ኢዮቤ ማጻፋ 17 - ጋሞ ማጻፋ

¹ «ታ ኣያናይ ዳቡርዴስ፤ ታ ዳና ላይይካ ፖሌታናዉ ማቲዴስ፤ ዱፎይካ ታና ናጌስ።

² ታና ቂዛይቲ ታና ዩዪ ኣዳ፤ ታ ኣይፌይካ ኢስቲ ኢጺዛይሳ ጼሌስ።

³ ታ ጾሳዉ! ኔፔ ኣቲን ታስ ኤቃናይ ሃራይ ዴና፤ ኔኒ ኔ ሁኤራ ታስ ዋሴ ጊዳ።

⁴ ኢስቲ ፒልጊዲ ኣኬካናዉ ዳንዳዮንታ ማላ ኢስታ ቆፋ ጎርዳዳሳ፤ ሄሳ ጊሻስ ኢስቲ ጾናና ማላ ኦፋ።

⁵ ሚሼ ዴማናዉ ጊዲ ባ ላጌዛ ኣ ኢሚዛ ኣሳ ናይታ ቦላ ጎሜይ ጋካና።

⁶ «ጾሲ ታና ኣሳስ ካሳ ሚሽ ኦዴስ፤ ኣሳይ ኢዛዴ ቦላ ጩቲዛ ኣሳ ማላ ጊዳዲስ።

⁷ ኣፉንፌ ዴንዲዳይሳን ታ ኣይፌቲ ዶልጁሚዳ፤ ኩሜ ታ ኣሳቴይካ ኤሾ ማላ ጊዲዴስ።

⁸ ጺሎ ኣሳቲ ሃይሳን ዳጋሜቲዳ፤ ጌሻቲ ጾሳ ኣማኖንታ ኣሳታ ቦላ ሃንቄቲዳ።

⁹ ጊዶ ኣቲን ጺሎቲ ቱማ ኦጌፔ ካሬ ኬኤቴና፤ ጌሻቲ ሚኖቴ ቦላ ሚኖቴ ጉጄቴስ።

¹⁰ «ኢንቴ ኡባይካ ናምኣን ዪዲ ታ ሲንን ማርሼቲኮ፤ ኢንቴ ጊዶፌ ኢሲ ኣኬካራ ዲዛ ኣስ ዴሚኬ።

¹¹ ታ ላይይ ዉሪዴስ፤ ታ ቆፋይኔ ታስ ዎዚና ኣሞይ ሃዳ ጊዲ ኣቲዴስ።

¹² ሃይቲ ሃ ኣሳቲ ኦማርሳ ጋላስ ጌቴስ፤ ፖኦዛ ቃሴ ማና ሃኔስ ጌቴስ።

¹³ ሃይሳፌ ጉዬ ታስ ዲዛ ቃዳይ ዱጌ ሃይቂዳ ኣሳቲ ዲዛሶ ዱፎን ዎ፤ ያን ማሶን ታኒ ታ ሂጻ ኦንጋና።

¹⁴ ዱፎ፥ ‹ታ ኣዋዉ!› ጋዳ ታ ጼይጋና፤ ታና ሚዛ ጉጹኔታ ታኒ፥ ‹ታ ኣዬ፥ ታ ሚቼዬ!› ጋዳ ጼይጋና።

¹⁵ ሂስቲን ታስ ኣይ ሂዶታይ ዲዜ? ታስ ሂዶታ ጊዲዛ ሚሽ ኦኔ ታስ ጼላናይ?

¹⁶ ታኒ ዱጌ ሲኦሌ ዎሺን ሂዶታይ ታናራ ኢሲፌ ዎኔ? ኢሲፌካ ዱጌ ዱፎን ኑ ጌላኔ?»