ኤርማሳ ቲንቢቴ 19 - ጋሞ ማጻፋ

ሌሚሶስ ሜቂዳ ጎምቦ

¹ ጎዳይ ኤርማሳስ፥ «ባዳ ማናፔ ጎምቦ ሻማ፤ ሂስታዳ ኔናራ ዴሬ ጪማታፔኔ ቄሴታፔ ጉታ ኤካዳ፥

² ኮንኣ ሜቆ ፔንጌ ኣቻራ ኣዳ ሄኖሜ ና ሾባ ባ፤ ሄን ታኒ ኔስ ዮቲዛ ቃላ ኣዋጃ።

³ ‹ኢንቴኖ ዩሁዳ ካዎቶ! ዬሩሳላሜን ዲዛ ዴሬዞ! ጎዳ ቃላ ሲዪቴ! ኡባፌ ዎልቃማ ጎዳ ኢስራኤሌ ጾሳይ፡ ሲያናስ ሃይስ ኢቲዛ ሚሽ ሃ ቢታ ቦላ ታኒ ኤሃና።

⁴ ጋሶይካ ኣሳይ ታና ኣጊዲ ሃይሳ ሃ ሶሆዛ ኤቃ ጎይኒዛሶሆ ኬሲዴስ፤ ኢስቲ ጊዲን ዎይኮ ካሴ ኢስታ ኣዋቲ፥ ዎይኮ ዩሁዳ ካዎቲ ኤሮንታ ኤቃ ጾሳታስ ያርሺዳ፤ ሃይሳ ሃ ሶሆዛን ጺሎ ሱ ጉሲዳ።

⁵ ቃሴ ታኒ ኢስታ ኣዛዞንታይሳ፥ ዎይኮ ኢስታስ ዮቶንታይሳ፥ ዎይኮ ታ ዎዚናን ቆፖንታይሳ ባንታ ኣቱማ ናይታ ባኣሌስ ታማን ጹጊ ያርሻናስ ጎይኒዛሶሆ ዙምቡላታ ኦዳ።

⁶ ሄሳ ጊሻስ ኣሳይ ሃ ሶሆዛ ሹካ ሾባ ጋናፔ ኣቲን ቶፌቴ ዎይኮ ሄኖሜ ና ሾባ ጊ ጼይጎንታ ዎዴይ ያና።

⁷ « ‹ሃ ሶሆን ዩሁዳ ሃልቾኔ ዬሩሳላሜ ሃልቾ ታ ላላና፤ ኢስቲ ባንታ ሞርኬታ ማሻኒኔ ባንታና ዎናስ ኮይዛይታ ኩሼን ሃይቃና ማላ ታኒ ኦና፤ ኢስታ ኣሃ ሳሎ ካፎታሲኔ ዎራ ዶኣታስ ቁማ ሂስታ ኢማና።

⁸ ታኒ ሃ ካታማዮ ሙሌራ ይሳና፤ ሚቻስካ ኬሳና፤ ኢዚ ማታራ ኣዛ ኣሳይ ኡባይ ሃኖ ፓላ! ጊ ቂ ካኣና።

⁹ ኢስቲ ባንታ ማጫ ናይታ ኣሾኔ ባንታ ኣቱማ ናይታ ኣሾ ማና ማላ ታኒ ኦና፤ ኢስታ ዎናስ ኮይዛ ኢስታ ሞርኬቲ ኢስታ ጊዶን ኢስቲ ኡባይ ኢሶይ ኢሳ ኣሾ ማና› ጌስ።

¹⁰ «ሄሳፌ ጉዬ ኔናራ ኢሲፌ ቢዳ ኣሳታ ሲንን ሄ ጎምቦዛ ሜን።

¹¹ ሂስቲዲ ኢስታስ ኡባፌ ዎልቃማ ጎዳ ጾሳይ፥ ‹ማናዛ ጎምቦይ ሜቂዳይሳኔ ሲሚ ኮሌታና ዳንዳዮንታይሳ ታኒ ሃ ካዎቴኔ ሃ ካታማ ሄሳ ኦና፤ ኣሳይ ኣሃ ሞጊዛሶይ ባይንዳ ጊሻስ ቶፌቴን ሞጋና።

¹² ታኒ ሃ ሶሆዛኒኔ ኢዛን ዲዛ ኣሳ ቦላ ሄሳ ኦና፤ ታኒ ሃ ካታማዮ ቶፌቴ ማላ ኦና።

¹³ ባንታ ኬ ካራ ቦላ ሳሎ ሜቴታስ ኤጻኔ ጩዋሲዲኔ ኤቃ ጾሳታስ ኡሹ ሺሺዳይቲ ዬሩሳላሜ ኣሳ ኬቲኔ ዩሁዳ ካዎታ ኬቲ ቶፌቴ ማላ ቱናና› ጌስ።

¹⁴ «ሄሳፌ ጉዬ ኤርማሲ ጎዳይ ቲንቢቴ ዮታናስ ኪቲዳ ቶፌቴፔ ሲሚ ዪዲ ጎዳ ኬ ዱቡሻን ኤቂዲ፥

¹⁵ ኡባፌ ዎልቃማ ጎዳ ኢስራኤሌ ጾሳይ፥ ‹ሲዪቴ! ኢስቲ ባንታ ዎዚና ሹቻሲዲ ታ ቃላ ሲዮንታ ኢጺዳ ጊሻስ ታኒ ሃ ካታማ ቦላኔ ኢዛ ማታን ዲዛ ሞታ ኡባ ቦላ ኤሃና ጊዳ ኢታ ሚሽ ኡባ ኢስታ ቦላ ኤሃና ጋይስ› ጌስ» ጊዴስ።