ኢዮቤ ማጻፋ 18 - ጋሞ ማጻፋ

ቤሊዳዴ ሃሳያ

¹ ሹሃ ዴሬ ኣስ ቤሊዳዲ ሂዝጊ ዛሪዴስ፤

² ኢዮቤ! ኔ ኣይስ ሃይሳ ማላ ሃሳያ ዳርሳይ? ኣኔ ኤዝጋ፤ ኑኒካ ሃሳዮስ።

³ ኔኒ ኑና ኣይስ ሜሄታ ማላ ቆዳይ፤ ኔኒ ኣይስ ኑና ቱሌታ ማላ ኣኬኮንታ ኣስ ኦ ጼላይ?

⁴ ኔኒ ሃንቄቲኮ ኔና ቆሃሳ ኣቲን ኔ ሃንቆዛን ቢታይ ሜላ ኣቴና። ዛላቲካ ባ ዲዛሶፔ ቃጼቴና።

⁵ ናጋራንቻ ጾምፔይ ቶኣና፤ ታማ ላጮይካ ናምኣን ቤቴና፤

⁶ ኢዛ ዱንካኔ ጊዶን ዲዛ ፖኦይ ቶኣና፤ ፖኦዚካ ማና።

⁷ ኢዛስ ሚኖ ታንጎይ ቃሚ ቃሚ ባና፤ ጌኔ ቆፒዛዴ ቆፋይ ኢዛ ዛሪ ኩንዲሳና።

⁸ ኢዚ ባርካ ቢዲ ዎጺማዴን ጌላና፤ ኢዛ ቶሆይካ ጊቴን ቃጼታና።

⁹ ዎጺማዴይ ኢዛ ቂርጴ ኦይካና፤ ሄንካ ዋጺ ኣሻና።

¹⁰ ሳኣ ቦላ ያርዴ ዎዶሮይ ሚጬቲዴስ፤ ኢዛ ኦጌንካ ዎጺማዴይ ጊጌቲዴስ።

¹¹ «ያሺ ኢዛ ጊዶዴስ፤ ጉዬራ ካሊ ካሊ ጎዴሬስ።

¹² ኢዛ ዎልቃይ ኮሻን ዉሪዴስ፤ ቦሻይካ ኢዛ ይሳናስ ጊጌቲዴስ።

¹³ ሃርጌይ ኢዛ ኣሳቴ ጊልቂሳና፤ ሃይቆይካ ሙሌራ ኤኪ ባና።

¹⁴ ሂርጋይ ባይንዳ ኣማኔቲ ዲዛ ኬፌ ኢዚ ጎዴታና፤ ኣስ ኡባ ሃሪዛ ሃይቆይ ኢዛ ኤካና።

¹⁵ ኢዛ ኬን ኣይ ሚሺካ ኣቴና፤ ኢዚ ኣቂዛሶዛንካ ዲኔ ታማይ ላሌታና።

¹⁶ ጻጶፔ ሜሊዛ ሚ ማላኔ ሃጋቲካ ሜቄሬቲዛ ሚ ማላ ጊዳና።

¹⁷ ቢታ ቦላ ኢዛ ቆፒዛ ኣሲ ዴና፤ ኢዛ ጎባቴካ ቢታፌ ያና።

¹⁸ ኢዚ ፖኦሶፔ ጌዴ ማን ጎዴታና፤ ቢታ ቦላፌ ኢዚ ኪቻና።

¹⁹ ኢዛ ዳቦታ ጊዶፌ ኢዛ ላታና ዬሌታይ ቤቴና፤ ኢዛ ባቻንካ ዛሬይ ኢዛስ ኣቴና።

²⁰ ኡሻቻ ባጋራኔ ሃዲርሳ ባጋራ ዲዛ ኣሳይ፤ ኢዛ ቦላ ጋኪዳ ሜቶዛ ጊሻስ ኬሂ ባቢዲ ኮኮራና።

²¹ ኣይ ዎዴካ ኢታ ኣሳታ ዉርሴይ ሄሳ ማላ፤ ጾሳስ ያዮንታ ኣሳ ቃዳይ ሃይሳ።»