ኤርማሳ ቲንቢቴ 28 - ጋሞ ማጻፋ

ኤርማሳኔ ዎርዶ ናቤ ሃናኒያ

¹ ሄ ዎዴ ዩሁዳ ካዎ ሴዴቂያሲ ካዎቲዳ ኦይዳን ላይን ኢቻሻን ኣጊናን ጌባኦኔ ኣስ ኣዙሬ ና ናቤ ሃናኒያይ ጎዳ ኬን ቄሴታ ሲንኒኔ ዴሬ ኡባ ሲንን ታስ፥

² «ኡባፌ ዎልቃማ ጎዳ ኢስራኤሌ ጾሳይ፥ ‹ባቢሎኔ ካዎይ ኢንቴና ቶሲዳ ቃምባራ ታ ሜንና።

³ ባቢሎኔ ካዎ ናቡካዳናጾሬይ ጎዳ ኬፌ ዲኢ ኤኪዲ ኤፊዳ ሚሻታ ኡባ ታኒ ናምኡ ላይ ጊዶን ዛራዳ ሃ ሶሆ ኤሃና።

⁴ ቃሴ ታኒ ዩሁዳ ካዎ ኢዮኣቄሜ ና ኢኮኒያኔኔ ዩሁዳፔ ዲኤቲዲ ባቢሎኔ ቢዳ ኣሳ ኡባ ዛራዳ ሃ ሶሆ ኤሃና። ጋሶይካ ባቢሎኔ ካዎይ ኢንቴና ቶሲዳ ቃምባራ ታ ሜንና› ጌስ» ጊዴስ።

⁵ ሂስቲን ጎዳ ኬ ጊዶን ኤቂዳ ቄሴታ ሲንኒኔ ዴራ ሲንን ናቤ ኤርማሲ ናቤ ሃናኒያስ፥

⁶ «ኣሚን! ጎዳይ ኦ! ጎዳ ኬ ሚሻታኔ ዲኤቲዲ ቢዳ ኣሳ ኡባ ባቢሎኔፔ ዛሪ ኤሂዲ ጎዳይ ባ ዮቲዳ ቃላ ፖሎ!

⁷ ጊዲኮካ ኣኔ ታ ኔሲኔ ሃ ኣሳስ ዮቲዛ ቃላ ሲያ።

⁸ ኔፔኔ ታፔ ካሴ ሲንን ዴኢዳ ናቤቲ ዳሮ ዴሬታ ቦላኔ ጊታ ካዎቴታ ቦላ ኦላ ጊሻስ፥ ባሻ ጊሻሲኔ ኢታ ሃርጌ ጊሻስ ቲንቢቴ ዮቲዳ።

⁹ ጊዶ ኣቲን ሳሮቴ ጊሻስ ቲንቢቴ ዮቲዳ ናቤይ ኢዚ ዮቲዳ ቃላይ ፖሌቲዛ ዎዴ ቱማፔ ጎዳይ ኢዛ ኪቲዳይሲ ሄሳን ኤሬቴስ» ጊዴስ።

¹⁰ ሄሳፌ ጉዬ ናቤ ሃናኒያይ ናቤ ኤርማሳ ሞርጌፌ ቃምባራ ኤኪዲ ሜንዴስ።

¹¹ ሂስቲዲ ሃናኒያይ ኣሳ ኡባ ሲንን፥ «ጎዳይ፥ ‹ታኒ ናምኡ ላይታ ጊዶን ባቢሎኔ ካዎ ናቡካዳናጾሬ ቃምባራ ካዎቴታ ኡባ ሞርጌፌ ዴንዳ ሃይሳ ሜንና› ጌስ» ጊዴስ። ሄ ዎዴ ናቤ ኤርማሲ ኣጋጊዲ ባ ኦጌ ቢዴስ።

¹² ናቤ ሃናኒያይ ናቤ ኤርማሳ ሞርጌፌ ቃምባራ ሜንዳ ጉ ዎዴፔ ጉዬ ጎዳ ቃላይ ናቤ ኤርማሳኮ ዪዲ፥

¹³ «ባዳ ሃናኒያስ፥ ‹ኔኒ ሚ ቃምባራ ሜንዳሳ፤ ታኒ ጊዲኮ ኢዛ ጊሻስ ቢራታ ቃምባራ ጊጊሳና› ጌስ ጎዳይ ጋዳ ዮታ።

¹⁴ ቃሴካ ኡባፌ ዎልቃማ ጎዳ ኢስራኤሌ ጾሳይ፥ ‹ባቢሎኔ ካዎ ናቡካዳናጾሬስ ሃጋዛና ማላ ታኒ ሃ ካዎቴታ ኡባ ሞርጌን ቢራታ ቃምባራ ዎና፤ ኢስቲካ ኢዛስ ሃሬታና። ሃራይ ኣቶሺን ዎራ ዶኣታ ቦላካ ጎዳቴ ኢዛስ ኢማና› ጌስ» ጊዴስ።

¹⁵ ሄሳፌ ጉዬ ናቤ ኤርማሲ ናቤ ሃናኒያስ፥ «ሃናኒያ ሲያ! ጎዳይ ኔና ኪቲቤና፤ ጊዶ ኣቲን ኔኒ ሃ ኣሳይ ዎርዶ ሚሻን ኣማኔታና ማላ ኦዳሳ።

¹⁶ ሄሳ ጊሻስ ጎዳይ፥ ‹ታኒ ኔና ሃ ሳኣ ቦላፌ ዲጋና፤ ኔኒ ጎዳ ቦላ ማካላ ሃሳይዳ ጊሻስ ኔ ሃ ላይ ሃይቃና› ጌስ» ጊዴስ።

¹⁷ ናቤ ሃናኒያይ ሄ ላይ ላፑን ኣጊናን ሃይቂዴስ።