ኢዮቤ ማጻፋ 13 - ጋሞ ማጻፋ

¹ «ሄኮ ሃይሳ ኡባ ታ ኣይፌይ ቤዪዴስ፤ ታ ሃይካ ሲዪዲ ኣኬኪዴስ።

² ኢንቴ ኤሪዛይሳ ኬና ታኒካ ኤራይስ፤ ታ ኣይኮንካ ኢንቴፌ ጉጺኬ።

³ ጊዲኮካ ታ ሃሳያይ ኡባ ዳንዳይዛ ጾሳራ፤ ታ ኢዛራካ ማርሼታና።

⁴ ኢንቴ ጊዲኮ ዎርዶን ኩሚዴታ፤ ኦናካ ፓናዉ ዳንዳዮንታ ኣኪሜታ ማላ።

⁵ ሃይሳ ኡባፌ ኢንቴ ጮኡ ጊዳኮ ኤራንቻታ ሚሳቲ ቤታናኮሺን!

⁶ ታኒ ሺሺዛ ማርሼ ቃላ ሲዪቴ፤ ታ ቆሆካ ታኒ ዮቲሺን ጮኡ ጊዲ ኤዝጊቴ።

⁷ ጾሳ ሱንን ኣይስ ዎርዶ ሃሳዬቲ? ባሌን ኢንቴ ጾሳ ኡፋይሳና ኢንቴስ ሚሳቲዜ?

⁸ ኢዛ ቤሶንታ ኦጌራ ማዴቲ? ኢዛስ ጻባቃ ኤቃንዴቲ?

⁹ ጾሲ ኢንቴና ቆሪዳኮ ኢሲ ሎኦ ሚሽ ኢንቴፌ ዴማንዴሻ? ኢንቴ ኣሳታ ኤይሲዛይሳ ማላ ጾሳካ ኤይሳናዉ ዳንዳያና ኢንቴስ ሚሳቲዜ?

¹⁰ ኢንቴ ጌማራ ዎርዶ ማዲኮ ቱማፔ ጾሲ ኢንቴና ሃንቃና።

¹¹ ኢዛ ቦንቾይ ኢንቴና ያሼኔ? ኢዛ ቴማይካ ኢንቴና ዳጋንኔ?

¹² ኢንቴ ሌሚሶን ሃሳይዛ ሃሳያቲ ቢዲን ማላ ጎኣይ ባይንዳይታ፤ ኢንቴ ማርሼቴይካ ማና ሚሻ ማላ ሜቄሬታና።

¹³ ኣኔ ጮኡ ጊቴ! ታኒ ሃሳያና ማላ ታስ ጊሻ ኢሚቴ፤ ሄሳፌ ጉዬ ባ ዶሶይሳ ሃኖ።

¹⁴ «ታኒ ኣች ሳጻዳ ጌንጬጫሼ ዲዛይ ኣዛሴ? ታ ሼምፖያካ ታ ኩሼን ዳዉስ።

¹⁵ ሄሳ ጊሻስ ጾሲ ታና ዎና ኮይኮካ ታፔ ኣቲዛ ሚሺ ኣይኮይካ ዴና፤ ጊዲኮካ ታ ሃኖዛ ኢዛስ ኤሪሳና።

¹⁶ ናጋራንቻ ኣሲ ጾሳ ሲን ሺቃናስ ዳንዳዮንታ ጊሻስ ኦኔ ኤሪዛይ ሃይሲ ታ ጻላቴ ፓጻናስ ጋሶ ጊዳናስ ዳንዳዬስ።

¹⁷ ኣኔ ታ ሃሳይዛ ቃላታ ዎጋራ ኤዝጊቴ፤ ታ ዶናራ ታ ማርካቲዛይሳ ሲዪቴ።

¹⁸ ታ ማርሼቴ ሎኤ ጊጊሳዳ ሺሻዲስ፥ ኢዚ ታስ ፒርዳናይሳካ ታ ኤራይስ።

¹⁹ ታና ሞቲዛይ ዲኮ ታኒ ማርሼቶንታ ጮኡ ጋዳ ሃይቃና።

²⁰ «ጎዳዉ! ታ ኔ ሲንፌ ቆቴቶንታ ማላ ሄይታ ናምኡ ሚሻታ ታስ ኦ።

²¹ ሄይቲካ ኔ ሃንቆ ቄሴታ ታ ቦላፌ ዴን፤ ያሺሲዛ ኔ ታማን ታና ዳጋንፋ።

²² ጾሳዉ! ኮይሮ ኔ ሃሳያ፤ ታ ኔስ ዛሮ ኢማና፤ ታኒካ ሃሳያና፤ ኔካ ዛሮ ኢማ።

²³ ኤሮ ጊዶ ታ ኦዳ ናጋራይኔ ቆሆይ ኣይ ሊኬ? ኣኔ ታ ሞሮዛኔ ታ ናጋራ ታና ኤሪሳ።

²⁴ ኔ ሲን ታፔ ጌንዳ ታና ኔ ሞርኬ ማላ ኣዛስ ቆዳይ?

²⁵ ጫርኮይ ቆቆፊዛ ቦንጮ ማላኔ ሜላ ሃፓ ማላ ኔ ኣይስ ታና ያሺሴን ጎዳይ?

²⁶ ታ ቦላ ኔ ጻፊዳ ሞቶይ ኬሂ ጫሞ፤ ታኒ ዬላጋቴን ኦዳ ቆሆዛካ ታስ ኣጋቤካ።

²⁷ ኔ ታ ቶሆታ ዱሩማታ ጊዶን ቃቻዳሳ፤ ታ ታንጎ ኡባ ዎዴ ኔ ካሌታሳ፤ ታ ጌዶን ኔ ኤቃሳ።

²⁸ «ሄሳ ጊሻስ ታኒ ዎቂዳ ሚሻ ማላ ጊዳዳ ኣታና፤ ባዳይ ሚዳ ማይኦ ማላካ ታ ያና።