ኤርማሳ ቲንቢቴ 47 - ጋሞ ማጻፋ

ፊሊስጼሜ ጊሻስ ዮቴቲዳ ኪታ

¹ ፓሮኔይ ጋዛ ኦሊ ኦይካናፔ ካሴ ፊሊስጼሜታ ጊሻስ ጎዳፔ ኤርማሳኮ ዪዳ ቃላይ ሃይሳፌ ካሊ ዲዛይሳ።

² ጎዳይ፥ «ቤኢቴ፥ ፑዴሃ ባጋን ሃ ኩሚ ኩሚ ቤስ፤ ዎልቃማ ዲኦ ጊዳና፤ ዴሬዮኔ ኢዚ ጊዶን ዲዛይታ ኡባ ኢዚ ካታማታኔ ካታማታን ዲዛ ኣሳ ኡባ ሚታና። ዴሬዚካ ባ ቃላ ቁ ሂስቲ ዋሳና፤ ሄ ቢታን ዲዛ ኣሳይ ኡባይ ጫሞ ዬሆ ዬካና።

³ ፓራ ቶሆ ጊሪሲ ሞርኬ ፓራ-ጋሬታ ዋሶ፥ ፓራ-ጋሬታ ቶሆይ ጌንዴሪሼ ጊሪዛ ጊሪሳ ጋሶን ኣዋቲ ባንታ ናይታ ኣሻናስ ጉዬ ሲሚ ጼሌቴና፤ ኢስታ ኩሼይካ ሲላ ጊዳና።

⁴ ፊሊስጼሜ ኣሳ ኡባ ይሳናስ፥ ባስ ኣቲዲ ሃራታ ማዲዛይታ ኡባ ጺሮሴፔኔ ሲዶናፔ ዱ ኣሻናስ ዎዴይ ጋኪዴስ። ጎዳይ ካፍቶሬ ጋጻን ኣቲዳ ፊሊስጼሜ ኣሳ ይሳና ዴንዲዴስ።

⁵ ጋዛይ ካዮስ ባ ቢናና ሜዴታና፤ ኣስቄሎናይ ባ ዶና ቦላ ኩሼ ዎና፤ ኢንቴኖ ዴምባ ቦላ ጫሻ ኣቲዳይቶ! ኢንቴ ኣይዴ ጋካናስ ኢንቴ ቦላ ቃጪሼ ዳኔ?

⁶ «ኢንቴ፥ ‹ኔኖ ጎዳ ማሻዉ! ኔ ኣይዴ ሼምፓኔ? ኔ ኮሆን ሲማ ጌላ፤ ኔኒ ጮኡ ጋዳ ኡታ› ጋና።

⁷ ጊዶ ኣቲን ጎዳይ ኣስቄሎናኔ ኣባ ጋጻ ኦላና ማላ ኣዛዚሺን ዋኒ ሼምፓናስ ዳንዳዬቲዜ?» ጌስ።