ኢዮቤ ማጻፋ 16 - ጋሞ ማጻፋ

ኢዮቤ ሃሳያ

¹ ኢዮቢካ ሂዝጊ ዛሪዴስ፤

² «ታኒ ሃይሳ ማላ ሃሳያ ዳሮ ዎዴ ሲያዲስ፤ ኢንቴ ሳሌዛ ዞራንቻታ።

³ ሃይሳ ኢንቴ ሃዳ ሃሳያስ ዉርሴ ባዬ? ሃይሳ ላጌ ታናራ ማርሼታና ማላ ኢንቴና ዴንዳይ ኣዜ?

⁴ ኢንቴ ታ ሶሆን ታኒ ኢንቴ ሶሆን ጊዲዳኮ ካን ታኒ ሁኤ ቃዳ ሃኢ ኢንቴ ጊዛይሳ ኡባ ኢንቴ ቦላ ሎኤ ሃሳያናኮሺን።

⁵ ሄሳ ማላካ ታ ዶናን ኢንቴና ሚንናኔ ሚንናስ ዳሮ ሃሳያናኮሺን።

⁶ «ጊዶ ኣቲን ዳሮ ሃሳይኮካ ታ ሃርጌይ ሃ ሎኤና፤ ጮኡ ጋ ዳንዳይኮካ ታ ዋዬይ ታፔ ኪቼና።

⁷ ጾሳዉ! ታና ኣሳቴፌ ካሬ ኬሳዳሳ፥ ታ ዴሬ ኣሳ ኡባ ይሳዳሳ።

⁸ ታ ኣሳቴይ ጉንዶይሲ ታ ቦላ ዴንዲዲ ኔኒ ናጋራንቻ ጊዲ ታ ቦላ ማርካቴስ።

⁹ ጾሲ ታና ሃንቂዲ ታ ኣሳቴ ቃንጼሬዴስ፤ ታና ኢጺዲ ባ ኣች ታ ቦላ ጋርጪዴስ፤ ታ ሞርኬይ ባ ኣይፌ ታ ቦላ ማጺ ኬሲዴስ።

¹⁰ ኣሳይ ታ ዩሾን ሺቄቲዲ ታ ቦላ ጬቄቲዴስ፤ ታና ቂ ቃላን ባቂዳ።

¹¹ ጾሲ ታና ኢታ ኣሳታስ ኣ ኢሚዴስ፤ ማካላንቻታ ኩሼን ዬጊዴስ።

¹² ታ ሳሮን ዳይሲኮሺን ጊዲኮካ ጾሲ ባ ሃንቆዛን ታና ሜንሬዴስ፤ ታ ቆ ጩሊ ኦይኪዲ ታና ዳቡርሲዴስ፤ ባ ቆፋ ታ ቦላ ፖሊዴስ።

¹³ ዎንዳፋንቻቲ ታና ጊዶዳ፤ ቃቴ ባይንዳ ታ ኪላሆታ ቃንጼሬዳ፤ ታ ጪዬዛካ ቢታ ቦላ ጉሲዳ።

¹⁴ ኢዚ ታና ዛሪ ዛሪ ማዱንዴስ፤ ሚኖ ኦላንቻ ማላ ዚዚሚ ዪዲ ታና ሾጪዴስ።

¹⁵ «ታ ካዮቴስ ማቃ ሲካ ማይኣዲስ፤ ጉዱላ ቦላ ጉፋናዲስ።

¹⁶ ታ ኣይፌሶይ ዬኮን ዞኢዴስ፤ ሳካና ማይ ታ ሲጲን ካሚዴስ።

¹⁷ ሃይሲ ኡባይ ሃንሺን ታ ኦዳ ቆሆይ ዴና፤ ታኒ ታ ዎሳ ጾሳኮ ሺሺዛይ ዎዚና ጌሻቴና።

¹⁸ «ቢታዞ! ታና ጋኪዳ ቆሆዛ ኔ ካሞፋ! ሱሬ ፒርዳ ጊሻስ ታ ሺሺዛ ማጋናይ ካሜቲ ኣታና ማላ ኔ ኦፋ!

¹⁹ ሄኮ ታስ ማርካቲዛዴይኔ ኣፋካቶ ኤቂዛዴይ ሳሎን ዴስ።

²⁰ ታ ላጌቲ ታና ሌቆን ጼሌቴስ፤ ታኒ ጊዲኮ ፑዴ ጾሳስ ዬካይስ።

²¹ ኣስ ኣሳራ ጋ ሃሳይሲዲ ማቃዪንዛዴይ ዲዛይሳ ማላ፤ ኣስ ጾሳራ ጋ ማቃዪንዛ ኣሲ ዲዳኮ ኣዜ ዲዛይ?

²² «ታ ላይስ ዉርሴይ ጋኬስ፤ ታ ሃ ሲማ ዮንታሶ ባናስ ጉ ዎዴይ ጻላ ኣቲዴስ።