ኢዮቤ ማጻፋ 12 - ጋሞ ማጻፋ

ኢዮቤ ሃሳያ

¹ ኢዮቢ ሂዝጊ ዛሪዴስ፤

² «ቱሙካ ኢንቴ ኬሂ ኤራንቻታ፤ ኢንቴ ሃይቂሺንካ ኤራቴ ኢንቴናራ ኢሲፌ ሃይቃና ሚሳቴስ።

³ ጊዶ ኣቲን ታስካ ኢንቴይሳ ማላ ኣኬካይ ዴስ፤ ታኒ ኢንቴፌ ኣይ ሚሻንካ ጉጺኬ፤ ኢንቴ ሃሳይዳይሳ ኣሲ ኡባይ ኤሬስ።

⁴ «ታ ጾሳ ጼይጊን ታስ ኢዚ ዛሪዳ ዎዴይ ዴስ፤ ሃኢ ታኒ ታ ላጌታስ ቂስ ጊዳዲስ፤ ታኒ ሞሮይ ባይንዳ ጺሎ ኣሳ ኡባስ ቂስ ኣታዲስ።

⁵ ሜቶይ ኢዛ ቦላ ጋኮንታ ኣሳ ማታን ሜቶቲዳ ኣሳ ሜቶ ሌቃናይሲ ካዉሻ ሚሻ፤ ጊዶ ኣቲን ኩንዳናስ ጋንዲጋርዛዴ ሱጊ ዬጌታ።

⁶ ባ ኤቃ ጾሳታ ጎይኒዛይቲ፥ ካይሶቲኔ ጾሳ ካዲዳ ኣሳቲካ ሳሮን ዴቴስ።

⁷ «ጊዲኮካ ሜዶሳታ ኦይቻ፤ ኢስቲ ኔና ታማርሳና፤ ሳሎ ካፎታ ኦይቻ፤ ኢስቲ ኔስ ዮታና።

⁸ ዎይኮ ቢታይስ ዮታ፤ ኢዛካ ኔና ታማርሳና፤ ኣባ ጊዶ ሞሌቲካ ኔስ ዮታና።

⁹ ሃይሳ ኡባ ጊዶፌ ጾሳ ኩሼይ ሃይሳ ኦዳይሳ ኤሮንታይ ኦኔ?

¹⁰ ሼምፖራ ፓጻ ዲዛ ሜቴ ኡባይኔ ኢሲ ኢሲ ኣሳ ሼምፖይ ጾሳ ማታ ጊዶን ዴስ።

¹¹ ኢንጻርሲ ካ ቃና ሻኪ ኤሪዛይሳ ማላ፥ ሃይካ ሃሳያ ቆሞታ ሻኪ ኤሬስ።

¹² ኤራቴይ ጪማቴን፥ ኣኬካይካ ላይ ኣዱሳቴን ቤቴቴስ።

¹³ «ጾሳስ ጊዲኮ ኣ ኤራቴኔ ዎልቃይ ዴስ፤ ዞሬይኔ ኣኬካይ ኢዛ ማታፔ ቤቴቴስ።

¹⁴ ጾሲ ላሊዳይሳ ኦኒካ ዛሪ ኬጻናዉ ዳንዳዬና፤ ጾሲ ቃቺዳይሳ ኦኒካ ቢርሻናዉ ዳንዳዬና።

¹⁵ ጾሲ ኢራ ዲጊኮ ኮሻ ጊዳና፤ ኢራ ቡኪሲኮ ቃሴ ቢታይ ሃሮን ሜጬታና።

¹⁶ ጾሲ ሚኖኔ ጾኒዛዴ፤ ባሌቲዛዴይኔ ባሌዛዴይ፥ ናምኣቲካ ኢዛ ጎዳቴ ጋርሳና።

¹⁷ ኢዚ ዞሪዛይታ ኤራቴ ዲጋና፤ ዴሬ ካሌዛይታ ኢዚ ኤያ ኦና።

¹⁸ ኢዚ ካዎታ ካዎቴ ኣራታፔ ዎና፤ ቃሾ ኣሳ ማላ ዳንጮ ቢርሺሳና።

¹⁹ ቄሴታፔ ኢስታ ቄሴቴ ዎ ኤኪዲ ኢስታ ጎዳና፤ ጎዳቴ ቦላ ዲዛይታ ኢስታ ጎዳቴፌ ዲጋና።

²⁰ ኣማኔቲዳ ኣሳታ ጮኡ ኦና፤ ጪማታፔካ ኣኬካ ዲጋና።

²¹ ጊታ ኣሳታ ዬላቻና፤ ዎልቃማታ ዎልቃ ዲጋና።

²² ማሶን ቆቴቲዳ ጹራ ቆንጪሳና፤ ሳካና ማ ፖኦን ላማና።

²³ ካዎታካ ጊታሳና፤ ዛሪዲካ ይሳና፤ ካዎቴካ ዳርሳና፤ ዛሪዲካ ላላና።

²⁴ ካሌዛይታስ ኣኬካይ ፓጫና ማላኔ ኦጌይ ባይንዳ ባዞ ቢታን ቶይላታና ማላ ኢዚ ኦና።

²⁵ ፖኦይ ባይንዳ ማሶን ኢስቲ ጴታና ማላኔ ማቲዳ ኣሳ ማላ ኢስቲ ጋዲጋዳና ማላ ኦና።