ኤርማሳ ቲንቢቴ 5 - ጋሞ ማጻፋ

ዬሩሳላሜ ኣሳ ናጋራ

¹ ጎዳይ፥ «ኣኔ ዬሩሳላሜ ኦጌታ ቦላ ኬዚዲ ፑዴኔ ዱጌ ዩሺ ጼሊቴኔ ኣኬኪቴ፤ ዴሬይ ዱላቲዛሶታን ጺሎቴ ኮይዛይኔ ሱሬ ፒርዲዛ ኬዚዲ ኢንቴ ኢሳዴካ ዴሚኮ ታኒ ዬሩሳላሜ ማራና።

² ጊዶ ኣቲን ኢስታስ፥ ‹ጎዳይ ቤዪን› ጊ ጫቂኮካ ኢስቲ ቱማፔ ዎርዶ ጫቄቴስ» ጌስ።

³ ኣቤት ጎዳዉ! ኔ ኣይፌቲ ቱማ ጼሌቴኔ? ኔኒ ኢስታ ሾጫዳሳ ሺን ኢስታ ሳኪቤና። ኔኒ ኢስታ ኪንቼሬዳሳ፤ ጊዶ ኣቲን ኢስቲ ሲሚቤቴና፤ ኢስቲ ባንታ ዎዚና ሹቻፌ ኣ ሚንዳ፤ ባንታ ናጋራፔካ ሲሞንታ ኢጺዳ።

⁴ ሄሳፌ ጉዬ ታኒ ታ ዎዚናን፥ «ሃይቲ ማንቆታኔ ኤያታ፤ ሄይቲ ጎዳ ኦጌኔ ባንታ ጾሳ ዎጋ ኤሮንታይታ።

⁵ ሄሳ ጊሻስ ታኒ ጊታ ኣሳታኮ ባና፤ ኢስታስካ ዮታና፤ ጋሶይካ ጎዳ ኦጌኔ ባንታ ጾሳ ዎጋ ኤሬቴስ» ጋዳ ቆፓዲስ። ጊዶ ኣቲን ኢስቲ ኡባይካ ኢሲፌ ኢዛ ቃምባራ ሜንዳ፤ ቃሾዛካ ዱዳ።

⁶ ሄሳ ጊሻስ ጋሞይ ዎራፔ ኬዚዲ ኢስታ ሜንሬና፤ ኢስታ ፑዜሬና፤ ማሄይ ኢስታ ካታማታ ዩሾ ዛማዲ ናጋና። ሄ ካታማታፔ ኬዚዛ ኡባ ኢዚ ፑዛና። ጋሶይካ ኢስታ ማካላቴኔ ካዶይ ዳሪዴስ።

⁷ ጎዳይ፥ «ታኒ ኢንቴ ናጋራ ኣይስ ኣቶ ጎ? ኢንቴ ናይቲ ታና ኣጊዳ፤ ኤቃ ጾሳታንካ ጫቂዳ፤ ታኒ ኢስታ ካልሳ ሚዛዲስ፤ ኢስቲ ጊዲኮ ላይማቲዳኔ ላይማ ኬ ቢዳ።

⁸ ኢስቲ ኬቲዳ ኮርማ ፓራ ማላ ጊዲዳ፤ ኢስቲ ኢሶይ ኢሶይ ኣሳ ማቾ ላጌናስ ካሊዳ።

⁹ ቱሙፔ ታኒ ሃ ዮኦታ ጊሻስ ኢስታ ቃጻያናስ ቤሴኔ? ታኒ ታ ሁኤራ ሄሳ ማላ ካዎቴ ቦላ ሃሎ ኬሳና ቤሴኔ?» ጌስ።

^10-11 ቃሴካ ጎዳይ፥ «ዎይኔ ቱራ ጊዶ ቢዲ ኢዛ ሞሪቴ፤ ጊዶ ኣቲን ሙሌራ ይሶፍቴ። ኢስቲ ጎዳስ ጊዶንታ ጊሻስ ኢዚ ሃጋታ ታርሺ ታርሺ ዬጊቴ፤ ኢስራኤሌ ኣሳይኔ ዩሁዳ ኣሳይ ሙሌራ ታና ካዲዳ» ጌስ።

¹² ኢስቲ ጎዳ ቦላ ዎርዶ ሃሳይዳ፤ «ኢዚ ኑና ኣይኮካ ኦና፤ ኢታ ሚሺካ ኑ ቦላ ጋኬና፤ ኦላኔ ኮሻ ኑኒ ሙሌካ ቤኦኮ።

¹³ ናቤቲ ጫርኮ ማላ ኣቲን ኢስታ ጊዶን ቃላይ ዴና፤ ኢስቲ ጊዛዚ ኡባይ ኢስታ ቦላ ጋኮ» ጌቴስ።

¹⁴ ሄሳ ጊሻስ ጎዳይ ኡባፌ ዎልቃማ ጾሳይ፥ «ኢስቲ ሃ ቃላ ሃሳይዳ ጊሻስ ታኒ ታ ቃላ ኔ ዶናን ታማ ኬሳና። ሃ ኣሳካ ሚ ኬሳና፤ ታማይካ ኢስታ ሚ ይሳና» ጌስ።

¹⁵ ጎዳይ ኢንቴና፥ «ኢንቴኖ ኢስራኤሌ ኣሳቶ! ታኒ ኢንቴ ቦላ ሃሆ ቢታፌ ኢሲ ካዎቴ ኤሃና። ኢዚ ዎልቃማኔ ቤኒሶፌ ዲዛ ካዎቴ። ኢዛ ቃላይ ኢንቴስ ኤሬቴና፤ ኢዛ ሃሳያይ ኢንቴስ ጌሌና።

¹⁶ ኢስታ ማሻ ኮሆይ ዶያ ዲዛ ዱፎ ማላ፤ ኢስቲ ኡባይካ ዎልቃማ ኦላንቻታ።

¹⁷ ኢስቲ ኢንቴ ካኔ ቁማ ፒቲ ማና። ኢንቴ ኣቱማ ናይታኔ ማጫ ናይታ ዎና። ኢንቴ ዶርሳኔ ሚዛ ቦንቂዲ ማና። ኢንቴ ዎይኔ ቴራኔ ባላሴ ቴራ ቦንቂዲ ማና። ኢንቴ ኣማኔቲዛ ጊምቤቲዳ ካታማታካ ኢስቲ ባንታ ማሻን ይሳና» ጌስ።

¹⁸ ጎዳይ ኤርማሳ፥ «ጊዶ ኣቲን ሄ ጋላሳታን ታኒ ኢንቴና ሙሌራ ይሲኬ።

¹⁹ ኣሳይ ኔና፥ ‹ኑ ጎዳ ኑ ጾሳይ ኑ ቦላ ሃይሳ ኡባ ኣይስ ኦዴ?› ጊዲ ኦይቺዛ ዎዴ ኔኒ ኢስታስ፥ ‹ኢንቴ ታና ጎዳ ኣጊዲ ኢንቴ ቢታን ኣላጋ ጾሳታስ ኦዳ ማላ፥ ኢንቴካ ኣሳ ቢታን ኣላጋታስ ሄሳ ኦና› ጋ» ጊዴስ።

²⁰ ቃሴካ ጎዳይ፥ «ሃይሳ ያቆቤሶ ኣሳታስ ዮታ፤ ዩሁዳ ቢታንካ ሂዝጋ ኣዋጃ፤

²¹ ኢንቴኖ ኣይፌይ ዲሺን ዴሞንታይቶ! ሃይ ዲሺን ሲዮንታይቶ! ኤያኔ ዩሺ ቆፖንታይቶ! ሃይሳ ሲዪቴ!

²² ኢንቴ ታስ ያያናስ ቤሴኔ? ኢንቴ ታ ሲንን ኮኮራናስ ቤሴኔ? ኣይስ ጊኮ ኢዚ ሜርናስ ካን ቦንታ ማላ፥ ታኒ ኣንጮ ኣባስ ዛዋ ኦዲስ። ዳምባላይ ቡላኬቲኮካ ዛዋፔ ኣና፤ ኢዚ ጉሚኮካ ፒናናስ ዳንዳዬና።

²³ ጊዶ ኣቲን ሃ ዴራስ ሙሜኔ ማካላ ዎዚናይ ዴስ፤ ኢስቲ ኦጌ ኣጊ ዎራ ቢዳ።

²⁴ ኢስቲ ባንታ ዎዚናን፥ ‹ኑስ ሲላ ኢራኔ ጋባ ኢራ ዎዴን ዎዴን ቡኪሲዛ፥ ካ ሺሾ ዎዴ ኑስ ዎዴራ ኤሂዛ ጎዳ ኑ ጾሳስ ኣኔ ያዮስ› ጊቤቴና።

²⁵ ‹ኢንቴ ኢታ ኦሶይ ሃይታ ኢንቴና ዲጊዴስ። ኢንቴ ናጋራይ ኢንቴና ሎኦ ሚሻፌ ኣሺዴስ› ጋ» ጌስ።

²⁶ ጎዳይ፥ «ታ ኣሳ ጊዶን ኢታ ኣሳቲ ዴቴስ። ካፎታ ኦይካናስ ናጊዛ ኣሳ ማላ ኢስቲ ዎጺማዴ ዎዲ ኣሳ ኦይካናስ ናጌቴስ።

²⁷ ካፎ ኬን ካፎይ ኩሚዳ ማላ ኢስታ ኬን ባሌይ ኩሚዴስ። ሄሳ ጊሻስ ኢስቲ ዱሬኔ ዎልቃማ ጊዲዳ።

²⁸ ኢስቲ ኦርዲዳኔ ሞዳ፤ ኢስታ ኢታቴስ ዛዋይ ዴና። ዪኦቲ ሱሬ ፒርዳ ዴማና ማላ ኢስታስ ኤቂቤቴና፤ ማንቆታ ማታ ጊሻሲካ ሞቴቴቴና።

²⁹ ሂስቲን ታኒ ሃይታ ሃ ዮታ ጊሻስ፥ ኢስታ ቃጻያናስ ቤሴኔ? ሄሳ ማላ ካዎቴ ቦላ ታ ሃሎ ኬሳናስ ቤሴኔ?» ጌስ።

³⁰ ቃሴካ ጎዳይ፥ «ዳሮ ባቢሲዛ ሚሺኔ ዳጋንዛ ሚሺ ቢታ ቦላን ሃኒዴስ።

³¹ ናቤቲ ዎርዶ ቲንቢቴ ዮቴቴስ፤ ቄሴቲካ ኢስታ ዞሬን ኣይሴቴስ። ታ ኣሳይካ ሄሳ ማላ ሚሽ ዶሴስ! ሂስቲን ዉርሴን ኢንቴ ኣይ ኦኔ?» ጌስ።