ኢዮቤ ማጻፋ 22 - ጋሞ ማጻፋ

ኤልፋዜ ሃሳያ

¹ ቴማኔ ዴሬ ኣስ ኤልፋዜይ ሂዝጊ ዛሪዴስ፤

² «ኣሲ ጾሳ ጎኣናዉ ዳንዳይዜ? ሃራይ ኣቶሺን ኤራ ኣስ ጊዲኮካ ጎኣዚ ኢዛዴሳፌ ኣቲን ጾሳስ ጊዴና።

³ ኔ ጺሎቴ ኡባ ዳንዳይዛ ጾሳ ኣይ ጎኣኔ? ዎሶይ ባይንዳ ኔ ዴኦዚ ኢዛ ኣይ ማዳኔ?

⁴ ሂስቲን ኔ ቦላ ኢዚ ፒርዲዳይኔ ሃይሳ ኔና ሃንቂዳይ ኔኒ ጾስ ያዪዛ ጊሻሴ?

⁵ ሃይሲ ኡባይ ኔና ጋኪዳይ ኔ ኢታቴ ዳሪዳ ጊሻሲኔ ኔ ናጋራይ ዛዋይ ባይንዳይሳ ጊዲዳ ጊሻስ ጊዴኔ?

⁶ ኢሲ ጋሶይካ ባይንዳ ኔ ኢሻታፔ ኦይሶ ኤካዳሳ፤ ቃሴ ኢስታ ማይኦ ቃራ ኤካዳ ኢስታ ካሎ ኣሻዳሳ።

⁷ ጋፊዲኔ ሳሜቲዲ ዳቡርዳይታ ካኔ ሃ ዲጋዳሳ።

⁸ ኔ ጋዳዴኔ ዎልቃማ ኣስ ጊዳዳ ኢዛን ዲዛ ቦንቾ ኣስ ጊዲኮካ፥

⁹ ኔኒ ኣምኤ ማጫሳታ ሜላ ኩሼ ዬዳዳሳ፤ ዪኦ ናይቲካ ባና ኣይሳና ዴኦዛ ይሳዳሳ።

¹⁰ ሃይሳ ጋሶን ኔና ኦይካና ዎጺማዴይ ኔና ዩዪ ኣዴስ፤ ኔ ኤዝጎንታ ሜቶይ ኔና ዳጋንና።

¹¹ ኔና ጼሎይ ሜታና ጋካናስ ኔስ ሚዴስ፤ ዲኦ ሃካ ኔና ሜጪዴስ።

¹² «ጾሳይ ቃ ሳሎን ዲዛይሳ ጊዴኔ? ጾሊንቴቲ ኣይኮካ ቃሶሆን ዲኮካ ኢዚ ኢስታፌ ቦላራ ዲዲ ኢስታ ጼሌስ።

¹³ ኔኒ ጊዲኮ፥ ‹ጾሲ ኣይ ኤሪዜ? ጊርዲ ጊዳ ማን ኢዚ ዋኒ ኑ ቦላ ፒርዳናዉ ዳንዳይዜ?

¹⁴ ሳሎ ቦላን ኢዚ ሲሜሬቲሺን ፒ ጊዳ ሻራይ ኢዛ ካሚዛ ጊሻስ ኢዚ ቤያናዉ ዳንዳዬና› ጋሳ።

¹⁵ «ናጋራንቻቲ ሲሜሬቲዛ ቤኒ ኦጌዛ ኔ ካላይ?

¹⁶ ኢስቲካ ዎዴይ ጋኮንታ ሲንራ ቦሻን ሾጬቲዳ፤ ዲኦንካ ሜጬቲዲ ጻጶራ ይዳ።

¹⁷ ኢስቲካ ኡባ ዳንዳይዛ ጾሳ፥ ‹ኑፔ ኔ ሃካ፤ ኔ ኑስ ኣይ ኦናስ ዳንዳያይ?› ጊዳ።

¹⁸ ጊዲኮካ ኢስታ ኬ ዱሬቴን ኩንዳይ ጾሳ። ሄሳ ጊሻስ ታኒ ኢታ ኣሳታ ቆፋ ኤኪኬ።

¹⁹ «ኪያ ኣሳቲ ኢታ ኣሳቲ ቃጻዬቲሺን ቤኢዲ ኡፋዬቴቴስ፤ ሱሬ ኣሳቲ ኢስታ ቦላ ቂልጬቴስ፥

²⁰ ‹ቱንካ ኑ ሞርኬቲ ይዳ፤ ኢስታ ሃሮዚ ኩሜ ታማን ጹጌቲዴስ።›

²¹ «ሄሳ ጊሻስ ኢዮቤ ኔናቴ ጾሳስ ሃሪሳ፤ ኢዛራካ ኔ ሳሮን ዳ፤ ኔ ሃይሳ ኦኮ ሎኦ ሚሽ ዴማና።

²² ጾሲ ኔስ ኢሚዛ ቲሚርታ ኤካ፤ ኢዛ ቃላካ ኔ ዎዚናን ዎ።

²³ ኔናቴ ኡባ ዳንዳይዛ ጾሳኮ ኔ ዛሪዳኮ፥ ኔ ካሴ ማላ ሃናና፤ ኔ ሶፔ ኢታ ኦሶ ዲጋ።

²⁴ ዎርቃ ጉዱላን ኦላ፤ ኦፊሬ ዎርቃ ሻፋ ሹቻ ማላ ዎራ ኦላ።

²⁵ ሄ ዎዴ ኡባ ዳንዳይዛ ጾሳይ ኔስ ዎርቃኔ ሙሩታ ቢራ ጊዳና።

²⁶ ሄ ዎዴ ኡባ ዳንዳይዛ ጾሳን ኔኒ ኡፋዬታና፤ ኢዛን ኣማኔታዳ ኔ ዳና።

²⁷ ኔ ኢዛኮ ዎሲዛ ዎዴ ኢዚ ኔ ዎሳ ሲያና፤ ኔ ኣዲኔቲዳይሳ ኢዛስ ጋና።

²⁸ ኔ ቆፋይ ኡባይ ኔስ ፖሌታና፤ ኔስ ኦጌ ኡባይ ፖኦ ጊዳና።

²⁹ ጾሲ ኦቶራንቻታ ካዉሻና፤ ኣሽኬታ ጊዲኮ ኢዚ ኣሻና።

³⁰ ኔኒካ ሱሬ ዎዚናይ ዲዛዴ ጊዲኮ ጾሲ ኢታ ኡባፌ ኔና ናጋና፤ ኔ ኩሼቲካ ቆሆ ኦሶፔ ጌሽ ጊዲኮ ጾሲ ኔና ኣሺ ኤካና።»