ኢዮቤ ማጻፋ 19 - ጋሞ ማጻፋ

ኢዮቤ ሃሳያ

¹ ኢዮቢ ሂዝጊ ዛሪዴስ፤

² «ኢንቴ ታና ኣዉዴ ጋካናስ ዋዪሳንዴቲ? ኣዉዴ ጋካናስ ዮኦን ታስ ሜቄ ሜንንዴቲ?

³ ሄኮ ኢንቴ ታና ታሙቶ ጫዬታ፤ ታና ካዉሺሼካ ዬላቴኬታ።

⁴ ቱሙካ ታኒ ባሌቲዳ ጊዲኮ ታ ባላይ ታና ጻላ ቆሃና።

⁵ ቱሙ ኢንቴ ኢንቴና ቂሲዲ ታ ካዉሻቴ ኢንቴስ ማርሼ ሚሽ ኦታ።

⁶ ጊዲኮካ ሃይሳ ኡባ ሜቶዛ ታ ቦላ ጋዳይኔ፥ ጊቴ ጊዶ ታና ዬጊዳይ ጾሳ ጊዲዳይሳ ኢንቴ ኤራና ማላ ታ ኮያይስ።

⁷ ታ ቆሄታዲስ ጋዳ ዎሲን ታና ሲዪዛ ኣስ ዴማቤኬ፤ ታ ቃላ ቁ ኦዳ ማጋኒኮካ ሱሬ ፒርዳ ዴማቤኬ።

⁸ ጾሲ ታስ ኦጌዛ ጎርዲዳ ጊሻስ ኣናሶይ ዴና፤ ታ ባናሶዛካ ማን ጎርዲዴስ።

⁹ ታ ቦንቾዛ ታ ሁኤፔ ቃሪዲ ታና ካዉሺዴስ።

¹⁰ ታ ኣሳቴ ኡባሶራ ቆጼሬዲ ሙሌራ ላሊዴስ፤ ታስ ዲዛ ሂዶታ ጻጶፔ ሾዴቲዲ ኩንዲዛ ሚ ማላ ኦዴስ።

¹¹ ጾሲ ታና ሃንቄቲዲ ጊታ ሜቶ ታ ቦላ ጋዴስ፤ ባስ ሞርኬ ማላ ታና ቆዲዴስ።

¹² ታና ይሳናስ ባ ኦሳንቻታ ኪቲዴስ፤ ታስ ዱንካኔዛ ዩዪ ኣዲ ታና ጊዶዳ።

¹³ «ጾሲ ታ ኢሻቲ ታፔ ሃካና ማላ ኦዴስ፤ ታና ኤሪዛ ኣሳቲ ኡባይ ታና ኣሳ ዴሬ ኣስ ኬሲዳ።

¹⁴ ታ ዳቦቲ ታፔ ሃኪዳ፤ ታ ላጌቲካ ታና ባሊዳ።

¹⁵ ታኒ ታሶን ኢማቴ ሞካ ኤኪዳይቲ ኡባይ ታና ባሊዳ፤ ታ ጋራዴቲ ታና ኢማ ማላ ቆዲዳ፤ ኣላጋ ማላካ ጼሊዳ።

¹⁶ ታኒ ታ ኦሳንቻዛ ጼይጊሺን ኢዚ ታስ ኮዬና፤ ‹ታና ማዳርኪ› ጋ ታ ዋሲሺንካ ኤሮ ጌና።

¹⁷ ታ ማቻ ታፔ ኬኢዛ ፔኖዛ ሻቴታዱስ፤ ታ ኢሻቲካ ሃራሬቲዳ።

¹⁸ ቄሪ ናይቲካ ታና ካቴስ፤ ታና ቤኢዛ ዎዴ ታ ቦላ ቂልጬቴስ።

¹⁹ ታስ ማታ ላጌቲካ ታና ሻቴቲዳ፤ ታ ሲቆቲ ታ ቦላ ሞርኬ ጊዲ ዴንዲዳ።

²⁰ ታስ ኣሾዚ ዉሪን ጋልባዚ ሜቄራ ኦይኬቲዴስ፤ ታና ሺሺን ኣታዲስ።

²¹ «ታ ሲቆቶ! ጾሳ ኩሼይ ታና ሾጪዳ ጊሻስ ኣኔ ዛይ ታስ ሚሼቲቴ! ታስ ቃቲቴ!

²² ጾሲ ታና ጎዶይሳ ማላ ኢንቴካ ታና ኣዛስ ጎዴቲ? ሃይሳ ጋካናስ ኢንቴ ታና ዋዪሲዳይሲ ጊዴኔ?

²³ ሃይሳ ጋካናስ ታ ሃሳይዳ ቃላ ኣኬኪዛይኔ ማጻፋን ጻፊዛ ኣሲ ዲዛኮ ታና ኣይ ማላ ኡፋይሳኔሺን!

²⁴ ኢስኪርቶኒኔ ኢርሳሴን ጻፌቲዲ ዎይኮ ሹቻ ቦላ ዎጬቲ ኡቲዲ ሜርናስ ዳና ማላ ኦዳኮ ኣይ ማላ ታና ኡፋይሳንዴሺን!

²⁵ ጊዶ ኣቲን ታና ኣሺዛይሲ ፓጻ ዴኢዛ ማላ ዉርሴ ዎዴን ታና ዎዛናስ ቢታ ቦላ ኢዚ ኤቃናይሳ ታኒ ኤራይስ።

²⁶ ታስ ጋልባዚ ሜቴቲ ዉሪኮካ ታኒ ታ ኣሳቴፌ ሻኬታዳ ታኒ ጾሳ ቤያናይሳ ኤራይስ።

²⁷ ሃራ ኣስ ጊዶንታ ኢዛካ ታኒ ታ ሁኤን ታ ኣይፌራ ቤያና፤ ታ ዎዚናይካ ሄ ጋላሳዮ ኬሂ ላሞቴስ።

²⁸ «ታ ሲቆቶ! ታና ዋላሲዲ ዋዪሳናስ፥ ‹ሃይሳ ሜቶዛ ኢዚ ባርካ ባስ ኤሂዴስ› ጊዲ ሃሳዬታ።

²⁹ ጾሳ ሃንቆይ ማሻን ቃጻዬቴን ጋዛ ጊሻስ ማሻይ ኢንቴና ሞንታ ማላ ናጌቲቴ። ጾሳ ፒርዳይ ዲዛይሳካ ኤሪቴ።»