⁵ ማንቆቲ ባዞን ዲዛ ሃርዲዳ ማላ፥ ባንታ ናይታስ ካ ኮያና ኬኢዲ ዳቡሬቴስ።

⁶ ኡኔቲዲ ሃራታስ ካ ሺሺዛይታ ጊዴቴስ፤ ኢታ ኣሳታ ሃሮ ጊዲዳ ዎይኔ ቶኪዛሶሆዛን ጌዶን ኣቲዳ ፑሹሎ ማጼቴስ።

⁷ ኩሜ ኦማርስ ካሎ ኢቺ ኣቄቴስ፤ ሞጬ ኣሺዛ ማይኦይ ኢስታስ ዴና።

⁸ ዙማ ቦላ ቡኪዛ ኢራን ኢስታ ኣሳቴይ ሙሴስ፤ ኣቂዛሶይ ዪን ዛላ ጋርስ ሺቂ ኣቄቴስ።

⁹ ኣዋይ ሃይቂዳ ናይ ኢስታስ ኣይሌ ጊዳና ማላ ኣዬይ ን ዲጊዲ ቦንቄቴስ፤ ሜቶቲዳይሳ ናዛ ባ ኣጮ ጊሻስ ጊዲ ኦይሶ ኤኬቴስ።

¹⁰ ማንቆቲ ኣይኮ ማይኦይ ባይንዳ ፓጻ ካሎ ኦሶን ጌሌቴስ። ካ ሺሾ ዎዴ ሚርቄዛ ቶኪ ሚዪሼ ባንታስ ጋፋን ሃይቄቴስ።

¹¹ ኢታ ኣሳታ ጋዴን ዎጋራ ኣይፌፔ ዛይቴ ኬሴቴስ፤ ዎይኔ ሚ ኣይፌፔ ጫጄ ኣጌቴሴሺን ኢስቲ ጊዲኮ ሳሜቴቴስ።

¹² ካታማታን ሃይቃናስ ቶቂዛ ኣሳቲ ጎታሬቴስ፤ ማዱንጺዳ ኣሳቲካ ማዶ ኦይሾን ዋሴቴስ። ጾሲ ጊዲኮ ኢስታ ቦላ ኦሴቲዳ ጌኔዛ ቤዪቤና።

¹³ ፖኦ ኢጺዛ ኣሳቲ ዴቴስ፤ ፖኦይ ኣዛኮ ኤሮንታ ጊሻስ ፖኦ ኦጌ ካሌቴና።

¹⁴ ሼምፖ ዎዛ ኡራይ ዎንቶንታ ዴንዲዲ ማንቆታኔ ሜቶታንቻታ ዎስ፤ ኦማርሲካ ካይሶስ ኬዜስ።

¹⁵ ላይማ ኡራይ ጋዴይ ኦማርሳናይሳ ናጌቴስ፤ ኦኒካ ቤኦንታ ማላ ባ ሲን ጎዜቴስ።

¹⁶ ካይሶቲ ካይሶታናስ ኦማርሳራ ኬ ቦኪ ጌሌቴስ፤ ጋላስ ጊዲኮ ቆቴቲ ፔኤቴስ። ፖኦካ ኢጼቴስ።

¹⁷ ማራ ሺሮቴ ኢስታ ኡፋይሲዛ ጊሻስ ኡባሲካ ጊርዲ ጊዳ ማይ ኢስታስ ዎንታ ማላዶ ማላ።

¹⁸ «ጊዲኮካ ኢስቲ ሃ ቦላ ቤቲዛ ሆሞ ማላ ጉ ዎዴስ ጻላ ኢስቲ ቤታና። ኢስታ ቢታይካ ቃንጌቲዳይሳ ጊዳና፤ ኢስቲ ዎይኔ ሚ ቶኪዛሶሆዛ ኦኒካ ቤና።

¹⁹ ሻቺ ሆኦን ማዪዲ ይዛይሳ ማላ ሲኦሌይካ ናጋራንቻታ ባኮ ቦንቃ ኤካና።

²⁰ ኢስታ ኣዬቲ ኡባይ ኢስታ ዶጋና፤ ኢስታ ኣሾዛካ ጉጹኔይ ማና፤ ኢታ ኣሳቲ ቆፌቶኮና፤ ሄሳካ ሚ ማላ ሜቄሬታና።

²¹ ሃይሲ ኡባይ ኢስታ ቦላ ጋኪዳይ ኢስቲ ዬሎንታ ማይኒዳ ማጫሳታ ቦንቂዳ ጊሻሲኔ ኢስታ ኣዚናቲ ሃይቂዳ ማጫሳታስ ኣይኮ ቃቴካ ቤሶንታ ጊሻሳ።

²² ጊዶ ኣቲን ጾሲ ባ ዎልቃን ዳናቴን ዲዛ ኣሳታ ዲጋና፤ ኢስታስ ዴኦይ ጊጋ ሚሳቲኮካ ኢስታ ዱሳስ ኣማንዛ ሚሺ ዴና።

²³ ጾሲ ኢስታ ሳሮን ዳና ማላ ኦኮካ፥ ኢስቲ ቢዛ ኦጌ ኡባ ቲሺ ሂስቲ ጼሌስ

²⁴ ኢታ ኣሳቲ ጉ ዎዴስ ዱሬታና፤ ጊዶ ኣቲን ኤሶራ ሻራፋ ማላ ሹሊ ያና፤ ሹላ ካ ማላ ቡጬታና።

²⁵ «ሃይሳ ማላ ጊዴና ጌቴቲኮ ታኒ ዎርዳንቻታኔ ታ ሃሳይዳ ቃላይ ሊኬ ጊዶንታይሳ ኦኔ ኣማንናይ?»