ኤርማሳ ቲንቢቴ 20 - ጋሞ ማጻፋ

ኤርማሳኔ ፓሽኩሬ

¹ ሄ ዎዴ ጎዳ ኬን ኢሜሬ ና ቄሴ ፓሽኩሬይ ኤርማሲ ቲንቢቴ ዮቲሺን ሲዪዲ፥

² ናቤ ኤርማሳ ሾጪዴስ፤ ጾሳ ኬፌ ፑዴ ባጋራ ዲዛ ቢኒያሜ ጊምቤ ፔንጌ ቦላ ኣግሪሞቄን ቃቺዴስ።

³ ዎንቴ ጋላስ ፓሽኩሬይ ኤርማሳ ቃሾፔ ቢርሺን ኤርማሲ ኢዛስ፥ «ሃቺፌ ዶሚን ጎዳይ ኔ ሱን ማጎርሚሳቢቤ ጋና ኣቲን ፓሽኩሬ ጌና።

⁴ ጋሶይካ ጎዳይ፥ ‹ታኒ ኔናኔ ኔ ላጌታ ኡባ ዳጋማስ ኣ ኢማና፤ ኢስቲ ኔኒ ጼሊሺን ባንታ ሞርኬታ ማሻን ዉራና፤ ታኒ ዩሁዳ ኣሳ ኡባ ባቢሎኔ ካዎ ኩሼን ኣ ኢማና፤ ኢዚ ኢስታ ዲኢዲ ባቢሎኔ ኤፋና፤ ሂስቲዲ ሄን ኢስታ ማሻን ሲፋና።

⁵ ሃ ካታማይ ኣቆታ፥ ኢዛ ኦ ዴሚዳ ኡባ፥ ዩሁዳ ካዎታ ኣቆታኔ ኢስታስ ዲዛ ኣልኦ ሚሽ ኡባ ታኒ ኢስታ ሞርኬታስ ኣ ኢማና፤ ኢስቲካ ዲኢ ኤኪዲ ባቢሎኔ ኤፋና።

⁶ ፓሽኩሬ! ኔኒኔ ኔ ሶሆን ዲዛ ኡባይካ ዲኤቲዲ ባቢሎኔ ባና። ኔኒኔ ኔ ኢስታስ ዎርዶ ቲንቢቴ ዮቲዳ ኔ ላጌቲ ኡባይ ሄን ሃይቃናኔ ሞጌታና› ጌስ» ጊዴስ።

ኤርማሳ ዙዙን

⁷ ኣቤት ጎዳዉ! ኔኒ ታና ጪማዳሳ፤ ታኒካ ጪሜታዲስ። ኔኒ ታፔ ኬሃ ሚናዳ ታና ጾናዳሳ። ጋላስ ኩሜ ታኒ ኣሳስ ሚቻስ ኣታዲስ፤ ኡባይካ ታና ቂስ።

⁸ ታኒ ሃሳይዛ ዎዴ ኡባን ዋሳይስ፤ «ሺሮኔ ባሽ» ጋ ኣዋጃይስ፤ ሄሳ ጊሻስ ጎዳ ቃላይ ታስ ኩሜ ጋላስ ታ ቦላ ጫሼኔ ቂ ኤሂዴስ።

⁹ ታኒ፥ «ሃይሳፌ ጉዬ ጎዳ ሱን ዴንኬ፤ ኢዛ ሱንንካ ሃሳይኬ» ጊኮ ኢዛ ቃላይ ታ ዎዚና ጊዶን ታማ ማላ፥ ታ ሜቄ ጊዶንካ ሱርቁንቶ ማላ ጊዲዴስ፤ ሄሳ ጊሻስ ታ ካማ ኦይካናስ ጾኒዴስ፤ ሙሌራካ ኤቄታናዉ ዳንዳያቤኬ።

¹⁰ «ኡባሶን ሺሮይ ዴስ፤ ሂሊቴ ኣኔ ኑኒካ ሂሎስ» ጊዲ ዳሮቲ ሳሱኬቲሺን ታ ሲያዲስ፤ ታ ኩንዴ ናጌቲሼ ዲዛ ታ ላጌቲ ኡባይ፥ «ኦኔ ኤሪዛይ ባሌታና ዳንዳይዛኮ ሂስቲኮ ኑኒ ኢዛ ጾናናኮኔ ኑ ሃሎ ኬሳናኮ» ጌቴስ።

¹¹ ጊዶ ኣቲን ጎዳይ ያሺሲዛ ቶራ ቃራ ማላ ታናራ ዴስ፤ ሄሳ ጊሻስ ታና ዬዴዛይቲ ጴታና ኣቲን ታና ጾኔቴና፤ ኢስቲ ኢታ ካዉሽ ካዉያና ኣቲን ኢስታስ ጊጌና፤ ኢስታ ካዉሻቴይ ሙሌካ ዶጌቴና።

¹² ኣቤት ኡባፌ ዎልቃማ ጎዳዉ! ጺሎዛ ፓጪዛይሶ! ዎዚናኔ ካሃ ፒልጋ ጼሊዛይሶ! ታኒ ታ ሞቶ ኔስ ኣ ኢሚዳ ጊሻስ ኔኒ ኢስታ ቦላ ሃሎ ኬሲሺን ታ ኣይፌን ቤኣናስ ታና ጋ።

¹³ ጎዳስ ዬጺቴ! ኢዛስ ጋላታ ሺሺቴ፤ ኢዚ ሜቶታንቻታ ሼምፖ ኢታታ ኩሼፔ ኣሼስ።

¹⁴ ታኒ ዬሌቲዳ ጋላሳያ ቃንጌቲዳሮ ጊዱ! ታ ኣዬያ ታና ዬሊዳ ጋላሳያ ኣንጄቱፉ!

¹⁵ ታ ኣዋስ፥ «ኔስ ሚሺራቾ፤ ኔስ ኣቱማ ናይ ዬሌቲዴስ!» ጊ ዮቲዳይ ቃንጌቲዳዴ ጊዶ!

¹⁶ ሄሳዴይ ጎዳይ ቃታይ ባይንዳ ሺሬቺ ዬጊዳ ካታማታ ማላ ጊዶ፤ ማላዶ ዋሶ፥ ጋላሳ ሴታን ኦላ ሺሮ ሲዮ።

¹⁷ ታ ኣያ ታስ ዱፎ ጊዳና ማላ፥ ኢዚ ኡሎይ ታስ ሜርና ዱሳሶ ጊዳና ማላ ታና ሄን ኣይስ ዎቤኔ?

¹⁸ ታኒ ሜቶኔ ጬጬ ቤኣናሲኔ ታ ዴኦ ላይ ኡባ ካዉሻቴን ዉርሳናስ ታ ኣዪ ኡሎፔ ኣይስ ኬዛዲና?