ኢዮቤ ማጻፋ 14 - ጋሞ ማጻፋ

¹ «ኣሾ ማይኢዳ ኣሳስ ላይይ ቃን፤ ሄሲካ ሜቶን ኩሚዴስ።

² ጪሻ ማላ ቤቲዲ ሄራካ ቆኬስ፤ ኤሾ ማላ ዳሮ ጋምኦንታ ሄራ ኣስ።

³ ሂስቲን ኔኒ ሃይሳ ማላ ኣሳ ሜቴ ካሌታይ? ኔ ሲንካ ፒርዳስ ሺሻኔ?

⁴ ቱና ሚሻፌ ጌሻ ሚሽ ዴማናስ ዳንዳይዛዴይ ኦኒካ ዴና።

⁵ ኣሳ ላይስ ዎዳ ዛዋይ ዴስ፤ ኣሲ ዳና ኣጊናቲካ ኔ ማታን ቆዳን ዴቴስ፤ ኔኒካ ዎዳ ላይ ዛዋፔ ኣዛዴይ ዴና።

⁶ ኡኔቲ ኣቂዛዴይ ባ ኦና ጋላሳ ኦሶዮ ፖሊዲ ኡፋዬቲዛ ማላ፥ ኣሲካ ባ ዳቡራ ጋላሳን ኡፋዬታና ማላ ኔ ኣይፌ ኢዛ ቦላፌ ዴን።

⁷ ቃንጼቲዳ ሚ ኡስካ ሂዶታይ ዴስ፤ ናምኣን ሲሚ ኣጫናሲኔ ሃጋታ ኬሳናስ ዳንዳዬስ።

⁸ ኣይኮካ ጻጶቲ ቢታ ጊዶን ጪሚኮካ፥ ኣኖይካ ቢታ ጊዶን ሙሲኮ፥

⁹ ኢርጻ ዴሚኮ ናምኣን ኣጬስ፤ ኦራ ቶኬቲዳ ሚ ማላ ሃጋታ ኬሴስ።

¹⁰ ኣሲ ጊዲኮ ሃይቂዲ ካሴ ባይንዳ ማላ ሃኔስ፤ ሃይቂዳፔ ጉዬ ኣዋን ቤታኔ?

¹¹ ኣባ ሃ ዉሪዛ ማላ፥ ሻፋ ሃካ ሜሊዛ ማላ፥

¹² ኣሲካ ሄሳ ማላ ሃይቂዳፔ ጉዬ ሃ ሲሜና፤ ሳሎይ ኣናሼ ጋካናስ ዴንዴና፤ ስኮፌካ ቤጌና።

¹³ «ሃይቂዳይታ ጊዶን ኔ ታና ቆቲዳኮ ኣዜ ዲዛይ! ኔ ሃንቆዚ ኣና ዎዴይ ጋካናስ ኔ ታና ቆቲዳኮ! ቃጻሮ ጋላስ ቃቻዳ ኔ ታና ቆፒዳኮ!

¹⁴ ኣሲ ሃይቂዳፔ ጉዬ ኣሾራ ፓጻ ዳናስ ዳንዳይዜ? ታስ ዎዴይ ላሜታና ጋካናስ፥ ታ ሃይሳ ባጼ ላይ ጌንጫ ኣና።

¹⁵ ሄ ዎዴ ኔኒ ታና ጼይጋና፤ ታኒካ ኔስ፥ ‹ዬ› ጋና፤ ኔ ሜታ ጊዲዳ ታና ቤያናስ ኔ ላሞታና።

¹⁶ ሄኮ ሃኢ ኔ ታ ሄሜታ ካሌታሳ፤ ጊዲኮካ ታ ናጋራ ቆፓካ።

¹⁷ ታ ቆሆይ ካራጺቴን ጹንቴታና፤ ታ ናጋራካ ኔ ካማና።

¹⁸ «ዙማይ ሃሮቲዛ ማላኔ ዎዲዛ ማላ፥ ዛላይካ ባ ዲዛሶፔ ቃሌቲዛ ማላ፥

¹⁹ ሃ ሹች ዎጪዲ ኦንጊዛ ማላ፥ ዲኦይ ቢታ ሜጪዛ ማላ ኔኒካ ኣሳ ሂዶታ ይሳሳ።

²⁰ ኔ ዎልቃይ ሜርናስ ኢዛዴ ቦላ ሚኔስ፤ ኢዚካ ካሴ ባይንዳ ማላ ሃኔስ፤ ኔ ኢዛ ሜካ ላማዳ ኔ ሲንፌ ይሳሳ።

²¹ ኢዛ ናይቲ ቦንቾ ዴሚዳኮካ ኢዚ ኤሬና፤ ካዉዪዛኮካ ኢዚ ጼሌና።

²² ኢዛስ ኢዛ ኣሳቴ ዋዬዚ ሲዬቴስ፤ ኢዚካ ባ ሜቶዛ ጊሻስ ጻላ ዬኬስ።»