ኢዮቤ ማጻፋ 10 - ጋሞ ማጻፋ

¹ «ዱሲ ታና ሳሌዴስ፤ ታ ዴኢዛ ጫሞ ዴኦዛ ቆንጬን ሲሳና።

² ታኒ ጾሳ ሂዝጋና፤ ታ ቦላ ኔስ ላንጬይ ዲኮ ታስ ቆንጪሳ ኣቲን ታ ቦላ ፒርዶፋ!

³ ሃይሳ ሊኬ ኔ ታና ሜቶይሲ ኔስ ዎጋ? ኔኒ ኔርካ ሜዳ ኣሳ ኔ ካናስ ኔስ ቤሲዜ? ኢታ ኣሳታ ዱላታይ ኔና ኡፋይሲዜ?

⁴ ኔ ኣይፌይ ኣሳ ኣይፌ ማላ? ዎይኮ ኔ ኣሳ ጼላይ?

⁵ ኔ ዎዴቲ ኣሳይሳ ማላ? ዎይኮ ኔ ላይቲ ኣሳ ላይ ማላ ቃን?

⁶ ኣይስ ኔ ታ ቆሆዛ ጼላይ? ኣይስ ኔ ታ ናጋራካ ካላ ካላዳ ኣጎንታ ኢጻይ?

⁷ ታኒ ቆሆንታይሳኔ ኔ ኩሼፔ ኦኒካ ታና ኣሾንታይሳ ኔ ኤራሳ።

⁸ ታስ ሜኔ ማላ ኢሚ ሜዳይ ኔ ኩሼታ፤ ሂስቲን ሃኢ ሃ ኩሼቲ ታና ዛሪ ላሊ ይሳኔ?

⁹ ማና ሚሻ ማላ ኔ ታና ቢታፌ ሜይሳ ቆፓ፤ ሂስቲን ሃኢ ኔ ታና ጉዱላ ማላ ሊቂሳኔ?

¹⁰ ታና ማ ማላ ቲጋዳ፥ ሜቆ ማ ማላ ኢርኪሳ ኦዳሳ።

¹¹ ታ ኣሳቴ ጋልባኒኔ ኣሾን ካማዳሳ፤ ሜቄኒኔ ሻያን ጋ ኦይዳሳ።

¹² ዴኦኔ ሜርና ሲቆ ታስ ኢማዳሳ፤ ኔ ናጎይካ ታ ኣያና ሚንዴስ።

¹³ «ሄኮ ሃይታ ሃ ሚሻታ ኔ ዎዚናን ቆታ ዎዳ ዳሳ፤ ኔ ቆፋይካ ሃይሳ ጊዲዳይሳ ታ ኤራዲስ።

¹⁴ ታ ቆሂዳ ጊዲኮ ኔ ኣይፌቲ ቤያና፤ ታ ናጋራ ጊሻስ ታና ቃጻዮንታ ኣካ።

¹⁵ ታ ናጋራ ኦዳኮ ኤሶራ ሜቶ ጊዶን ኩንዳና፤ ሎኦ ሚሽ ኦዳ ጊዲኮካ ጋላቴቲኬ፤ ታ ጊልቂን ዬላይ ታና ጋኪዴስ።

¹⁶ ታ ኦቶሬቲዳኮ ኔ ታና ጋሞ ማላ ሻንካታዳ ኦይካና፤ ኔ ታና ቆሃናስ ዛራ ዛራ ሻንካታና።

¹⁷ ታ ቦላ ማርካቲዛ ኣሳታ ኔ ኡባ ጋላስ ዴማና፤ ታ ቦላ ኔ ሃንቆይ ጌዴ ዳሪ ዳሪ ባና፤ ኔኒ ታና ቆሃናስ ኡባ ጋላስ ኦራ ቆፋታ ኦላ ኣሳታ ማላ ታ ቦላ ዴንሳ።

¹⁸ «ታ ጎዳ ጾሳዉ! ኣይስ ታ ዬሌታና ማላ ኦዲ? ኦኒካ ታና ቤኦንታ ታ ሃይቃይቺዳኮ ሎኦኮሺን!

¹⁹ ታ ሜቶንታ ኣታርኪና፤ ታኒ ታ ኣዬይ ኡሎፔ ዱፎን ቢዳኮ ታስ ሎኦ ጊዳናኮሺን!

²⁰ ታ ዳና ላይያ ቃን ጊዴኬ? ሄ ቃን ላይይን ጉራ ታ ኡፋዬታና ማላ ታና ኣጋርኪ!

²¹ ሄሲካ ታኒ ናምኣን ሃ ሲማናስ ዳንዳዮንታ ጊርዲ ጊዳ ማሶ ባናፔ ሲንና።

²² ታ ባናሶዚ ማ ኩዋይኔ ሺሮይ ኩሚዳ ቢታ፤ ሄን ዲዛ ፖኦዚ ማ ማላ።»